Pago Pago - AMERIKA SAMOA
O le Tina lea na ia faatauina atu lana ta’avale i se isi Tina i le tau e $32,000, ae mulimuli ane toe faafo’i atu lana ta’avale ona o le tele o vaega o loo faaletonu, ua molia nei o ia i le solitulafono o le gaoi.
O le vaiaso nei na taofia ai lenei Tina i le Toese i Tafuna e faatali ai le taimi e tula’i ai i luma o le Fa’amasinoga.
Na muamua tuuina atu e Leoleo i le Tina ua molia le poloaiga mai le Ofisa o le Loia Sili e taofi ai o ia mai lona tuua o le atunu’u, ae faatoa tuu aloaia atu ai loa ia te ia le tusi saisai mai le Fa’amasinoga e aloaia ai le pu’e faapagota o ia.
O le Tina ua molia, o ia lea o Mariamakulata Siua-Gaoteote, poo Maria Gaoteote fo’i e pei ona iloa ai o ia e le to’atele o uo ma aiga. O le amataga o le vaiaso nei na tula’i ai Gaoteote i luma o le Fa’amasinoga mo lana ulua’i iloiloga.
E tasi le moliga ua tu’uaia ai o ia e le malo, o le moliga lea o le gaoi, o le vaega C o solitulafono mamafa, lea e mafai ona faasala ai se tasi i le Toese mo le umi e oo atu i le 7 tausaga, pe faasala i le salatupe e oo atu i le $5,000, poo le faasala foi i faasalaga uma ia e 2.
E $10,000 le vaega tupe lea ua fa’atulaga e totogi ona faatoa mafai lea ona tatala le ua molia i tua mai le Toese i Tafuna e faatali ai le faagasologa o lana mataupu.
O le taeao ananafi na tula’i ai le ua molia i luma o le Fa’amasinoga Maualuga mo lana ulua’i iloiloga, ina ua ia faaagafua ona aia tatau ma ia manatu ai e taofi le faataunuuina o lana ulua’i iloiloga i luma o le Fa’amasinoga Faaitumalo, ae tu’u sa’o atu loa lana mataupu e faataunu’u sona faamasinoga autu i luma o le Fa’amasinoga Maualuga.
O le masina o Aokuso lea ua faatulaga e faia ai le ulua’i iloiloga o lenei mataupu, ina ua teena e le ua molia le moliaga e tasi ua faila e le malo faasaga ia te ia.
TAGI A LE MALO
E pei ona taua e le malo i le latou tagi e faapea, o le taeao o le aso 9 o Me na te’a nei, na ulufale atu ai se Tina i totonu o le Ofisa o Leoleo Suesue i le nofoaga autu i Fagatogo ma faailoa lona mana’o e faila sana faatagi faasaga i le Tina ua molia, ona o lana tupe e $32,000 na totogi ai le ta’avale sa ia faatauina mai ai i lea Tina, ae ua fiu e faatali le toe faafoiina atu o lana tupe ua sola sola solo lea Tina ma ia.
Na taua e le Tina o lo o tagi i lenei mataupu e faapea, o le aso 27 o Ianuari o le tausaga nei na ia faatauina mai ai ia Siua-Gaoteote le ta’avale o le ituaiga o le 2016 Chevrolet Silverado 1500 Truck e fa’aaoga ai lana siaki mai le Navy Federal Credit Union (NFCU) e $32,000 le aofa’i o le siaki.
Ina ua mae’a ona faatau mai e le Tina lea le taavale pikiapu mai ia Siua-Gaoteote, sa folafola atu e Siua-Gaoteote ia te ia, faitalia o ia ma toe faalelei uma vaega o le ta’avale o loo faaletonu, atoa ai ma lona toe faaopoopo i ai o isi vaega fou ina ia matagofie atili ai foliga o le ta’avale.
Na folafola atili e le Tina ua molia i le Tina o loo tagi i lenei mataupu, e 6 masina e siaki ai lana ta’avale ma faaleleia nisi o vaega e moomia le toe faafou i le Fale Inisinia a lona tuagane, le Lote’s Auto Shop i Tafuna e aunoa ma se totogi.
O le vaiaso lona 2 talu ona mae’a ona faatau le ta’avale, na faafesootai ai loa e le Tina o loo tagi le Ofisa o le NFCU mo se faamaoniga pe ua latou tauaaoina le kopi o le pepa o le ta’avale lea ua mae’a ona ia faatauina, ae na tali mai le Ofisa o le NFCU, o loo latou faatali pea lava i le pepa o le ta’avale mai ia Siua-Gaoteote.
E pei ona taua e le Tina o loo aafia i Leoleo Suesue, o le taimi tonu lava lea na amata ai loa ona oso ona masalosaloga ma popole lona mafaufau, pe faamata e moni nei mea o loo faamatala atu e Siua-Gaoteote ia te ia, ona o lea ua aga’i atu i le 2 vaiaso o fai lava a laua tuliga i le pepa faamaonia o le ta’avale ua mae’a ona ia faatau.
O le tuana’i ai o masina e 4 talu ona mae’a na faatau e le Tina na aafia le ta’avale, na faatoa maua ai loa le avanoa la te talanoa ma faafesaga’i ai ma le Tina ua molia e uiga i lneei mataupu.
