Pago Pago - AMERIKA SAMOA
O le maketi i Fagatogo o lo’o fa’atautaia ai fefaataua’iga o oloa gaosi alofilima a tina matutua fa’atasi ai ma isi uma faleoloa o lo’o ua fa’atautaia mai ai, ma faifa’ato’aga o le atunuu e fefa’ataua’i ai fua o latou fa’aeleeleaga. Peta’i ua mae’a tatala uma isi faleoloa, falea’iga ma pisinisi, e oo i le lala o le ASTCA e le’i tapunia mai lavai le vaitau o le Covid-19, ae tapunia pea lava faleoloa o nai tina matutua, Tuugalaupua Mary Otemai mai Pago Pago ma le tamaitai o le alo o Fa’asuka Lutu mai Fagatogo ma isi uma tina matutua o lo’o faia latou faleoloa nei i le maketi.
O le faafesili a nai tina, “Aisea ua fa’aese ai e le Malo le faiga o matou, ae le o ni pisinisi e tele fo’i ni tupe e maua mai ai, e fesoasoani i totogi o pili masani a le aiga?”
O le taumafaiga e talanoa i le sui fa’atonu o le Matagaluega o Fa’ato’aga ma le Pulega fo’i o le Maketi e le talia telefoni. O le aso Lua ina ua le maua se tali mai o le sui fa’atonu o le Matagaluega o Fa’ato’aga fa’apea ma le Pulega fo’i o le Maketi, sa oo ai loa le tusitala i le Maketi e fia va’ai pe moni fa’amatalaga ma fa’asea ua fa’auia mai.
O le Pulega o le Maketi o lo’o fa’ata’ali’oli’o i le ogatotonu o le Maketi, o lo’o faia le latou ava o le taeao. O lona uiga o le afuaga lea o le mae’a lelei o le tupe i le telefoni feavea’i a le tusitala, ae le talia le telefoni.
O lo’o ua fa’amaonia i ata, o lo’o tapunia pea le vasega o pisinisi laiti mo fefa’ataua’iga o galuega taulima Samoa a nai tina, ae ua tatala uma lava isi pisinisi o lo’o ua mae’a fa’atula’ia i le maketi e oo i fale’aiga e lua sa tapunia, ua tatala. Ina ua fesiligia fale’aiga ia ae fa’ailoa mai, “Sa amata tatala mai matou i le aso Gafua, ina ua maua le fa’aaliga o le a fo’i le fa’atautaiga o galuega uma a le Malo i le mea sa masani ai ae le’ioso le Covid-19 i le atunuu.
O se tasi o le aufaigaluega a le Maketi sa leoina le pito i tua o le Maketi sa fesiligia pe aisea ua le tatalaina ai fefa’ataua’iga a nai tina matutua o lo’o faia latou faleoloa o galuega taulima Samoa? O le tali na fa’ailoa mai e leai sui, ae le fia tuuina mai lona suafa, “Ua fai le matou fono ae fa’ailoa mai, e tatau na o tina matutua na e fai ni latou tusi talosaga i le Komiti Fa’afoe o le Covid-19 e tatala ai latou maketi na, a leai e le tatalaina lava i latou.”
Ua ogaoga tele lea tali ma ua toe sailia le tonu i le susuga le Sui Fa’atonu, peita’i e mae’a ona talanoa atu i le sui talitelefoni a le Matagaluega o Fa’ato’aga, ona fai mai lea e fa’atali, ae le taitai ona talia mai le telefoni a le sui fa’atonu. Uma lelei le tupe i le telefoni a le tusitala, e le o talia lava le telefoni, ua faalua ai taimi o faia pea lea tulaga.
O fa’asea a tina matutua nei, ua fa’aoo mai e fa’asaga i le pulega o le Maketi ma le Matagaluega, aua ua matauina e i latou e i ai le Saina o Simi Su lea e fa’aigoa ai, o lo’o ia fa’aaogaina le potu o pisinisi a le Manino Salamo e faia ai ana fefa’ataua’iga i le leva o le po, tusa lava pe o fa’amalosia lea fa’asa o le Covid-19, ae tatala lava mo le mamalu lautele, ma e i ai taimi ua va’aia ai e i latou ua tautuaina ai ma telefoni a le vasega o Leoleo, ma e foliga mai e le tapunia e leoleo le pisinisi a le Saina lea.
