Pago Pago - AMERIKA SAMOA
O le aso 16 o Iuni i le itula e 9:00 i le taeao lea ua tolopo i ai le tuuina atu o se faaiuga a le Fa’amasinoga Maualuga faasaga i le mataupu e pei ona ta’usala ai se tamaitai faiaoga i lona umia faasolitulafono lea o vaega o fualaau faasaina o le aisa.
O le faaiuga mai le Fa’amasinoga e toe tolopo le tuuina atu o sana faaiuga faasaga ia Mele Moimoi Mapu, e mafua mai ina ua finagalo le Fa’amasinoga, e tatau ona mulimulita’i Mapu i faiga masani ua faataoto e le Fa’amasinoga mo soo se tasi e ta’usala i le umia o fualaau faasaina, e tatau ona faia sana suega i le taeao tonu lava lea e lau ai lana faasalaga, poo ia tagofia fualaau faasaina pe leai.
I le vaiaso na te’a nei ina ua tulai Mapu mo le lauina o lana faasalaga, e lei faia se suega a Mapu e iloa ai poo ia tagofia fualaau faasaina pe leai fo’i.
O le ali’i loia fautua ia Michael White na tula’i mo Mapu ae o le tamaitai loia sili lagolago ia Kristine Soule’ na tula’i mo le malo.
Na ulua’i tu’uaia Mapu i le moliga o le umia faasolitulafono o vaega o le pauta faasaina o le aisa ma le faamoemoe e tula’i ma faatau atu i isi tagata, atoa ai ma le moliga o le umia faasolitulafono o vaega o le pauta faasaina o le aisa, o ni solitulafono e mafai ona faasala ai se tasi i le Toese mai le 5 e oo atu i le 10 tausaga, pe faasala i se salatupe e le sili atu i le $20,000.
Ae i lalo o se maliliega na sainia e le ua molia ma le malo, lea fo’i na talia e le Fa’amasinoga i le amataga o le tausaga nei, na tali ioe ai le ua molia i le moliga na toe teuteu e le malo, le moliga o le umia faasolitulafono o fualaau faasaina, o le vaega D lea o solitulafono mamafa, lea e mafai ona faasala ai se tasi i le Toese mo le umi e le sili atu i le 5 tausaga, pe faasala foi i le salatupe e le silia i le $5,000, poo le faasala foi i faasalaga uma ia e 2.
I le tali ioe ai o Mapu i le moliga e pei ona ta’usala ai o ia, na ia ta’utino ai e faapea, i se taimi o le masina o Iulai o le tausaga e 2017, na ia umia faasolitulafono ai vaega o le pauta faasaina e aunoa ma se faatanaga faaletulafono.
A o le i tuuina atu le avanoa i le ua molia mo sana faamatalaga, na valaau e le loia fautua a le itu tete’e se molimau, o ia lea o le to’alua o le tamaitai faiaoga ua nofosala. O le molimau, o ia fo’i o se faiaoga.
Na taua e le molimau i le Fa’amasinoga e faapea, o le ua molia, o le Tina o lana fanau to’atolu ua silia i le 10 tausaga o le la mafutaga. O ia o se Tina alofa ma galue malosi i le tausiga o le la fanau.
Na taua e le to’alua a le ua molia i lana molimau faatauto i luma o le Fa’amasinoga, o lona to’alua, o se Tina e galue i galuega e 2 e fesoasoani ai i le tausiga o le aiga, ae o ia fo’i e sili ona vava lalata le latou mafutaga ma si ana fanau.
Sa ia talosaga i le Fa’amasinoga mo se avanoa e fa’aauau ai pea ona latou mafuta ma lona to’alua i totonu o le latou aiga.
Ina ua mae’a le molimau a le to’alua a le ua molia, na manino ai i lana molimau, e 2 galuega o lo o galue ai lona to’alua e fesoasoani ai i le atina’eina o le aiga.
O lana moilmau na mafua ai ona fesiligia o ia e le afioga i le alii Faamasino Lagolago ia Mamea Sala ma fesiligia ai le molimau pe faigaluega pe leai. Na tali le molimau, o ia fo’i e galue o se faiaoga, o loo fesoasoani fo’i i lona faletua i le tausiaina o le la aiga.
Na fia iloa e le fa’amasinoga poo fea e tu’u ai le fanau e to’a 3 pe afai la te galulue uma ma lona to’alua i le galuega faa faiaoga. Na tali le molimau, o le la fanau matutua e o i le aoga ae o le uii e ave i ona matua e tu’u ai.
Ina ua maua le avanoa o Mapu mai le Fa’amasinoga, sa ia faatoese ai loa e tusa ai o lana solitulafono ma ia talosaga mo se isi avanoa mo ia e faaauau ai pea ona mafuta ma lona aiga. Na taua e Mapu lona faanoanoa i le gaioiga sa ia faia i le aso na tula’i mai ai lenei fa’alavelave.
