Pago Pago - AMERIKA SAMOA
Sa fa’alauiloaina atu e le Peresetene o le Senate, le afioga Tuaolo Manaia Fruean i luma o afioga Senatoa, i le taeao o le Aso Faraile ua tuanai e faapea, e pe a ma le $36 miliona mai i le tausaga tupe o le 2023, ua fa’aaogaina e le faigamalo, e aunoa ma se faatagaga, pe pasia atu foi, e sui faitulafono o le Maota Fono.
Na aofia faatasi afioga Faipule i totonu o le Maota o le Senate i lea lava taeao, aua se iloiloga aufaatasi a le Komiti o Tupe Faasoasao a le malo, aua le toe soalaupuleina o le paketi fuafuaina a le LBJ, mo le tausaga tupe o le 2024.
Ma o lea, i le faaiuga o le iloiloga a le komiti, na malilie uma ai sui faitulafono na auai, ina ia toe faase’e i tua le latou faaiuga na fai, ina ia toe pasia le paketi o le kuata muamua mai i le tausaga tupe o le 2023, ae o le a pasia se paketi e $85 miliona mo le LBJ, o le aofaiga lea sa i totonu o le uluai pili lea na faaulu mai e le faigamalo.
Na ioe uma sui faitulafono sa auai i lea taeao, e mafai ona toe faaulu mai a le LBJ ia seisi pili mo se tupe faaopoopo, i seisi taimi i luma atu.
I le mae’a ai o le iloiloga aufaatasi, sa talosagaina e le afioga Tuaolo ia Senatoa sa auai, ina ia faamuli mai mo sa latou fonotaga faatopetope ae e le i amataina tauaofiaga masani a le Maota, i lea taeao.
Sa saunoa le perestene o le Senate, o le aso Tofi o le vaiaso ua mavae, na o latou feiloai ai ma le Fofoga Fetalai, le afioga Savali Talavou Ale, faapea le afioga i le Kovana Sili ia Lemanu P.S. Mauga, ma sa fa’ailoa atu e le kovana ni mataupu taua ia te ia.
Ma e tusa ai ma ala o le tulafono a le Maota Fono, o a lava ni mataupu taua e faaalia mai e le kovana i taitai o le Maota Fono, e tatau ona faalauiloa atu i sui faitulafono uma ina ia mafai ona soalaupuleina i taimi o tauaofiaga a Maota e lua.
O le mataupu muamua, o le pili mo se paketi faaopoopo, lea sa faauluina i le vaiaso i ona tua atu, e le faigamalo, mo le $36 miliona, o tupe faaopoopo na maua mai i le tausaga tupe e 2023. Ae o lenei tupe, lea ua finagalo le kovana e pasia, ua mae’a ona fa’aaogaina. Ae o lo o faatali nei taitai o le Maota Fono i le tala o le tupe, e iloa ai pe na faapefea ona fa’aaogaina lenei tupe.
Sa ta’ua foi e Tuaolo e lua ni pili o lo o fuafua e faaulu mai i le Maota Fono i le Aso Gafua na se’i mavae atu nei.
Ina ua tapunia tusi o le tausaga tupe o le 2022, na iai se tupe faasili e $22 miliona. Ma o le pili mo tupe faaopoopo o le tausaga tupe o le 2024, o le a fa’aaoga mai ai le $22 miliona lea.
Na fa’aalia e Tuaolo i luma o afioga Senatoa le atugalu o lona loto i lenei mataupu, ona o lo o a’afia ai tupe a le malo. Ma sa le i lelei sana malologa i po, ona o lenei mataupu. Ma na ia ta’ua e faapea, o le mafuaaga ua ia faamatalaina ai lenei mataupu, ina ia mafai ona nofo malamalama uma Senatoa, e uiga i le pili sa faaulu mai i le Aso Gafua.
O le mataupu lona lua sa talanoaina e le Kovana ma taitai o le Maota Fono, o le sauniga mo le faapaiaina o le fanua i Moata’a i Samoa, lea o le a faatu ai le ofisa o le Konesula a Amerika Samoa. O lea fanua e tu lata i le mea o iai le faletalimalo a le Taumeasina. O lenei polokalama ua fuafua e faia i le Aso Lua pe a mavae le Lotu Tamaiti.
O le mataupu lona tolu sa talanoaina, o le faataunuiuna o fonotaga i le va o Samoa e lua, lea o le a faataunuuina i le vaiaso lava lea o le a faapaiaina ai le laufanua i Apia mo le ofisa a le konesula a Amerika Samoa. Ma o le a faataunuuina ia fonotaga i le motu tele i Salafai.
