Pago Pago - AMERIKA SAMOA
O le masina na te’a nei na pu’e faapagota ai e Leoleo se ali’i e 28 tausaga le matua, ona o tu’uaiga faasaga ia te ia i lona osofia o se fale a se aiga i Fogagogo, i le amataga o le tausaga nei, ae ave faagaoi ni meatotino.
O le masina lava fo’i na te’a nei na tula’i ai le susuga a Senetenari Pene i luma o le Faamasinoga, ma faatulaga ai loa e le Faamasinoga le tupe e $20,000 e totogi ona faatoa mafai lea ona tatala o ia i tua.
Ua molia nei e le malo ia Pene i moliaga e 3 o le talepe fale i le tulaga lua; 3 moliaga o le gaoi, faapea ai ma le moliaga e tasi o le tete’e atu i Leoleo a o taumafai e pu’e faapagota o ia; o le vaega C lea o solitulafono mamafa, lea e mafai ona faasala ai se tasi i le Toese mo le umi e oo atu i le 7 tausaga, pe faasala i le salatupe e oo atu i le $5,000, pe faasala foi i faasalaga uma ia e lua.
Afai ae tatala i tua Pene, ua poloa’iina o ia e le Fa’amasinoga, ina ia aua ne’i toe alu i fale o aiga na aafia i lana solitulafono, e le mafai foi ona toe taumafai e faafesootai molimau a le malo atoa ai ma i latou na aafia, a ia avea o ia ma tagatanu’u e tausi i soo se tulafono a le malo.
E le mafai ona ia tuua le atunuu i soo se taimi, e tatau foi ona tuu atu lona tusi folau e taofi e le malo, se’i vagana ua mae’a lana mataupu ona faatoa mafai lea ona toe faafo’i atu ia te ia.
E le i faataunuua le ulua’i iloiloga a Pene lea na faatulaga e faia i le vaiaso nei, ina ua faaagafua e le ua molia ona aia tatau ina ia taofi le faataunuuina o lana ulua’i iloiloga, ae tu’u sa’o atu loa lana mataupu i luma o le Fa’amasinoga Maualuga e faataunuu ai sona faamasinoga autu.
O le vaiaso fou lea ua faatulaga e tulai ai Pene i luma o le Fa’amasinoga Maualuga mo lana ulua’i iloiloga.
TAGI A LE MALO
O lenei mataupu na tofu atu i le Ofisa o Leoleo i Tafuna, ina ua talosaga le ulugalii e ana le fale, mo se fesoasoani, e mafua mai i se tagata na ulufale faamalosi i totonu o le la fale ma ave faagaoi meatotino sa i ai e pei o mea faigaluega e ola i le eletise, o se moa vao, o mea faigaluega sa teu i le potu e teu ai mea faigaluega.
Ina ua fesiligia e Leoleo le ulugalii, na faamatala ai e le Tina, lona vaaia o le alii o Pene i totonu o le la fale i le po o le aso 10 o Ianuari, 2022. Na mafua ona ia iloa o Pene lea sa i totonu o le fale, ona e masani lelei ai, o le ali’i lea e masani ona galue e faamama le la fanua ae totogi.
Na taua e le Tina i Leoleo e fa’apea, a o la momoe ma lona to’alua i totonu o le potu, na faafuase’i ona ia vaaia se tagata o tu i luma o le pusa aisa, o lo o taumafai e aapa i luga o le pusa aisa.
Na valaau le Tina i le igoa tauvalaau a le ua molia, o Nari, ma fai i ai poo a ana mea o lo o fai i totonu o le fale, peita’i sa le ano i ai le tagata ae o loo tu pea lava i luma o le pusa aisa ma taumafai lava e aapa i luga o le pusa aisa
Na atili ai ona valaau le Tina i le tagata ina ia alu i fafo ma le fale. Na avea le tauvalaau soo ane o le Tina i le tagata sa i totonu o le fale ma itu na mafua ai loa ona savali ese le ua molia mai totonu o le potu ma telea’i atu i le faitoto’a pito i luma ma alu loa i le atoa.
