តំណាងពលរដ្ឋមានជម្លោះដីធ្លីម្នាក់ បានស្នើទៅសាលាឧទ្ធរណ៍ព្រះសីហនុ ផ្តល់យុត្តិធម៌ ដោយទម្លាក់ចោលបទចោទប្រកាន់ប្រឆាំងខ្លួន ក្រោយចាញ់ក្តីឧកញ៉ាមួយរូបនៅសាលាដំបូងខេត្តកោះកុង។
កាលពីថ្ងៃទី១៤ ខែកញ្ញា ឆ្នាំ២០២២ ព្រះរាជអាជ្ញានៃមហាអយ្យការអមសាលាឧទ្ធរណ៍ព្រះសីហនុ លោក ខៀវ ផល្លា បានចេញដីកាកោះហៅតំណាងពលរដ្ឋមានជម្លោះដីធ្លីម្នាក់ គឺអ្នកស្រី ដេត ហួរ រស់នៅសហគមន៍១៩៧ ក្នុងឃុំជីខលើ ស្រុកស្រែអំបិល ខេត្តកោះកុង ឱ្យចូលសវនាការនៅថ្ងៃទី៤ ខែតុលានេះ។
បើតាមដីកានេះ អ្នកស្រី ដេត ហួរ ត្រូវបានចោទពីបទ «បរិហារបង្កាច់កេរ្តិ៍ និងបរិហារកេរ្តិ៍ជាសាធារណៈ» តាមមាត្រា៣១១ មាត្រា៣១២ និងមាត្រា៣០៥ នៃក្រមព្រហ្មទណ្ឌ ទៅតាមបណ្តឹងរបស់លោកឧកញ៉ា ហេង ហ៊ុយ ដែលជាគូវិវាទរឿងជម្លោះដីធ្លី។
តំណាងប្រជាពលរដ្ឋ អ្នកស្រី ដេត ហួរ ប្រាប់ វីអូឌី ថា នៅក្នុងសវនាការនាព្រឹកមិញនេះ តុលាការបានចោទសួរអ្នកស្រីជុំវិញរឿងដែលអ្នកស្រីបានផុសលើហ្វេសប៊ុក ដោយថា លោក ហេង ហ៊ុយ បានប្លន់ដីប្រជាពលរដ្ឋចំនួន ១៩៧គ្រួសារ នៅឃុំជីខលើ និងគោលបំណងនៃការផុសនេះផងដែរ។
អ្នកស្រី ដេត ហួរ ឱ្យដឹងថា តុលាការបាននិយាយទៅអ្នកស្រីថា ពាក្យសម្តីដែលអ្នកស្រីផុសនោះ គឺខុសច្បាប់ ធ្វើឱ្យខូចឈ្មោះ ឬកិត្តិយសរបស់លោក ហេង ហ៊ុយ ប៉ុន្តែអ្នកស្រីបានឆ្លើយតបទៅកាន់តុលាការវិញថា អ្វីដែលអ្នកស្រីបានផុសនោះ គឺមានគោលបំណងចង់ឱ្យថ្នាក់ដឹកនាំបានដឹង និងជួយដោះស្រាយជម្លោះដីធ្លីនេះជូនពលរដ្ឋ ដោយសារក្រុមហ៊ុនរបស់លោក ហេង ហ៊ុយ បានរំលោភយកដីធ្លីរបស់ពលរដ្ឋពិតប្រាកដមែន។
តំណាងពលរដ្ឋរូបនេះ បន្តថា តុលាការបានសួរសំនួរជាច្រើនទៀតទៅកាន់អ្នកស្រី ហើយនៅក្នុងសវនាការនោះ អ្នកស្រីបានស្នើដល់តុលាការ ឱ្យទម្លាក់បទចោទប្រកាន់លើអ្នកស្រី និងជួយដោះស្រាយបញ្ចប់ជម្លោះដីធ្លីជូនពលរដ្ឋទាំង ១៩៧គ្រួសារផងដែរ។
