Tres estudantes leron textos da súa autoría na tradicional homenaxe ao escritor ourensán
Ourense volveu lembrar a un dos seus escritores ilustres: Eduardo Blanco Amor. A Deputación de Ourense e a Fundación Eduardo Blanco Amor homenaxearon ao intelectual coa tradicional ofrenda floral na súa tumba, no cemiterio de San Francisco, que se fai cada 1 de decembro, coincidindo coa data do pasamento do autor. O acto tivo dúas novidades: os rapaces do instituto Eduardo Blanco Amor regresaron para ler poemas, como facían habitualmente antes da pandemia e, por outra banda, por primeira vez non soou a Real Banda de Gaitas, en sinal de respecto por un enterro que tiña lugar á mesma hora no cemiterio. No acto, Baltar destacou a Blanco Amor como “un construtor da identidade cultural e política de Galicia”.
Tres estudantes encargáronse de ler poemas da súa autoría fronta á tumba: Elena Fernández, Alba Quintas e Paula Dios. O futuro das letras ourensás semella feminino.
Tampouco faltou ao acto a profesora María do Carmo Henríquez, que foi quen pediu que o IES de A Ponte pasase a chamarse IES Eduardo Blanco Amor nos anos oitenta.