Sa fai sina umi o sa o le maota o le Senate ina ua mae’a le saunoaga a le afioga Tuaolo.
Na fa’aalia e le afioga Senatoa Malaepule Saite Moliga lona popole tele i le le uia e le faigamalo a Lemanu ia ala o le tulafono, i le fa’aaogaina o nei tupe tetele. Sa fa’aalia e le afioga i le Senatoa mai Manu’a lona faanoanoa tele e tusa ai ma lenei mea ua tulai mai ma i sana taga’i iai, ua soli e le faigamalo le tulafono e ala i lo latou le tapaina o se finagalo po o se faatagana mai i le Maota Fono, e fa’aaoga ai nei tupe.
Na saunoa Malaepule, o le mea foi lea sa iloa atu i le Tausitupe a le malo, le susuga Malemo Tausaga, ina ua o’o mai i luma o le latou Komiti, lea na pei o se mea noa lona saunoa mai, ua maea ona fa’aaoga se vaega o le $17 miliona lea sa i totonu o le pili mo tupe faaopoopo, i le tausaga tupe o le 2023.
Sa faamatalaina foi e Malaepule ia le o’o atu o le malo i Manu’a ma sua fanua o tagata, e aunoa ma se faatagana mai i aiga e ana nei fanua. Ae o lo o fai mai le malo, e manaoia ona sua nei fanua, ona o polokalama faatupeina e le malo feterale, e fau ai fale e sulufai ai tagata i taimi o afa ma faalavelave faafuasei faalenatura.
Na fa’aalia foi e le afioga Senatoa Togiola T. A. Tulafono sona popolega i le faatinoina e le faigamalo o lo o tulaii mai, o a latou tiute ma sa ia faapea mai, e le o se mataupu faigofie lenei mataupu. Na saunoa Togiola, sa iai sona talitonuga, e sologa lelei mea uma i totonu o se malo pe a galulue faatasi ia le faigamalo ma le Fono. Ma o le mafuaaga lea o le iai o se Faavae, lea o lo o ma’oti mai ai le tutusa o malosiaga o lala e tolu o le malo. Ina ia aua ne’i sili atu le malosiaga o leis ilala, i lo leisi. Na saunoa Togiola, o lo o ta’ua i totonu o le Faavae, e ao ona uluai pasia ma faatulaga mai e le Fono Faitulafono ia tupe ma le auala e fa’aaoga ai.
Ma sa u’unaia e Togiola ia le Fono ina ia suesue ma saili po o fea, ae na faapefea foi ona tulai mai lenei faafitauli, ma ia saili se auala e aua ai ne’I toe tupu mai lenei faafitauli. Aua afai e le taofia, o le a faapena foi le mea e fai e isi faigamalo e tulai mai i le lumanai.
Na saunoa Togiola, o le mea e faanoanoa ai tele lona tagata e uiga i lenei mataupu, ona o lea e tauivi le mamalu lutele ma le taugata o le soifuaga, ae o lea e faalogo atu o lo o ta’a’alo isi i tupe a le malo.
Sa toe saunoa le afioga Tuaolo, o le mafuaaga lea ua ia fa’asoaina atu ai lenei mataupu, ona o le $36 miliona, e le o se tupe laititi. Ma o lo o aofia i totonu o lea fuainumera ia le $1.5 miliona lea na fa’aaoga e faatau ai le va’a ale malo lea na faatau mai i se alii faipisinisi.
Na saunoa Tuaolo, o lo o manino, ua iai tulafono ua solia ma e tatau ona faasala ai se tagata.
FAAOPOOPOGA
E tusa ai ma suesuega a le Samoa News, ua tolu nei paketi faaopoopo o lo o talanoaina, o le $17miliona lea sa iloiloina i le Aso Tofi, Setema 21; ma tupe faaopoopo e lua lea na ta’ua e Tuaolo i le Aso Faraile, Setema 22 – o le $22 miliona mai i le tausaga tupe 2022 ma le $36 miliona mai i le tausaga tupe 2023.
I le Aso Tofi, na saunoa ai Malemo, o le $17 miliona ua mae’a ona fa’aaoga e le malo. Ae o le Aso Faraile lea sa ta’ua ai e Tuaolo; o le $36 miliona ua uma ona fa’aaoga e le malo. AE o le $22 miliona, e le o ma’oti mai pe ua mae’a foi ona fa’aaoga lea tupe.
O lo o faatalitali nei sui faitulafono mo le tala o le tupe, i le fa’aaogaina o nei tupe.