Samoa
This article was added by the user . TheWorldNews is not responsible for the content of the platform.

Toe fa’auau ona auai molimau a le malo iloiloga a le Maota o Sui

Pago Pago - AMERIKA SAMOA

O le a toe fo’i atu sui o le kapeneta, i fa’atonu sili, ae maise tagata faigaluega a le Vaega Fa’amalosi Tulafono e molimau i le taimi o iloiloga a le Maota o Sui, i le mae’a ai lea o le fa’aiuga o le fa’amalologa ina ua ma’ea se fonotaga fa’apitoa Fofoga Fetalai ia Savali Talavou Ale.

O le saunoga lea a le afioga i le kovana sili, Lemanu P.S Mauga i le fonotaga ma lana kapeneta i le taeao o le Aso Gafua i le American Samoa Community College Multipurpose Center.

Na fa’alauiloa i se fa’amatalaga tusitusia a le kovana ia Aperila 06 e faapea, o molimau uma a Faatonusili, Faauluuluga o Ofisa, ma tagata faigaluega a le Vaega Faamalosi Tulafono i luma o le Maota o Sui, ua taofia mo se taimi le tumau. 

Ma o i latou e maua ni fa’aaliga mai le Maota e tula’i mo se iloiloga, ua fa’atonuina e aua ne’i auai. O isi ta'iala ma fa'atonuga i le taimi e toe fa'aalia ai molimau o le a o'o mai pe a mana'omia.

I se pepa o fa’amatalaga mai le Ofisa o le Kovana i le po o le Aso Sa, o lo o taua ai i se vaega o le faamalolo le tumau e mafua ona o atugaluga ina ne’i ova nisi o laina o fesili i le tulaga o le mataupu o lo o suesueina i le taimi o iloiloga.

"O fesili e uiga i le tagata lava ia atonu e le talafeagai i lalo o tulafono a le malo ma le lotoifale ma tulafono faatonutonu," o se vaega lea o le pepa o fa’amatalaga. 

Na taua e le ali’i kovana i lana saunoaga i le fonotaga a le kapeneta e fa’apea, o le fa’amaumauga a le malo, o mataupu ia mo iloiloga a le maota, ona o atugaluga i fesili e le talafeagai ma mataupu e talanoaina i le taimi o iloiloga.

Saunoa Lemanu e fa’apea, ua mae’a ona la feiloa’i ma le Fofoga Fetalai mo le fa’atalatalanoaga o lenei mataupu ma o le fa’ai’uga o le a toe fo’i atu molimau a le faigamalo e molimau i iloiloga a le Maota o Sui i lenei vaiaso.

Fai mai a ia, ua maea ona talanoa le Fofoga Fetalai ma sui o le maota e uiga i iloiloga ma o le a toe amata i le vaiaso nei.

I le taufaofiaga a le Maota Maualuga i le Aso Gafua sa lagaina ai lenei mataupu, ae na saunoa le Peresitene o le Maota Maualuga ia Tuaolo Manaia Fruean mo le senate ina ia aga’i i luma ma ia fa’amanatu le aloaia o molimau a le malo. 

E talitonu le Samoa News, o le aso Gafua na talanoaina ai i luma o

le Maota o Sui  le fa’amanatu a le ali’i kovana, peita’i e le’i maua mai ni fa’amatalaga patino i le taimi na fa’asalalau ai. O le vaiaso nei o le a lipotia ai e le Samoa News.