“Klinikamızda müasir tibb və təbii üsullarla müalicə vəhdət təşkil edəcək”
Bir neçə gün öncə təbii üsullarla müalicə mütəxəssisi kimi məşhur olan doktor Seyfəddin Əsəd yeni klinikasının açılışını etdi. “Həzi Aslanov” metro stansiyasının yaxınlığında, Məhəmməd Hadi küçəsi, 66B ünvanında yerləşən “Doktor Seyfəddin Klinikası”sında hansı təbii üsullarla və hansı xəstəliklərin müalicəsi aparılır?
Klinikanın rəhbəri Seyfəddin Əsəd “Yeni Müsavat”ın bu və digər suallarını cavablandırıb. Həmin müsahibəni təqdim edirik:
- Klinikamızda bütün xəstəliklər üzrə müalicələr aparılır. Deyə bilərəm ki, klinikamızda peşəkar həkimlər, yüksək səviyyəli laboratoriya, fizioterapiya, kardioloji, nevropatoloq, stomatoloji kabinetlərimiz var. Həmçinin heç bir yerdə olmayan təbii üsullarla müalicə, yəni zəli, qurbağa, arı ilə müalicələrimiz var.
Son vaxtlar insanlar miqren xəstəliyindən çox əziyyət çəkir ki, bu xəstəliyin bir nömrəli təbii üsullarla müalicəsi bizim klinikada aparılır.
Bundan başqa, qurbağa ilə zob xəstəliyinin bütün növlərinin müalicəsini aparırıq. Artıq uzun müddətdir ki, çox yüksək səviyyədə zəli ilə müalicəmizi də davam edirik. Digər, o cümlədən mədə-bağırsaq xəstəliklərinin də kimyəvi dərmanlardan istifadə olunmadan təbii üsullarla müalicəsini aparırıq.
Ümumiyyətlə, bütün terapevtik yolla müalicə olunan xəstəliklərin hamısı klinikamızda müalicə edilir. Onun içərisində babasil, varikoz, ürək-damar, qan təzyiqi xəstəlikləri də var. Fərqimiz ondan ibarətdir ki, müalicəmizdə kimyəvi dərmanlardan daha çox təbii üsullarla müalicəyə üstünlük veririk. Hər kəsə məlumdur ki, kimyəvi dərmanla müalicədə nəticə tez görünür. Təbii üsullarla müalicədə isə nəticə tədricən görünür, buna müəyyən vaxt tələb olunur. Amma kimyəvi dərmanlar orqanizmə mənfi təsir göstərir, təbii üsullarla müalicə isə yox.
- Təbii üsullarla müalicədə təkcə arı, zəli və qurbağadan istifadə olunur?
- Sadaladıqlarınızdan başqa bitkilərdən, digər məcunlardan da istifadə edirik. Həmçinin bir az öncə qeyd etdiyim kimi, bizim başqa sahələr üzrə həkimlərimiz də var ki, onlar müasir təbabətin üsullarından istifadə edərək, pasiyentlərini müalicə edirlər. Bununla da klinikamızda müasir tiblə ənənəvi tibb vəhdət təşkil edəcək.
- Təbii üsullarla müalicənin hansısa əks təsirləri ola bilirmi? Yəni hansı xəstələrə zəli, arı, qurbağa ilə müalicə məsləhət görülmür?
- Bunun üçün pasiyentlər ilk öncə müayinədən keçirilir, daha sonra qərar verilir. Məsələn, elə pasiyent olur ki, onda kəskin qan azlığı var, qan laxtalanmır və yaxud hamilədir, bu zaman onlara zəli ilə müalicə tətbiq oluna bilməz. Qalan digər bütün hallarda zəli ilə müalicədən istifadə etmək olar.
Həmçinin xüsusi həssaslığı olan pasiyentlərə arı ilə müalicə tətbiq etmək olmaz. Digər 5 yaşdan yuxarı pasiyentlərə arı ilə müalicə tətbiq oluna bilir.
Qurbağa ilə müalicədə isə heç bir yaş göstəricisi yoxdur. Bütün yaş qruplarında olan pasiyentlərə istər bronxial astma, istərsə də zob xəstəliyində qurbağa ilə müalicə tətbiq olunur. Qeyd edim ki, bronxial astma xəstəliyində qurbağa ilə müalicə olunduqda elə birinci gündən öz nəticəsini göstərməyə başlayır və boğulma artıq müşahidə olunmur.
- Müalicədə istifadə etdiyiniz canlıları haradan gətirirsiniz? Məsələn, həyət-bacada gördüyümüz zəlidən və yaxud qurbağadan istifadə etmək olarmı?
