Pago Pago - AMERIKA SAMOA
O le ali’i ave ta’avale lea na taofi e Leoleo lana ta’avale ina ua ia le usitaia tulafono i luga o le alatele, ua molia nei o ia i le moliaga mamafa o lona umia faasolitulafono o fualaau fa’asaina, ina ua su’e e Leoleo totonu o lana ta’avale ae maua ai vaega o fualaau fa’asaina.
O moliaga ua molia ai Faaolataga Vui e aofia ai lona umia faasolitulafono o le pauta fa’asaina o le aisa, atoa ai ma le moliaga mamafa o lona umia fa’asolitulafono o vaega o le laau fa’asaina o le mariuana, o ia solitulafono, e mafai ona fa’asala ai se tasi i le toese mo le umi e le sili atui le 20 tausaga, pe fa’asala i le salatupe e le sili atu i le $20,000, poo le fa’asala fo’i i fa’asalaga uma ia e lua.
O le masina na te’a nei na tula’i ai Vui i luma o le Fa’amasinoga.
E $5,000 le vaega tupe lea ua fa’atulaga e le Faamasinoga e totogi ona fa’atoa mafai lea ona tatala Vui i tua.
A mafai ona tatala o ia i tua, ua poloaina o ia ina ia usita’i i tulafono a le malo, e le mafia ona ia tuua le atunu’u pe taumafai fo’i e sola ese ma le atunuu, ia tuuina atu fo’i lona tusi folau e taofi e le Loia a le malo, se’i vagana ua mae’a lana mataupu ona faatoa mafai lea ona toe tuuina atu ia te ia.
E le mafai fo’i ona ia toe taumafai e fa’afesoota’i molimau a le malo i soo se auala, e le tatau fo’i ona ia toe tagofia le ava malosi poo lona umia o ni fualaau fa’asaina.
Na talosaga le loia a Vui i le Fa’amasinoga mo se avanoa e fa’aitiitia ai le tupe e tatala ai le ua molia i le $2,000, peita’i na teena e le Fa’amasinoga.
Na taua e le loia a Vui e fa’apea, o vaega o fualaau fa’asaina sa maua i totonu o le ta’avale a Vui, ua na o ni vaega laiti lava e fa’aaoga mo ia lava. E le o i ai fo’i se fuafuaga a Vui e fa’atau atu nei Fualaau faasaina i isi tagata.
O Vui e pei ona taua e lana loia, o se ali’i e fai lona aiga ma lana fanau, e galue malosi fo’i i le tausiga o lona aiga, ae o le solitulafono e pei ona a’afia ai o ia, o se filifiliga ua sese ona ia faia.
Na finau le Loia Fautua a le alii ua molia i le fa’amasinoga e faapea, e le sola Vui pe afai ae tatala o ia i tua, e le o ia fo’i o se tagata o lo o i ai se faanaunauga e alu ese ma Amerika Samoa, ona o iinei lava o loo i ai lona aiga, o lona olaga fo’i na tupu a’e lava i totonu o le atunu’u.
I le tete’e a le itu a le malo I le talosaga a le loia a Vui mo le faaitiitia o le tupe e tatalaina ai Vui I tua, sa finau ai le malo, e ono sola ese le ua molia ma le atunu’u pe afai ae tatala o ia, ma o lo o i ai fo’i isi suesuega a Leoleo i tulaga o fualaau fa’asaina o lo o faia faasaga ia te ia.
O le vaiaso fou lea ua fa’atulaga e faia ai le ulua’i iloiloga o le mataupu a Vui, e saili ai mau faaaonia a le malo, pe lava ma totoe e lagolago ai le tagi a le malo fa’asaga ia te ia.
TAGI A LE MALO
E pei ona taua e le malo i le latou tagi e fa’apea, o le afiafi po o le aso 12 o Me na te’a nei, na maua ai e Leoleo Suesue se faamatalaga e fa’atatau i se ta’avale pikiapu o lo o ti’eti’e ai se tagata e suafa ia Tommy Uesile, lea fo’i e iloa e le to’atele i lona igoa o Tom.