Na tuliloa e le ulugalii e ana le fale le tagata sa i totonu ina ua tamo’e aga’i i luma o le pa peita’i e le i mafai ona maua, ona e fai lava si saoasaoa o lana tamo’e.
Na taua e le Tama i Leoleo, a o taoto i lona moega, sa ia lagona lona toalua o loo valaau i le igoa o Nari e alu ese ma le fale. Sa ia taumafai e nofo i luga ona le tiga o lona tuli. Ina ua nofo i luga, sa ia vaaia ai le ua molia o loo savali mai i totonu o le potu ma aga’i atu i le potu malolo ma ulufafo atu ai loa i le faitoto’a.
Na la taumafai ma lona to’alua e tuliloa peitai la te lei maua, ona e saosaoa tele le tamo’e a le alii ua molia.
O le mae’a ai ona fesiligia e Leoleo o le ulugalii na aafia, na aga’i atu ai loa mo le tau sailia mai o Pene. Ae peitai sa le’I faamanuiaina le latou sailiga. Na taua e se alii sa nofo ai le ua molia, ua 2 aso talu ona alu ese o ia ma o loo nofo i lona uso matua i Kokoland.
O le tuana’i ai o masina e 4 talu ona tau saili e Leoleo le ua molia, na logo ai loa e se alii le Ofisa o Leoleo i Tafuna, e faatatau i se ali’i o loo inu pia i autafa o se Faleoloa ma o loo leotele ma pisapisao solo. Ae peitai, e taunuu atu leoleo, ua alu ese le tagata lea.
Na toe aga’i ese Leoleo ina ua mae’a ona latou fesiligia molimau sa i ai, peita’i pe tusa o le tuana’i ai o le isi itula e tasi, na toe taamilo mai ai le ta’avale a Leoleo ma latou vaaia ai le tagata sa inupia i autafa o le Faleoloa, o loo savali atu i luma o le pamu kesi i Pavaiai.
Na afe le ta’avale a Leoleo ma fesiligia le alii na savali i le auala, ma faamaonia ai loa, o ia tonu lea na inu pia i autafa o le Faleoloa i Faleniu. Na fesiligia e Leoleo le igoa o le alii lenei, ma ia taua ai, o ia o Senetenari Pene.
Ao lei fesiligia e Leoleo le alii o Pene e tusa ai o tu’uaiga faasaga ia te ia, na muamua ona fautuaina o ia i ona aia tatau faaletulafono, ma ia taua ai lona malamalama i ona aia tatau, ma ua ia sauni fo’i e tali i fesili a Leoleo.
Na taua e Pene i Leoleo Suesue e faapea, i le vaiaso lona 2 o Ianuari i le amataga o le tausaga nei, sa ia galue ai e faamama le lotoa o le fanua o se ulugalii o Fogagogo ae maua ai lona totogi.
E atoa le vaiaso o galue e faamama le fanua ae na o le $60 lona totogi na tu’u atu e le ulugalii, ma mafua ai loa ona ia manatu e osofa’i le fale o loo teu ai mea faigaluega ae gaoi e faatau ina ia maua ai se tupe e faapaleni ai lona totogi.
Na ioe Pene i tu’uaiga uma faasaga ia te ia, e aofia ai lona ulufale i totonu o le fale i le leva o le po ma ave ese faagaoi mai ni mea faigaluega e ola i le eletise mai totonu o le potu e teu ai mea faigaluega a le ulugalii.
Sa ia ave faagaoi foi se moavao seleloi, o se pusa o mea faigaluega kamuta, atoa ai ma isi ituaiga mea faigaluega sa taape solo ai i totonu o le pusa.
O nisi o nei mea faigaluega sa ia faatau atu i se tasi o alii i Tafuna i le tau e $240. Sa ia faaaoga le tupe e faatau ai pia ma mea’ai mo ia ma lana uo sa la to’alua i lea osofaiga.
Na tautino atili le ua molia, e faalua ona ia osofaia le fale o le ulugalii. O le osofaiga muamua, e na o le telefoni, o lavalava ma seevae na alu ma ia, ae o le osofaiga lona lua, na mafai ai loa ona ia ave faagaoi mea faigaluega ma faatau ese atu.