- Qətiyyən, tibdə istifadə edilən zəli, qurbağa başqadır. Yəni həyət-bacadan zəli, qurbağa tutub, ondan müalicə üçün istifadə etmək olmaz. Onlar mütləq fabrikat şəraitində yetişdirilməli və yalnız həkimin məsləhəti ilə istifadə olunmalı və bu işi yalnız mütəxəssis icra etməlidir. Dəfələrlə zəlidən özbaşına istifadə edib, qanaxmaya düşənlər mənə müraciət edib. Qeyd etdiyim kimi, tibdə istifadə edilən zəli başqadır və onun bədəndə qoyulma yeri var. Yəni bədəni zəliyə öyrəşdirir, müəyyən analizlər aparılır, daha sonra isə istifadə edilir. Bədəni zəliyə öyrəşdirdikdən sonra onu istənilən yerə, o cümlədən gözə, ağıza, qulağa və s. qoymaq olar.
Həmçinin arı ilə müalicəni özbaşına aparmaq olmaz, bu çox təhlükəlidir. Bu müalicədə hər bir pasiyentə fərdi yanaşılmalıdır. Məlum olduğu kimi, arı sancması bəzən ölümə səbəb ola bilir. On görə də ilk öncə pasiyentin üzərində yoxlama aparılır, onun orqanizminin arı zəhərini götürüb-götürmədiyi müəyyən edilir, daha sonra isə lazımi qaydada tətbiq edirik.
Arı ilə müalicə çox əhəmiyyətlidir. İlk gündən xəstə onun nəticəsini görməyə başlayır. Belə ki, arı ilə müalicədən sonra xəstədə sidik ifrazını saxlaya bilməməsi problemi aradan qalxır, əsəbləri sakitləşir, oynaq, əzələ ağrıları, revmatizm xəstəliyi aradan qalxır.
- Arı ilə müalicəni daha çox hansı xəstəlikdə istifadə edirsiniz?
- Demək olar ki, bütün xəstəliklərin, o cümlədən miqrenin müalicəsində istifadə edirik.
Ümumiyyətlə, arı Allahın insana verdiyi ən böyük möcüzədir, o, min bir dərdin dərmanıdır. Arı və arı məhsulları saçdan tutmuş dırnağa qədər bütün, o cümlədən kimyəvi maddələrin müalicə edə bilmədiyi xəstəlikləri müalicə edir, aradan qaldırır.
- Xatırlayıram ki, müsahibələrinizin birində demişdiniz ki, arıçılar heç vaxt xərçəng xəstəliyinə yoluxmur.
- Ümumiyyətlə, dünyada arıçılıqla məşğul olan insanlar ən çox uzun ömür sürənlərdir, onlar xərçəng, qrip, yoluxucu xəstəliklərə tutulmurlar.
- Bəs qurbağa ilə daha çox hansı xəstəlikləri müalicə edirsiniz?
- Məlum olduğu kimi, Azərbaycanda qurbağa ilə müalicə üsulu yüz illərdir ki, var. Lakin həmin müalicələr elmi deyildi.
Klinikamızda qurbağa ilə müalicə əsasən zob, qadınlarda süd vəzilərində olan şiş xəstəliklərində, kişilərdə prostat vəzi, o cümlədən oynaq, əsəb xəstəliklərində istifadə olunur. Qalxanabənzər vəzi müalicə etmək üçün bəzən əməliyyata müraciət edilir. Əməliyyatdan sonra isə ömür boyu dərman qəbul etmək lazımdır. Lakin qurbağa ilə müalicədə buna ehtiyac qalmır. Həmçinin qurbağa insanda saç, dırnaq tökülməsinə də təsir edir.
- Pasiyentləriniz daha çox hansı xəstəliklə bağlı müraciət edir?
- Əsasən miqrenlə bağlı olur. Həmçinin daha çox zob xəstəliyindən əziyyət çəkənlər müraciət edir. “Pullu dəmirov” və yaxud psoriaz adlı bir xəstəlik də var ki, həmin xəstəliyin müalicəsi hələlik təkcə bizim klinikada aparılır.
- Belə anladım ki, təbii üsullarla müalicədə kimyəvi dərmanlardan istifadə olunmur?
- İstifadə edilir. Məsələn, əgər xəstənin qan təzyiqi varsa, əvvəlcə onun qan təzyiqini sabitləşdirir, daha sonra tələb olunan müalicəni aparırıq. Yəni xəstəni vəziyyətdən çıxartdıqdan sonra təbii üsullarla müalicə prosesi tətbiq edilir.