អ្នកស្រី ដេត ហួរ បន្ថែមថា៖ «តុលាការគាត់សួរខ្ញុំថា យើងផុសនេះគោលបំណងយើងចង់បានដី ប៉ុន្តែរឿងនេះមិនមែនរឿងដីទេ ជារឿងខុសច្បាប់ ដែលយើងផុសចោទថា គេបានប្លន់ដីអីចឹង។ តែខ្ញុំឆ្លើយថា ខ្ញុំមិនយល់ពីច្បាប់អីទេ។ ខ្ញុំគ្រាន់តែដឹងថា លោក ហេង ហ៊ុយ បានរំលោភយកដីខ្ញុំពិតប្រាកដមែន ហើយខ្ញុំគ្រាន់តែផុសសម្តែងមតិតាមបណ្តាញសង្គមជាសាធារណៈ ដើម្បីចង់បានដំណោះស្រាយដីធ្លីតែប៉ុណ្ណោះ។ ខ្ញុំគ្មានគោលបំណងធ្វើឱ្យខូចឈ្មោះ ឬកិត្តិយសអ្នកណានោះទេ»។
វីអូឌី មិនអាចសុំការឆ្លើយតបពីព្រះរាជអាជ្ញានៃមហាអយ្យការអមសាលាឧទ្ទរណ៍ព្រះសីហនុ លោក ខៀវ ផល្លា បានទេ នៅថ្ងៃអង្គារនេះ។ ប៉ុន្តែបើតាមអ្នកស្រី ដេត ហួរ សាលាឧទ្ធរណ៍ព្រះសីហនុ នឹងប្រកាសសាលដីកាសំណុំរឿងនេះ នៅថ្ងៃទី២៥ ខែតុលា ឆ្នាំ២០២២។
គួរបញ្ជាក់ថា អំឡុងពេលតុលាការបើកសវនាការលើសំណុំរឿងអ្នកស្រី ដេត ហួរ នៅព្រឹកថ្ងៃអង្គារនេះ ក៏មានប្រជាពលរដ្ឋមានវិវាទដីធ្លីជាង ៣០០នាក់ មកពីសហគមន៍ចំនួន៧ នៃស្រុកស្រែអំបិល ស្រុកបូទុមសាគរ និងស្រុកថ្មបាំង ខេត្តកោះកុង បានប្រមូលផ្តុំគ្នានៅមុខសាលាឧទ្ធរណ៍ព្រះសីហនុនេះផងដែរ ដើម្បីគាំទ្រ និងលើកទឹកចិត្តអ្នកស្រី ដេត ហួរ ហើយទាមទារទៅតុលាការឱ្យទម្លាក់ចោលការចោទប្រកាន់ និងកាត់ក្តីដោយឈរលើគោលការណ៍យុត្តិធម៌ផងដែរ។
តំណាងពលរដ្ឋសហគមន៍១៧៥ នៅឃុំជីខក្រោមស្រុកស្រែអំបិល អ្នកស្រី ផាវ ញ៉ើង ដែលចូលរួមប្រមូលផ្តុំមុខសាលាឧទ្ធរណ៍ព្រះសីហនុ នៅព្រឹកនេះ បាននិយាយថា ការដែលពលរដ្ឋទៅគាំទ្រអ្នកស្រី ដេត ហួរ ដោយយល់ឃើញថា ការកាត់ក្តីរបស់សាលាដំបូងខេត្តកោះកុង មិនបានផ្តល់យុត្តិធម៌សម្រាប់អ្នកស្រី ដេត ហួរ ឡើយ។ អ្នកស្រីចង់ឃើញតុលាការជាន់ខ្ពស់នៅខេត្តព្រះសីហនុ ផ្តល់យុត្តិធម៌ជូនអ្នកស្រី ដេត ហួរ ឡើងវិញ។
តំណាងពលរដ្ឋរូបនេះ បន្តថា លោកឧកញ៉ា ហេង ហ៊ុយ ជាបុគ្គលមានលុយមានអំណាចម្នាក់ បានរំលោភយកដីធ្លីពលរដ្ឋជាច្រើនករណី និងបានប្តឹងតំណាងពលរដ្ឋជាច្រើននាក់ទៅតុលាការផងដែរ ក្រោយពួកគេតវ៉ាទាមទារយកដីធ្លីមកវិញ។