Na faamatala e le ua molia nisi o mafua’aga na ala ai ona unaia o ia e faatino lenei solitulafono. Muamua, o le taimi tonu lava lea faatoa maliliu ai ona matua, toe tuli o ia mai lana galuega sa galue ai ina ua ia tagofia nisi o seleni a le Ekalesia, ma ua faulala’i fo’i le mau pili e tatau ona totogi ae ua faaletonu le itu tau seleni o le aiga.
I le taimi lava fo’i lea e tasi e pei ona taua e Mapu i lana molimau, o lo o taumafai ai lava e tausi si ana fanau e to’alua, ma ua avea ai nei mau faafitauli o se avega ia te ia i lea taimi, faaopoopo atu loa i ai ma le faafitauli o lona tagofia o fualaau faasaina.
O le taimi nei, o lo o galue Mapu i galuega e 2 e tausi ai lona aiga. O ia o le faiaoga o le Vasega 5 i le Aoga Tulaga Muamua a Manulele, ae galue fo’i i se tasi o fale’aiga i le atunu’u. Na ta’utino Mapu, o lana filifiliga sa faia i lea aso ua mafua ai ona tula’i i luma o ali’i Fa’amasino mo se faasalaga mo ia.
Ua ia iloa le sese o le filifiliga sa ia faia, ma ua ia mautinoa fo’i le sese o le taunuuga e oo i ai lea ituaiga filifiliga. Sa ia talosaga i le Fa’amasinoga mo se faamagaloga mo ia, atoa ai ma se avanoa se tasi e toe faasa’o ai mea ua sese i lona olaga.
Na talosaga i le loia a le malo i le Fa’amasinoga mo se faasalaga faanofovaavaaia, e tusa ai o tuutuuga o le maliliega sa latou sainia ma le itu tete’e.
I le mae’a ai o se malologa puupuu a le Fa’amasinoga, na saunoa ai loa le afioga i le ali’i Fa’amasino Sili lagolago ia Fiti Sunia ina ia toe tolopo le lauina o le faasalaga a Mapu seia aulia le masina fou o Iuni. Ua poloaina Mapu ina ia tuuina atu o ia mo le faia o suega i vaiaso taitasi e faamaonia ai na te le o tagofia fualaau faasaina. Ua faatonuina fo’i e le Fa’amasinoga le Ofisa Faanofovaavaaia ina ia saunia se ripoti e tusa ai o suega uma o le a faia mo le ua molia i vaiaso taitasi.
O le mataupu e pei ona ta’usala ai Mapu na alia’e mai i le masina o Iulai o le 2017, ina ua pu’e faapagota o ia ma taofia i le Toese i Tafuna, e mafua mai i se afiafi na alu e piki mai i le Falemeli i Fagatogo, na maua ai i totonu se vaega tele o le pauta o le aisa lea e lata i le 2 pauna le mamafa.
Na taua e Leoleo Suesue, e lata i le $90,000 le tupe e maua pe a faatau vaega o le pauta o le aisa na maua i le afifi lea na alu atlu Mapu e piki mai i le Falemeli.
E alu atu Mapu e piki mai lana afifi mai le Falemeli, ua uma ona faailoga e sui o le Ofisa o Tiute le afifi ma tu’u ese, ina ua mae’a ona faailoa atu e ta’ifau o le K9 le masalomia lea o le i ai o fualaau faasaina i totonu o le afifi.
Ina ua fesiligia e sui o le Ofisa o Tiute ia Mapu poo a mea o loo i totonu o le afifi, na tali le ua molia, o le pauta o le aisa.
Ina ua fesiligia e Leoleo Suesue ia Mapu e tusa ai o fualaau faasaina, sa ia ta’utino ai e faapea, sa ia faatauina mai i fualaau faasaina nei mai se tagata na la fetaui ma masani i luga o fesootaiga faaonaponei (Facebook) i le tau e $800.
Na taua e le ua molia i Leoleo, na te le iloaina le tagata na ia faatauina mai ai fualaau faasaina, ae na ia faatauina mai ma le faamoemoe e tulei ma faatau atu ina ia maua ai se vaega tupe vave mo ia.
Na saili e Leoleo le imeli a le ua molia ma maua ai faamatalaga o la fetusiaiga ma le tagata na faatau mai ai le fualaau faasaina, atoa ai ma nisi o ata tau feusuaiga mai le isi i le tasi. Na faailoa e Mapu i Leoleo, e lei iloa e lona to’alua nei mau gaioiga uma sa ia faia.
Mulimuli ane, na toe faailoa ai e Mapu i Leoleo, o lana ulua’i faamatalaga sa tuuina atu ia te i latou e le moni.