- Klinikanızda müalicə yalnız ambulator şəraitdə aparılır, yoxsa çarpayılar var?
- Yox, çarpayı yoxdur. Biz müalicəni ambulator şəraitdə aparırıq.
- Bəs qiymətlər barəsində nə deyərdiniz?
- Əlbəttə ki, qiymətlərimiz də çox münasibdir, çalışırıq ki, pasiyentlərimiz rahat şəkildə müraciət edə bilsinlər.
- Əcnəbi pasiyentləriniz də olurmu?
- Bəli, miqreni təbii üsulla müalicə etdiyimizdən, bir çox ölkələrdən, o cümlədən, Almaniya, Kanada, İran, Türkiyə, Rusiya, Ukrayna, Qazaxıstandan gələn pasiyentlərimiz olur. Qeyd etdiyim kimi, əsasən miqren xəstəliyinə görə gəlirlər. Çünki onun müalicəsini tapa bilmir və bizə müraciət edirlər.
- Hazırda demək olar ki, postpandemiya dövründəyik, amma yenə də bu virusa yoluxanlar var. Yəqin ki, bu xəstəliklə bağlı da sizin özünüzə məxsus müalicə üsullarınız var?
- Deyə bilərəm ki, arıçılar koronavirusa yoluxmur. Əvvəldə də qeyd etdiyim kimi, dünyanın ən uzunömürlü və immuniteti yüksək olanlar arıçılardır. Əlbəttə ki, immuniteti yüksək olan insana “pullu dəmrov”, həmçinin digər xəstəliklər yaxın düşə bilmir. Bu baxımdan arı zəhəri tamam başqa bir möcüzədir.
Ümumiyyətlə, koronavirus qripin ağır formasıdır. Necə ki, qrip olduqda sarımsaq və soğandan istifadə əhəmiyyətli təsir göstərir, eləcə də bu virusa yoluxan zaman da sarımsaq və soğandan, göyərtidən, bal məhsullarından çox istifadə olunmalıdır. Və həmçinin çalışmaq lazımdır ki, insanlarla kontaktda az olunsun, məsafə saxlanılsın. Koronavirus bir qədər səngiyən kimi yenə də insanlarımızda görüşüb-öpüşmək adəti geri dönüb, belə etmək olmaz. Unutmayaq ki, koronavirus hələ sona yetməyib.
Bundan başqa, təmiz havada çox olub, idman etmək lazımdır.
Bu gün oynaq xəstəlikləri çox yayılıb ki, bunun da kökü hərəkətsizliyə bağlıdır. Koronavirus xəstəliyi baş verəndən isə oynaq xəstəlikləri, ümumiyyətlə, ağırlaşıb. Məsələn, məndə bu xəstəlikdən sonra çiyinlərimdə ağrılar əmələ gəlmişdi.
Hərəkətsizlik artıq çəkiyə də səbəb oldu. Bütün bunların qarşısını almaq üçün hərəkətlilik, təmiz hava, təbii qidalanma, çəkini qoruyub saxlamaq vacib şərtlərdən biridir. Orqanizmdə immunitet yüksək olduqda insan koronavirusa yoluxmur, yoluxanda belə onda səthi keçir.
- Hazırda payız mövsümünü yaşayırıq. Bu mövsümə uyğun necə qidalanmağı tövsiyə edirsiniz? Adətən soyuq havalar düşəndə insanlarımız daha çox xəmir, ət yeməklərinə üstünlük verir. Bu nə dərəcədə xeyirli və yaxud ziyanlıdır?
- Xəmir xörəklərinin yaxşı tərəfi odur ki, insanı tərlədir, digər tərəfdən isə onun tərkibində heç bir vitamin olmur. Yəni adətən xəmir xörəyi insanın şəkərini qaldırır, mədəaltı vəzini qıcıqlandırır, çəkini artırır, köp yaradır. İnsanlar var ki, şikayətlənir ki, “məndə köp var”. Tövsiyə edirəm ki, çörəkdən imtina etsin və bir gün çörəkdən imtina ilə onlarda köp aradan qalxır.
O ki qaldı uşaqlara, valideynlərə tövsiyə edirəm ki, övladlarını tez-tez təmiz havaya çıxartsınlar, qoy uşaqlar günəşdən D vitamini alsınlar. Elə ölkə var ki, 6 ay qaranlıq olur, bizdə isə demək olar ki, həmişə gün var, biz o gündən səmərəli istifadə etməliyik.
Xalidə GƏRAY,
“Yeni Müsavat”
