Samoa
This article was added by the user . TheWorldNews is not responsible for the content of the platform.

To’avalu na molia i le osofaiga o fualaau fa’asaina i Fagaalu i le vaiaso na te’a nei

Pago Pago - AMERIKA SAMOA

E to’avalu tagata e aofia ai ma ni tamaitai se toatolu na tulai i luma o le Faamasinoga Faaitumalo i le aso Tofi ona o moliaga e faatatau i le osofaiga a leoleo i ni fale se lua i Fagaalu i le vaiaso na te’a nei.

E pei ona lipotia muamua e le Samoa News, o le aso 9 Iuni, na amata ai le osofaiga i le faataunuuina o se poloaiga sainia e le fa’amasinoga e saili ai le fale o Kika Benjamin Tilei ma faaiu ai i le faataunuuina o se poloaiga i le fale o Tavita Tali.

E to'asefulu tagata le aofa'i na fesiligia i lea taimi, ma e to'alua na mafai ona oo ese e lei molia. 

Mai le to’afitu o tagata na taofia ona o le poloaiga a Tilei, e to’atolu, e aofia ai ma Tilei na taofia i le taofia o le ta’avale a Tilei i luga o le alatele i Fagaalu; o le isi toalua o tamaitai ia Kueni Falepau ma Aiga Suluao Tu’upo. O fualaau fa’asaina sa maua i Falepau, atoa ai ma totonu o le ta’avale.

O i latou nei e to’afa na maua i totonu o le fale ma taofia e aofia ai: o le fafine lona tolu, o Adelle Fenumia’i, le tuafafine o Tilei, Samuelu Luatua, le uo tama a Fenumia’i, o se tagata e igoa ia Harris Fitiao ma le isi ali’i e igoa ia Kamipeli Taufalele. O fualaau fa’asaina atoa ai ma vaega o fualaau fa’asaina na maua i totonu o le fale o Tilei, fa’apea fo’i ma luga po’o luga o nei tagata e to’afa.

O le to’avalu o Tavita Tali na taofia i luga o le auala tele o lo o savali agai atu i le falema’i a le LBJ, ma i le taimi na siaki ai ofu ma le tino na maua ai ni fualaau fa’asaina ia te ia.

O su’esu’ega o mea uma na maua e leoleo ua fa’amaonia o fualaau ma le pauta fa’asaina o le ‘aisa’ “meth”.

O lo o molia Tali i le moliaga mamafa e tasi o lona umia faasolitulafono o fualaau faasaina (o le meth). E $8,000 ua faatulaga e le fa’amasinoga e tatala ai o ia i tua.

E 2 moliaga tau solitulafono o loo tu’uaia ai Fenumia’i—1 le moliaga o le umia faasolitulafono o fualaau faasaina (meth) ma le 1 moliaga o le umia faasolitulafono o fualaau faasaina (meth) ma le faamoemoe e tufa atu. E $20,000 le tupe lea ua faatulaga e tatala ai o ia i tua.

O lo o tu’uaia Luatua i moliaga mamafa e tasi e pei ona tu’uaia ai Fenumia’i, ma o lo o taofia fo’i o ia i tua e $20,000.

TALA A FENUMIA’I

Pe tusa o le 8:35 p.m. i le aso 5 Iuni, na fa’ailoa ai e Fenumia’i i Leoleo lona mana’o e fai sana fa’amatalaga ma tali fesili.

E tusa ai ma le saunoaga a Fenumia’i o lo o taua i le tautinoga a le faamasinoga, sa faateia o ia ina ua aga’i atu le to’atele o leoleo i le latou fale a o saofa’i o ia i luma e fa’atali ai le ta’avale a lona tuagane o Tilei sa alu atu e aumai ni mea faufale mo ia e faaaoga mo se galuega faatino i le fale.

Na ta’u atu e le ua molia i leoleo e faapea, “sa ia lapataia le tuagane e ave ana fualaau faasaina i se isi mea ae aua nei aumaia i totonu o le latou fale a o iai lana fanau.”

Na taua e Fenumia’i e faapea, ina ua amata le tausaga e 2023, na faailoa atu ai e lona tuagane o Tilei o ia i lana uo teine o Falepau. Na taua mulimuli ane e Fenumia’i e fa’apea, pe tusa o le 3 vaiaso talu ai, sa ia fa’amamāina ai le latou itu o le latou fanua, ae ia va’aia ai se la’au mariuana i totonu o se ulo tele. Ona fesili lea o Fenumia’i ia Falepau “o ai e ana le la’au mariuana” ma na tali Falepau o ana laau.

Ona ta’ua lea e Fenumia’i e faapea, “na ia lapata’ia Falepau ina ia aveese lea laau mariuana mai lona nofoaga ae le’i iloa e se isi tagata”.

Na taua e le tamaitai i Leoleo e fa’apea, o le paipa tioata ma le ato laititi na maua i lona tino, o mea totino ia a le tuafafine o Falepau o Tu’upo. Na taua e Fenumia’i e fa’apea, na fesili Tu’upo ia te ia pe mafai ona ia taofi i ana mea a’o la o ma Tilei e fa’amae’a le latou galuega fa’afanua.

FAAMATALAGA LUATUA

O le aso 5 Iuni, i le itula e 10:08 i le po, na fa’ailoa ai fo’i e Luatua lona malamalama i ana aia tatau ma mana’o e fai sana fa’amatalaga ma tali fesili.

O lo o tu’uaia e Luatua i upu tautino e fa’apea, o Tilei ma lana uo teine o Falepau, o lo o fa’atau atu fualaau fa’asaina ma le mariuana, mai le fale o Tilei i Faga’alu.

Na taua e le ua molia i Leoleo e fa’apea, pe a ma le tausaga talu ona la mafuta ma Fenumia’i, ma e pei ona taua i le molimau a le fa’amasinoga, sa ia ioeina ai lona iloa o Tilei ma Falepau o lo o fa’atauina atu fualaau fa’asaina mai le fale o Tilei.

Ina ua fesiligia e Leoleo ia Luatua e uiga i le tama’i ato sa maua i totonu o le potu o Fenumia’i, na taua ai e Luatua i Leoleo e fa’apea, o ia o se tagata e ulaina le fualaau faasaina ma e na o le ulaula lava o ia pe a fai ana feau i le latou fale, aemaise o le galue ai i lana maumaga.

(O le a lipotia e le Samoa News isi tagata e toa 4 na tulai muamua i le faamasinoga i le vaiaso na tea nei i le Aso Tofi, Iuni 8 ina ua maua faamatalaga tauto a le faamasinoga mo faamatalaga moni o le mataupu.)