Ua fa’ailoa mai e tina, “Sa matou fa’ata’ita’ia ona o i ai ma matou fanau e ave i ai matou telefoni, e taugata tele le tupe e totogi e toe aumai ai telefoni. Peita’i ua fa’ailoa mai e Simi Su, o ia e i ai lona faleoloa i Vaitogi, ma le isi ona faleoloa i le CBT Hardware, ae a oo ina totogi ona tatala lea e ia le Ofisa Totogi Pasese lea i le Maketi e fai mai ai ana pisinisi ma lenei itu o le atunuu.”
“Ua foliga mai e ese le igoa o le pisinisi i le faitoto’a o le Maketi, ese le pisinisi o faia mai i totonu, ma ua silafia lelei fo’i e Leoleo lea tulaga! O fea le tonu o nei mea uma? E tapunia isi maketi sa tatau ona tatala i ai le avanoa ina ia maua sina seleni e fesoasoani i le tausiga o le aiga ma pili totogi, ae tatala avanoa lelei mo Saina e o mai e toe fa’atele ai latou tupe, ae sa tatau ona o i nisi nofoaga e fa’atautaia sa’o mai ai latou pisinisi? O ituaiga tagata nei e le tatau ona tatala i ai avanoa o le Maketi, sa tatau ona tuu mai mo i matou. O tina matutua o lea e taumafai se pisinisi e fesoasoani i le tausiga o fanau ma aiga.”
Ua faia e tina matutua se suesuega ma fa’amaumau, ua tele itula o le po e pei o le 12:30 am ua tietie mai ai i Pago Pago e talatupe i le ANZ, ma ua latou uia le maketi e siaki poo le a le mea e mumu ai pea moli o le Ofisa Totogi Pasese lea i le Maketi, “O lo’o fao ai lava Simi Su ma isi ali’i e to’alua, o lo’o ta le tele o fa’amaumauga ma tusitusiga i masini Komipiuta i lea potu Ofisa tusi pasese o va’alele, Manino Salamo. Talofa o lea tina o lo’o malaga i fafo e si’ima’i, ae o lea e tatala lava lona ofisa. O fea la se mamalu o le fa’amalosia o le tulafono e tapunia uma i le 11:00pm i lenei fo’i vaitau?”
“O le tala lea i tusi talosaga mo latou e tatala ai pisinisi ma fefa’ataua’iga, e oo lava i falepia ma kalapu fa’apea ma faletifaga e le’i talosaga ua tatala, aisea ea e tapunia ai pea taumafaiga a nei tina matutua? O le a se leaga o i ai i a matou oloa?”
“Ona o matou e matutua, ua matou talosagaina ai se fesoasoani tupe mai le tupe o lo’o fa’atalosagaina e pisinisi laiti, fa’amolemole Lemanu PS. Mauga le Kovana Sili, e le’i maua mai lava se tali. Ua asia fa’alua nei, ae fai mai e fa’atali ua malaga i fafo si teine sa tali muamua mai ma sailia pe o i ai moni lava se talosaga, ua maua ane e moni o lo’o ua i ai mo le Cares Act mo faipisinisi, ae le’i fa’ailoa mai e le sui lea, o lo’o i ai le isi talosaga e mafai ona agava’a fo’i i ai a’u, le talosaga mo le CAP, tupe mai le tatou lava malo. O le fesili, o le mea ea e filifili lava pisinisi e tatau ona fesoasoani i ai, pe sulufa’i atu moni a nai pisinisi nei e le lava se tupe tele o maua mai ai, ae fa’atalitali pea se’ia fono fa’afia lena pulega o le tupe fa’asoa mai?”
“E leaga se tina ae tagi vale, i nei malaia nisi i ona loimata, ae o loimata o le fia maua o se lagona e tutusa tagata uma i manuia o lo’o fa’asoasoa mai. Alofagia e le Atua a outou galuega, afai e sasi fo’i le fa’atinoga o le pisinisi a le tina fa’atonutonu mai, o lea fa’ato’a faia se pisinisi ae ua tino matutua. Fa’ailoa mai ala tonu e faamaumau ma fa’atalosaga atu ai.”