អ្នកស្រី ផាវ ញ៉ើង បន្តថា អ្នកស្រីក៏កំពុងជាប់បណ្តឹងនៅតុលាការ ក្រោយមានជម្លោះដីធ្លីជាមួយលោកឧកញ៉ា ហេង ហ៊ុយ ផងដែរ។
អ្នកស្រី ផាវ ញ៉ើង បន្ថែមថា៖ «មិនថា តែលោក ហេង ហ៊ុយ នោះទេ ជនណាក៏ដោយឱ្យតែបុគ្គលនោះ ជាអ្នកមានលុយមានអំណាចមានបក្សពួកជាមន្ត្រីអាជ្ញាធរ មានសាច់ញាតិជាអាជ្ញាធរ គឺតុលាការខេត្តកោះកុង មិនដែលចាត់ការលើបណ្តឹងពួកយើងជាពលរដ្ឋរងគ្រោះដីធ្លីទេ ប៉ុន្តែចាត់ការលឿន បើពួកទាំងនោះប្តឹងមកលើពួកយើងជាជនរងគ្រោះ។ អីចឹងហើយយើងសង្ឃឹមថា តុលាការសាលាឧទ្ធរណ៍ព្រះសីហនុនេះ នឹងផ្តល់យុត្តិធម៌ជូនប្អូនស្រី ដេត ហួរ»។
តំណាងពលរដ្ឋសហគមន៍៨៤៣ នៅឃុំកណ្តោល ស្រុកបូទុមសាគរ លោក ឈឹម សាផាន មានប្រសាសន៍ថា លោកមកគាំទ្រអ្នកស្រី ដេត ហួរ ដោយសារលោកមើលឃើញថា អ្នកស្រី ដេត ហួរ និងពលរដ្ឋកោះកុងផ្សេងទៀត កំពុងរងភាពអយុត្តិធម៌ក្រោមជម្លោះដីធ្លីនេះ។
លោក ឈឹម សាផាន ឱ្យដឹងថា ពលរដ្ឋនៅខេត្តកោះកុងរាប់រយគ្រួសារ កំពុងបាត់បង់ដីធ្លីដោយសារអ្នកមានលុយមានអំណាច រំលោភយកអស់ដោយមិនបានដោះស្រាយសំណង និងត្រូវបានអាជ្ញាធរប្តឹងតំណាងពលរដ្ឋទៅតុលាការ ក្រោយដើរតវ៉ាទាមទារដីធ្លីរបស់ខ្លួន។ លោកថា សហគមន៍របស់លោកមានតំណាងពលរដ្ឋ៩នាក់ កំពុងជាប់បណ្តឹងនៅតុលាការ ក្រោយដើរតវ៉ាទាមទារដំណោះស្រាយដីធ្លីជាមួយក្រុមហ៊ុនរបស់លោកឧកញ៉ា លី យ៉ុងផាត់ សមាជិកព្រឹទ្ធសភាមកពីគណបក្សប្រជាជនកម្ពុជា។
លោក ឈឹម សាផាន បន្ថែមថា៖ «ខ្ញុំឃើញភាពអយុត្តិធម៌ច្រើនណាស់នៅខេត្តកោះកុង។ អ្នកមានលុយមានអំណាចបានយកដីប្រជាពលរដ្ឋហើយប្តឹងពលរដ្ឋទៅតុលាការថែមទៀត វាអយុត្តិធម៌បំផុត។ ខ្ញុំមើលឃើញត្រង់ចំណុចហ្នឹងហើយ បានជាយើងមកគាំទ្រអ្នកស្រី ដេត ហួរ ដើម្បីគាំទ្រគ្នាទៅវិញទៅមកដើម្បីលើកទឹកចិត្ត។ ហើយមួយទៀតយើងឃ្លាំមើលថាតើ តុលាការខេត្តព្រះសីហនុនេះ កាត់ក្តីដោយឯករាជឬក្រោមបញ្ជាអ្នកណាមួយ?»។
