Samoa
This article was added by the user . TheWorldNews is not responsible for the content of the platform.

Toe tofia Savali Talavou Ale, Fofoga Fetalai Maota o Sui

Pago Pago - AMERIKA SAMOA

O le Aso Gafua o le vaiaso lenei sa fa’atautoina ai faipule o le Maota o Sui, fa’atasi ai ma le filifilia o le Fofoga Fetalai mo le nofoaiga lona 38 a le Fono Faitulafono. 

I lea lava aso sa fa’atauto ai fo’i le senatoa fou o le Maota Maualuga, le Senate, mo le Tualatai. 

MAOTA O SUI

O se tasi o mataupu mo le Maota o Sui o le filifilia lea o le Fofoga Fetalai, ma i le fa’aiuga o le palota, ua toe tula’i mai ai le afioga ia Savali Talavou Ale, mai le Itumalo o Alataua mo le tofi ta’ita’i. 

Na autasi le palota mo Savali, o le faipule sili ona umi lana tautua i le Maota i tala faasolopito o le Fono, ma o sui uma e 19 mai le 20 sa auai, na palota e lagolagoina Savali e avea ma ta’ita’i o le maota.

E na’o le faipule e toesea i le asō o Alumamalu Filoali’i o lo’o malaga i fafo. 

E leai se isi sui tauva mo le nofoa o le Fofoga Fetalai. O le afioga i le faipule ia Fetu Fetui na tuuina atu le suafa o Savali mo le tofi ta’ita’i ae fa’aluaina e le afioga i le faipule ia Faimealelei Anthony Allen.

O le palota sa faatautaia lea e le Failautusi o le maota ia Vaiaitu Mulinuu Maluia lea na toe filifilia mulimuli ane i le palota autasi i lea lava tofiga. E na’o ia fo’i le sui filifilia, ma sa talosagaina e le sui o Ituau  Manumaua Wayne Wilson, fa’atasi ai ma Ituau fou faipule  Tautoloitua Sauasetoa Ho Ching na lagolagoina le filifiliga.

Mo le tofi o le Satini o le Maota o Sui, ua toe tofia ai Line Olo i le palota autasi ma e na o ia sa faia i ai le palota. 

Sa soso’o ai loa ma le faatautoina o sui uma e to’a 20 sa auai, e le afioga i le Faamasino ia Mamea Sala Jr.

O le afioga ia Savali, lea ua amatalia nei lana nofoaiga lona 20 i le maota o sui, sa ia fa’afetaia ai le fa’atuatuaga o afioga i Faipule ia te ia, ma ia talosagaina ai le latou felagolagoma’i ma le lagolagosua i le tauaofiaga fou.  Sa ia fa’afetaia fo’i ta’ito’alua, matua ma aiga sa molimauina le fa’atautoga. 

O le aso ananafi sa amatalia ai se a’oa’oga a faipule fou a’o le’i tauaofia le fono lona 38 i le Aso Gafua a sau.

O faipule fou, ina ua ma’ea le palota ia Novema o le tausaga ua te’a: Shaun Onosai Vaa, Malaeoletale Melesio Gurr, Tapai Alailepule Benjamin Vaivao, Tautoloitua Sauasetoa Ho Ching ma Fiu J. Saelua.

MAOTA MAUALUGA

I le Senate, i le te’a ai o le itula e 11 i le taeao na fa’atautoina ai le afioga ia Tuiasina Salamo Laumoli, o le senatoa fou mo le itumalo Tualatai. 

Saunoa le afioga i le Peresetene o le Senate ia Tuaolo Fruean e fa’apea, e 4 tausaga le nofoaiga a Senatoa ma sa latou tauaofia i lea aso e molimauina le fa’atautoina o Tuiasina.

Sa fesiligia e Tuaolo le loia fautua a le Senate ia Mitzie Jessop Ta’ase pe o i ai i totonu o le tulafono le fa’atautoina o le afioga i le ali’i senatoa fou a’o le’i oo i le itula e 12 i le aoauli. Tali mai Jessop-Taase i le “ioe”.

Na tofia e Tuaolo se komiti fa’apitoa e to’atolu e aofia ai le afioga i le ali’i senatoa ia Magalei Logovii, Malaepule Saite Moliga ma Satele Lili’o latou te iloiloina tusi faamaonia ma pepa fa’amaonia a Tuiasina.

Ina ua mavae le itiiti ifo ma le 10 minute, na toe lipoti atu le komiti i le potu ma logoina le Peresetene o le Senate i latou fa’aiuga e fa’amonia Tuiasina. Ma sa fulisia e afioga i senatoa lea lipoti ma fa’atautoina ai Tuiasina e le afioga i le Fa’amasino ia Mamea Sala Jr.