Samoa
This article was added by the user . TheWorldNews is not responsible for the content of the platform.

Tofiga faipule Vailoata Eteuati Amituana’i totino Komiti Fa’afoe o Femalagaaiga

Ads by Google Ads by Google

Pago Pago - AMERIKA SAMOA

O se tasi o mataupu fou, ua mae’a ona tu’uina atu e le Faigamalo mo le iloiloga ma le fa’amaoniaga o le Fono Faitulafono i le taimi e tauaofia ai le Fono Faitulafono ia Iulai mo le Fono Tele lona 2 a le Fono Faitulafono lona 38, o le tofiga lea e le afioga i le ali’i kovana ia Lemanu P.S. Mauga, o le afioga i le Faipule ia Vailoata Eteuati Amituana’i e avea ma totino o le Komiti Faafoe o Femalagaaiga (le Immigration Board).

E pei ona taua i le tusi a le alii kovana ia Aperila 27, na tuuina atu ai e le afioga i le ali’i peresetene o le Senate ia Tuaolo Manaia Fruean ma le afioga i le Fofoga Fetalai ia Savali Talavou, o le a mae’a le nofoaiga a le afioga i le ali’i faipule ia Vailoata i le komiti faafoe i le 2028.

O le afioga i le ali’i faipule ia Vailoata “ua ia te ia le silafia ma le malamalama i le matafaioi a le Komiti Fa’afoe o Femalagaaiga i le puipuia o tatou tuaoi ma le fa’asaoina o avanoa tau tamaoaiga mo tagata o Amerika Samoa,” o se vaega lea o le tusi a le ali’i kovana i ta’ita’i o Fono.

Na una’ia e le ali’i kovana le Senate ma le Maota o Sui mo le fa’amaoniaina atoa o le filifiliga a le afioga i le ali’i faipule ia Vailoata.

Na taua fo’i e Lemanu e fa’apea, o le sui faipule o Vailoata e suitulaga i le sui sa avea muamua ma faipule ia Vaetasi Tuumolimoli Moliga, lea na mae’a lana nofoaiga i le Komiti Fa’afoe ia Fepuari o le tausaga nei.

E pei ona lipotia muamua e le Samoa News, e na’o Vaetasi le faipule o le maota o sui mai le Fono Faitulafono lona 37 talu ai, e le’i toe sailia se avanoa e toe filifilia ai i le palota o le 2022.

O le afioga i le faipule ia Vailoata, lea ua tele tausaga o tautua i le maota, o lo o avea nei o ia ma Ta’ita’ifono o le Komiti o le Paketi ma le Tala o le Tupe a le maota, atoa ai ma le sui o isi komiti tumau e aofia ai le Komiti o Mataupu Tau Tulafono/Faamasinoga a le maota o sui.