Pago Pago - AMERIKA SAMOA
O le masina o Setema lea ua fuafua e faataunuuina ai se Palota Faapitoa e saili ai se Faipule mo le Itumalo #1 a Manu’a, lea e aofia ai Ta’u, Faleasao ma Fitiuta, talu ai le tu’umalo a le afioga i le Faipule ia Alumamalu Ale Filoialii i le aso 28 o Iuni. O ona toe sauniga ua fuafua e faataunuuina ia Iulai 12.
E lua nofoa Faipule mo le Itumalo #1-Manu’a, lea e aofia ai le nofoa lo o nofoia nei e le afioga Fetu Fetui Jr.
E tusa ai ma tulaga o le Faavae Teuteuina a Amerika Samoa, e ao i le kovana ona tu’uina mai sana faatonuga tusitusia faaletulafono e faataunuu ai se palota faapitoa e faatumu ai le nofoa ua avanoa nei, i totonu o le Maota o Faipule.
Ma o le aso 19 Iulai sa faapea ona faataunuuina ai e le kovana lea tulaga o le tulafono teuteuina mo se palota faaitoa mo le nofoa Faipule a le Itumalo Palota #1.
Sa faalauiloa mai e le Faauluuluga o le Ofisa Palota, le susuga Uiagalelei Lealofi, i le aso Faraile o le vaiaso ua tuanai, e tusa ai ma le faatonuga tusia mai i le kovana sili, o le a faataunuuina ai nei se palota fapitoa ia Setema 12, 2023 e amata mai I le 6 i le taeao se’ia pa’ia le 6 i le afiafi, i nofoaga palota ua maea ona filifilia, mo le Faipule o le Itumalo Palota #1, ma o ai lava o le a manumalo mai i lea palota faapitoa, o le a ia nofoia loa lea avanoa, seia o’o atu i le aso 3 o Ianuari, 2025. (O le a fa’ailoa mai nofoaga mo lenei palota faapitoa ae e le’i o’o atu i le aso faatulaga o le palota).
Na fa’alauiloa mai foi e Uiagalelei, ua mafai nei ona pikiina pepa faatumu mo so’o se tasi o finagalo e tauva i lenei palota faapitoa, i le ofisa palota i Tafuna. Ma e tatau ona toe faaooina atu uma nei pepa faatumu i totonu o le Ofisa Palota ae le i ta ina le 4:30 i le afiafi o le aso Tofi, Aokuso 3, 2023.
Ma ua tatalaina foi le Ofisa Palota mo le mamalu lautele o fia resitala e palota i lenei palota faapitoa, seia o’o i le aso 14 o Aokuso, 2023 i le 4:30 i le afiafi.
E le gata i lea, ua taliaina nei e le Ofisa Palota talosaga mo palota mai atunuu i fafo (absentee ballots) e aofia ai tagatanu’u o Amerika Samoa o lo o i totonu o vaega’au, i latou ua faamautu i atunuu i fafo ae o lo o agavaa e palota i palotaga a Amerika Samoa faapea ma i latou o lo o aooga i fafo atu o Amerika Samoa. E faagataina talosaga mo nei palota ia Aokuso 28, 2023 i le 4:30 i le afiafi.
E mafai ona faauluina mai se talosaga mo palota ‘absentee’ e ala lea i le faatumuina o le pepa EO-08, i luga o le initeneti (www.aselectionoffice.gov).
Mo i latou o i totonu o vaega’au faapea tagata palota o lo o faamautu i fafo atu o Amerika ma ona Teritori, e mafai ona fa’aaoga se tusi talosaga mai I falemeli feterale (Federal Post Card Application-FPCA), e talosagaina ai se palota ‘absentee’.
O ia tusi talosaga e mafai ona imeli i le absentee@eo.as.gov po o le lafo mai i le meli mai i le Ofisa Palota, tuatusi 3970, Pago Pago, AS 96799. Mo nisi fesili, e mafai ona faafesootai mai le numera telefoni 699-3570.
