Rusiyada, Krasnoyarsk diyarında 13 yaşlı qızını zəncirləməkdə şübhəli bilinən valideynlərə qarşı cinayət işi açılıb.
Milli.Az bildirir ki, Rusiya Federasiyasının İstintaq Komitəsinin regional idarəsindən verilən məlumata görə, ailə Minusinsk şəhərinin Zeleni Bor kəndində yaşayır. İstintaqın məlumatına görə, 40 yaşlı ana və 43 yaşlı ata qızı evə gec gəldiyi üçün bu cür cəzalandırıblar.
"Həyat yoldaşları Rusiya Federasiyası Cinayət Məcəlləsinin 156-cı maddəsinin 1-ci hissəsi (valideyn tərəfindən yetkinlik yaşına çatmayan uşağın tərbiyəsi ilə bağlı vəzifələrin lazımınca yerinə yetirilməməsi, yetkinlik yaşına çatmayan şəxslə pis rəftarla birlikdə), Məcəllənin 127-ci maddəsinin 2-ci hissəsi (bir qrup şəxs tərəfindən əvvəlcədən məlum olan yetkinlik yaşına çatmayan şəxsə qarşı qabaqcadan əlbir olaraq törədilmiş qanunsuz azadlıqdan məhrum etmə) ilə cinayət törətməkdə şübhəli biliniblər", - idarənin məlumatında deyilib.
İstintaqın məlumatına görə, mayın 24-də valideynlər qızlarının ayağını metal zəncirlə batareyaya bağlayıblar. Mayın 29-da sərxoş qadın uşağı yenidən boruya zəncirləyib - guya təhsil məqsədi ilə.
Ailənin daha beş azyaşlı övladı var - onların 4, 11, 12, 14 və 17 yaşı var. Qadından yeri tərk etməməsi və düzgün davranışları barədə yazılı öhdəlik götürülsə də, kişi saxlanılıb. İstintaq onun həbsi üçün vəsatət qaldıracaq. Valideynlər spirtli içki içdiyinə görə ailə məktəbdaxili profilaktika qeydiyyatındadır. Hər ikisi valideynlik borcunu yerinə yetirmədiklərinə görə dəfələrlə inzibati məsuliyyətə cəlb ediliblər. Uşaqlar ixtisaslaşdırılmış uşaq müəssisəsinə köçürülüb. İndi onların anaları ilə birgə yaşamalarının taleyi həll olunur.
İrfan Vəliyev
Milli.Az
