Samoa
This article was added by the user . TheWorldNews is not responsible for the content of the platform.

To’alua tama’ita’i taofia fa’apagota taumafai e faoa le $30 mai le pule o se faleoloa

Pago Pago - AMERIKA SAMOA

O le ali’i o Xianglin Song, e ona le Faleoloa o le Drug Store i Faga’alu, na ia faafesootaia leoleo i le Aso Gafua, Iuni 12, 2023, ma faailoa i ai le gaoi mai o lana atotupe mai lana taavale e le’i lokaina, ina ua ia aveina atu oloa i totonu o lona faleoloa mai lana taavale.

Na taua e Song i leoleo, sa ia maitauina le matala o le faitoto’a o lana ta’avale (itu o le pasese) ina ua toe fo’i atu i lana ta’avale e fa’aauau ona la’u mai oloa mo lona galeoloa. Ona ia iloa ai lea ua matala le vaega totinilima ma ua misi lana atotupe.

O le aso na sosoo ai, na lipotia ai e Song i leoleo e faapea, o ni tamaitai se toalua, mulimuli ane na taua o Sweetie Tufele ma Talitakumi Fa’ala’ula’u ma isi alii e toalua e le mailoa na o atu i lona faleoloa ma talosagaina le $30 mai ia te ia e toe aumai ai lana atotupe. Na manatu Song e le talafeagai ona o lana meatotino.

Na taua e se tagata faigaluega o le faleoloa e faapea, e toalua ni tamaitai na muamua savavali i totonu, ona sosoo ai lea ma ni alii se toalua mulimuli ane, ma fai atu ia i laua e totogi le $30 mo le atotupe ona o se tamaitiiti e igoa ia AJ, na tuuina atu ia i laua le atotupe.

Na fai atu le tagata faigaluega ia i latou o le a latou tuu atu i leoleo e taulimaina lenei tulaga, ma vili le DPS., ma a o ia valaau mo se fesoasoani, na sosola ese le vaega o tagata mai le vaaiga i se loli uliuli.

O le itula e 12:20 i le aoauli o le aso lava lea na maua ai e leoleo ni ata o le mata’ituina o le mea na tupu ina ua vaaia tagata e to’a 4 o talanoa ma le na aafia ma uu le atotupe a le na aafia.

Ona tu’u atu lea e le avefe’au a le Ofisa Tutotonu o Leoleo i Fagatogo se APB ma fa’ailoa ai fo’i i isi ali’i leoleo ina ia va’ava’ai atu i tagata ia na fa’ailoa mai e ala i ata sa mata’ituina.

I le aso 15 Iuni 2023, na maua ai e Leoleo ia tama’ita’i i Puapua i Leone ma taofia ai loa i latou i le Ofisa o Leoleo i Tafuna.

O lo o tu’uaia na maua i luga o le tagata o Tufele vaega o fualaau fa’asaina. O Tufele ma Fa’ala’ula’u na malilie uma i laua e fai fa’amatalaga i le taimi o le la fa’atalatalanoaga e leoleo.

Na taua e Fa’ala’ula’u, o se ali’i e igoa ia Sio, na sau i le fale o lona to’alua i Leone i le po ma avatu ai le atotupe, seevae van fou, se peleue, iPad, puff bars ma isi mea o lo o taua ai sa gaoia i latou. Ona ta’utino lea o Fa’ala’ula’u sa ia iloaina o mea ia na gaoia, ma o lo o taumafai ma lana uo o Tufele e toe fa’afo’i atu i le tagata e ana le meatotino e maua ai se tupe.

Na ioeina fo’i e Tufele lona mauaina ma le iloa lelei o meatotino sa ia gaoia mai le tamaititi lava lea e tasi, ma ia faia ai loa le faaiuga o le a alu ma le fuafuaga, e ala i le fa’amata’u o le na a’afia ina ia maua ai se tupe.

O Tufele ma Fa’ala’ula’u o lo’o tu’uaia i le ta’i 1 le moliaga o le solitulafono-o le mauaina o meatotino gaoia. E $500 le tupe ua faatulaga e tatala ai i laua i tua.

O ali’i e to’alua na malaga fa’atasi ma tama’ita’i, e foliga mai e

le’i maua e leoleo i le taimi nei.