O Uesile, o lo o i ai se tusi saisai mai le Fa’amasinoga o lo o tau sailia ai e Leoleo o ia. Ina ua maua e Leoleo lea fa’amatalaga, na latou aga’i atu ai loa e saili le ta’avale. Pe tusa e 2 itula ae maua loa e Leoleo le pikiapu lea i se vaega o Tafuna, ma latou taofia loa. Ae e le i maua Uesile i totonu o le ta’avale, se’i vagana ai ali’i e to’alua, o Vui ma lana uo o Ioane Tifaga.
Na toe tatala e Leoleo i tua Tifaga ina ua mae’a ona fesiligia ma fa’atalanoa o ia. E leai fo’i ni moliaga ua faia fa’asaga ia Tifaga.
Pau le itu na mafai ona fesoasoani ai Tifaga i sailiiliga a Leoleo o loo faagasolo, o lona faailoa lea i ai o le nofoaga o loo masalomia o loo nofo ai le alii o Uesile.
Na faailoa e Leoleo ia Vui le mafua’aga ua ala ai ona taofi lana ta’avale, atoa ai ma lona le usitaia o tulafono i luga o le alatele, e ala i lona faafoe o se ta’avale ae leai se fusipa’u.
E leai se laisene ave ta’avale a Vui sa i ai i le taimi lea, e oo fo’i i lana uo o Tifaga, e leai fo’i sona laisene ave ta’avale poo se pepa fo’i e faamaonia ai o ia. Na saili atili e Leoleo le ta’avale na malaga ai Vui ma lana uo o Tifaga ma iloa ai, e ese le tagata o lo o lesitala ai le ta’avale.
Talu ai e leai se pepa e faamaonia ai Vui poo Tifaga, toe ese fo’i le tagata o lo o lesitala ai le ta’avale, o le mafua’aga lea na taofia ai loa e Leoleo le ta’avale i le Ofisa autu i Fagatogo, se’i vagana ua alu atu le tagata e ana le ta’avale.
Ina ua iloa e Vui o le a taofia le ta’avale i le ofisa o Leoleo i Fagatogo, sa ia musumusu i se tasi o Leoleo, e i ai mea’ai e fia aveese mai totonu o le ta’avale, ina ne’i manogi leaga pe a umi ona ta’atitia ai i totonu.
Na faataga e le Ta’ita’i Leoleo ia Vui e o ma isi Leoleo e to’alua e tatala le ta’avale ae aveese mai mea o lo o i ai i totonu.
Ina ua tatala e Vui le faitoto’a o le ta’avale, na vaaia e Leoleo le taumafai o Vui e nana se mea i lalo o le nofoa o le ave ta’avale. Na vave le tulioso atu o Leoleo ma taofi Vui ae toe ta’ita’i ese mai ma faagasolo ai loa ma le sailiina e Leoleo o le ta’avale, ma maua ai fualaau fa’asaina.
O fualaau fa’asaina sa maua e aofia ai se pepa iila sa i ai vaega o le pauta o le aisa, o se sikaleti mariuana ua uma ona taai, faapea ai ma se paipa tioata o lo o tumu i le aisa sa i lalo o le nofoa.
Na faia ni suega i vaega o fualaau fa’asaina sa maua ma faamaonia ai, o vaega ia o fualaau fa’asaina o le aisa ma le mariuana.
Ina ua fesiligia e Leoleo ia Vui e tusa ai o mea sa maua i totonu o le ta’avale, sa ia teena malosi ai lona iloaina o nei fualaau fa’asaina. Sa ia faailoa i Leoleo, o lona uncle e ana le ta’avale, ae sa ia faanoi e fa’aaogaina e la’u ai ana meamata i le maketi.
O lo o taofia pea Vui i le toese i le taimi nei e fa’atali ai lana ulua’i iloiloga lea ua faamoemoe e faia i le vaiaso fou.