Samoa
This article was added by the user . TheWorldNews is not responsible for the content of the platform.

Tumau fuafuaga faigamalo, fausia falema’i fou i Tafuna

Pago Pago - AMERIKA SAMOA

I le fonotaga a le kapineta i le vaiaso ua te’a sa fa’ailoa manino ai e le afioga i le Lutena Kovana ia Talauega Eleasalo Ale, fuafuaga a le malo, o le fa’avae o le falema’i fou o le a fa’ata’atia i le tausaga nei i le nofoaga tuai o atu-falega a le malo i Tafuna - e fa’afesaga’i ma le Lions Park. 

Sa fa’ailoa e Talauega i le kapineta le tele o mataupu o le a aofia i le saunoaga a le ali’i kovana i le tauaofiaga so’ofa’atasi a le Fono Faitulafono i le taeao nei, mo le tatala aloaia o le Nofoaiga Lona 38. 

“E tele mea e ave i ai le faamuamua a le alii kovana ma le faigamalo o le a sili atu ona manino ma taula’i i ai a o tuuina atu e le alii kovana lana ripoti” i e Fono Faitulafono, o se vaega lea o le saunoaga a Talauega i le kapineta. “Ae o lo’o i ai nai mea ua uma ona ta’ua o mea e ave iai le fa’amuamua.”

“E tatau ona fausia le falema’i fou pe o lo’o fa’agasolo fo’i le fausiaina i le isi 2 tausaga, e leai lava se isi auala e ta’u atu ai,” o a Taulauega lea. 

“E tofu i tatou uma ma isi mea tatou te popole ai. Ma o nisi o loo nonofo pea i le nofoaga o le a fausia ai le falemai, ma le faamoemoe o se vavega o le a sau ai se tasi mai le lagi ma faatagaina oe e te nofo ai; fa’amolemole aua ne’i fa’amoemoe lena mea,” o le saunoaga lea a Talauega.

“O tagata uma o loʻo i ai i lenei nofoaga - e tatau ona e alu ese. O le faamuamua lea. Ua tatau ona fausia le falema’i,” o le tala lea a Talauega. 

O le fa’aiuga o le tausaga na te’a nei na fa’amaonia mai ai e le Pule Sili a le falema’i o le LBJ ia Moefa’auo Bill Emmsley i le Samoa News le fausia o le falema’i fou e 40 moega o le a fausia i se vaega e fa’afeagai ma le Lions Park ae o lo o taofia ona o fe’ese’eseaiga i le lisi o lea nofoaga.

O le i ai o lea lisi na fa’amaonia mai e le loia a le kamupani a le NighHawk, Marcellus Talalelei Uiagalelei, e fa’apea, o lo o i ai le lisi o le fanua o lo o fesiligia, ma ta’ua ai, sa sainia e le kovana sa i ai muamua ia Lolo Matalasi Moliga.

E talitonu le Samoa News, o le fanua o lo o fesiligia nei, na tuuina atu i le NightHawk Company e sui ai le lisi o lo o i ai nei a le kamupani o le Country Club i Ili’ili, lea o lo o fausia i le taimi nei.

I le fonotaga a le Kapeneta na taua ai e Talauega e o’o mai i le vaiaso na te’a nei o lo o galulue pea i latou e “taumafai” e po’o fea o le a fausia ai le falema’i.

O le fesili tula’i mai i le faigamalo, po’o fea tonu o Lions Park e fausia ai le falema’i fou. Ma sa fa’amanino e Talauega i le kapineta le tumau pea o fuafuaga ale faigamalo e fausia le falema’i fou i Tafuna, ma e leai se isi suiga. 

“Ma ose fa'amuamua e feso'ota'i ma le fa'amuamua tele a le malo ma o le soifua maloloina. E mana'omia le fa'aleleia atili o le tausiga fa'alesoifua maloloina ma le agava'a o tatou tagata e maua ai le tausiga lelei ma le malosi,” o se saunoaga lea a Talauega i le kapinet. “Faamolemole ia tatou galulue faatasi ina ia mautinoa ua fausia le falemai [atonu] amata fausia i lenei tausaga.”