មន្ត្រីសម្របសម្រួលសហគមន៍ នៅ សមាគមសម្ព័ន្ធសហគមន៍កសិករកម្ពុជា លោក ញ៉ិល ភាព ដែលឃ្លាំមើលរឿងនេះមានប្រសាសន៍ថា ករណីតុលាការខេត្តកោះកុង សម្រេចឱ្យអ្នកស្រី ដេត ហួរ ចាញ់ក្តីលោកឧកញ៉ា ហេង ហ៊ុយ ជារឿងមិនត្រឹមត្រូវ និងមានភាពលម្អៀងទៅខាងលោក ហេង ហ៊ុយ។
លោក ញ៉ិល ភាព បន្តថា ដើមចមដែលធ្វើឱ្យកើតមានជម្លោះរវាងអ្នកស្រី ដេត ហួរ និងឧកញ៉ា ហេង ហ៊ុយ គឺពាក់ព័ន្ធរឿងជម្លោះដីធ្លី ហើយតុលាការខេត្តកោះកុង កាត់ក្តីដោយមិនបានចុះសិក្សាស្រាវជ្រាវឱ្យបានច្បាស់លាស់ ដោយមានការចូលរួមពីគ្រប់ភាគីពាក់ព័ន្ធជុំវិញរឿងនេះឡើយ។
លោក ញ៉ិល ភាព បន្ថែមថា៖ «អីចឹង មុននឹងជំនុំជម្រះប្រកបដោយតម្លាភាព យុត្តិធម៌ និងស្មើភាពគ្នាចំពោះមុខច្បាប់ ត្រូវតែស៊ើបអង្កេតថា តើវាមានបញ្ហាដីធ្លីពិតប្រាកដឬអត់? មានការរំលោភហ្នឹងពិតប្រាកដអត់? អត់អាចចោទប្រកាន់ ហើយមកចេញសាលក្រមចោទប្រកាន់មកផ្តន្ទាទោសអីចឹងបានទេ។ មិនមែនអាងខ្លួនជាតុលាការចេះតែធ្វើៗ កាត់ក្តីដោយមានភាពលម្អៀងទៅរកអ្នកមានអំណាច ទៅរកអ្នកមានឥទ្ធិពលអ្នកនៅក្នុងជួររដ្ឋាភិបាលបានទេ»។
បើតាមលោក ញ៉ិល ភាព គឺកន្លងមករដ្ឋាភិបាល ឬអាជ្ញាធរ និងអ្នកមានលុយមានអំណាច តែងតែប្រើប្រាស់ប្រព័ន្ធតុលាការប្តឹងប្រឆាំងពលរដ្ឋតវ៉ាដីធ្លី និងសកម្មជនផ្សេងៗទៀត ដែលលោកថា ករណីនេះបានរំលោភសិទ្ធិធ្ងន់ធ្ងររបស់ប្រជាពលរដ្ឋ។
កាលពីថ្ងៃទី២០ ខែកក្កដា ឆ្នាំ២០២២ សាលាដំបូងខេត្តកោះកុង បានសម្រេចឱ្យអ្នកស្រី ដេត ហួរ តំណាងពលរដ្ឋសហគមន៍១៩៧ នៅភូមិតានី ឃុំជីខលើ ស្រុកស្រែអំបិល ចាញ់ក្តីឧកញ៉ា ហេង ហ៊ុយ ដោយផ្ដន្ទាទោសអ្នកស្រីឱ្យជាប់ពន្ធនាគាររយៈពេល១ឆ្នាំ និងពិន័យជាប្រាក់ចំនួន២លានរៀល ប៉ុន្តែពុំមានការឃុំខ្លួននោះទេ។
វីអូឌី មិនអាចសុំការបញ្ជាក់ពីលោកឧកញ៉ា ហេង ហ៊ុយ បានទេជុំវិញរឿងនេះ។ ប៉ុន្តែលោកធ្លាប់ប្រាប់ វីអូឌី កាលពីអំឡុងឆ្នាំ២០២១ ថាក្រុមហ៊ុនរបស់លោកមិនបានរំលោភយកដីរបស់ពលរដ្ឋនោះទេ ហើយលោកក៏មានប័ណ្ណកម្មសិទ្ធិត្រឹមត្រូវតាមផ្លូវច្បាប់លើដីនោះដែរ៕