Views: 13
ដោយៈ បូកគោ / កំពត: ដោយមានការយកចិត្តទុកដាក់ ពីក្រសួងជំនាញ និងថ្នាក់ដឹកនាំ ខេត្តកំពត ស្រុកទឹកឈូ បានទទួលគម្រោងស្ថាបនាផ្លូវបេតុង និងផ្លូវកៅស៊ូ ប្រភេទ ឌីប៊ីអេសធី ពីរខ្សែ ដែលជាសរសៃឈាមសេដ្ឋកិច្ចដ៏សំខាន់ សម្រាប់ប្រជាពលរដ្ឋទូទៅ។
លោក អ៊ឹម ច័ន្ទសោធន អភិបាលស្រុកទឹកឈូ បានប្រាប់ឲ្យដឹងថាៈ ផ្លូវសរសៃរឈាម សេដ្ឋកិច្ច ពីរខ្សែ របស់ស្រុកទឹកឈូ បាននិងកំពុងសាងសង់ ក្រោយទទួលបានគម្រោងពី ក្រសួងជំនាញ និងរដ្ឋបាលខេត្តកំពត។ ផ្លូវទីមួយ គឺផ្លូវលេខ១៣៩ បែកចេញពីផ្លូវជាតិលេខ៣៣ ត្រង់មុខសាលាស្រុកទឹកឈូ ភ្ជាប់ជាមួយផ្លូវជាតិលេខ៣ ត្រង់ចំណុចខ្លោងទ្វារ វត្តកំពូលមាស។
លោកអភិបាលស្រុកបានបញ្ជាក់ថាៈ ផ្លូវមួយខ្សែនេះ ក៏នឹងអាចនាំភ្ញៀវ ធ្វើដំណើរឆ្ពោះ ទៅតំបន់រមណីយដ្ឋាន ភ្នំឈ្ងោក និងភ្នំសេដាឱនផងដែរ។ ចំណែកខ្សែទីពីរ គឺផ្លូវលេខ ១៣៣១ បែកចេញពីសាលាស្រុកទឹកឈូ ទៅតំបន់រមណីយដ្ឋាន កសិ-ទេសចរណ៍ ទំបន់ប្រទាក់ក្រឡា រមណីយដ្ឋានចម្ការម្រេច ជាដើម។
លោក ហ៊័រ សូរិន ប្រធានមន្ទីរអភិវឌ្ឍន៍ជនបទ ខេត្តកំពត បានបញ្ជាក់ថាៈ ផ្លូវទាំង ពីរខ្សែនោះ ស្ថិតក្នុងដំណាក់កាល កំពុងស្ថាបនា ប៉ុន្តែដោយសារអាកាសធាតុ មិនអំណោយផល ទើបត្រូវបានផ្អាកសកម្មភាព មួយរយៈសិន ។ ក្រុមការងារ នឹងសម្រុកធ្វើនៅពេលផុតរដូវភ្លៀង ដោយលៃយ៉ាងណា ឲ្យបានរួចរាល់មុនផែនការកំណត់។
លោកប្រធានមន្ទីរ បានបញ្ជាក់ថាៈ ផ្លូវលេខ១៣៣១ មានប្រវែង ៦.៥០០ ម៉ែត្រ។ ចំណែកផ្លូវលេខ១៣៩ ប្រវែង ១១.៥០០ ម៉ែត្រ៕ V / N