O le feiloaiga lea na toe faafo’i ai loa e le Tina o loo tagi le ta’avale ia Siua-Gaoteote, ae talosaga i ai ina ia toe faafo’i atu lana tupe e $32,000, ona ua ia masalomia e foliga mai e le o faamaoni nisi o tuutuuga o le la talanoaga sa faia e faatatau i le ta’avale.
Na tuuina atu uma lava e le Tina o loo aafia i Leoleo Suesue faamaumauga uma e tusa ai o a laua talanoaga ma Siua-Gaoteote e uiga i le ta’avale, lea sa faia i luga o le Facebook atoa ai ma le imeli.
I nei talosaga, o loo taua ai e faapea, e faalua ona faailoa e le ua molia i le Tina o loo tagi i lenei mataupu, o loo faagasolo galuega a le Faletupe mo le toe tusia o lana siaki ona toe faafo’i atu ai lea ia te ia, ae tatau ona lava lona onosa’i.
O le mae’a ai ona fesiligia ma faatalatalanoa e Leoleo Suesue o le Tina o loo aafia i lenei mataupu, na latou talosagaina ai loa Siua-Gaoteote mo se avanoa latou te feiloa’i ai i le Ofisa o Leoleo Suesue i Fagatogo mo le talanoaina o lenei mataupu.
A o le i fesiligia e Leoleo Suesue ia Siua-Gaoteote e uiga i lenei mataupu, sa latou faailoa ia te ia, e le o taofia faapagota o ia, e le faamalosia foi o ia e faia sana faamatalaga, ae o loo i ai lava lona saolotoga e tula’i ai ma toe fo’i atu i lona aiga pe afai e le manatu e faia sana faamatalaga e tusa ai o le mataupu o loo suesueina faasaga ia te ia.
E ui i lea avanoa, ae na manatu le Tina ua molia e tuuina atu sana faamatalaga i Leoleo Suesue e tusa ai o le mataupu faasaga ia te ia.
Na taua e le ua molia e faapea, o le siaki e $32,000 na faatau ai e le Tina o loo tagi lana ta’avale, sa ia teuina i totonu o lana teugatupe i le Faletupe o le USAA. Sa ia taua le toe faafoi atu e le Tina o loo tagi o le ta’avale, ina ua fiu e faatali le taimi e tuu aloaia atu ai le pepa o le ta’avale.
Sa ia faailoa i Leoleo Suesue, talu ai o le siaki na teu i totonu o lana teugatupe i le Faletupe o le USAA, o le mafua’aga lea na ia faafesootaiina ai le NFCU pe faapefea ona toe faafoi atu le tupe lea ua mae’a ona totogi i totonu o lana teugatupe i le Faletupe o le USAA.
Na aga’i atu Leoleo Suesue i le Ofisa o Taavale Afi a le malo i Tafuna (OMV) ma saili mai faamaumauga e faatatau i le ta’avale a le ua molia na faatau e le Tina o loo tagi, poo ai o loo alu ai le pepa o le ta’avale. I faamaumauga mai le OMV na manino ai, o le pepa o le ta’avale o loo alu i le igoa o le ua molia, Siua-Gaoteote.
Na faailoa e le aufaigaluega a le OMV i Leoleo Suesue le alu atu o le ua molia e lesitala le ta’avale i lalo o lona igoa ae leai ma se pepa o le taavale e faamaonia ai, o ia e ana le ta’avale. Ae talu ai le manaomia ona lesitala o le ta’avale ina ia maua ai le faatanaga e fealua’i ai i luga o le alatele, na mafua ai ona manatu le Ofisa o le OMV e lesitala le ta’avale e ui e leai se pepa e faamaonia ia.
O le aso na sosoo ai, Me 10, na toe faafesootai ai e Leoleo Suesue le ua molia ma talosaga ina ia oo atu i le Ofisa mo le faaauauina o le talanoaina o lenei mataupu.
Ina ua toe feiloa’i le ua molia ma Leoleo Suesue, sa fesiligia ai loa o ia mo se faamaoniga o le tupe e $32,000 lea ua mae’a ona teu i totonu o lana teugatupe i le Faletupe o le USAA. Na taumafai le ua molia e faaaoga lana telefoni e saili ai faamaumauga o lana teugatupe, peita’i ina ua tuana’i le 3 minute, sa ia toe faapea atu ai i Leoleo Suesue, sa ia faaaogaina le isi auala faaonapo nei (Pay Pal App) e teu atoa ai le tinoitupe i totonu o lana teugatupe i le Faletupe o le USAA.
Na faamanatu e Leoleo Suesue ia Siua-Gaoteote, e le mafai ona teu ni tinoitupe e faaaoga ai le “Pay Pal App”.
O le taimi lea na vaaia ai loa le ua molia ua na o le nofo ua le gagana. Sa ia talosagaina ai loa Leoleo Suesue mo se avanoa e mafaufau ai i se auala e toe totogi ai le tupe a le Tina ua aafia.
O le aso 11 o Me na sainia ai e le Ofisa o le Loia Sili se poloaiga e taofi ai Siua-Gaoteote mai lona tuua o le atunu’u.
Na ta’utino le ua molia i Leoleo Suesue, o le a la galulue ma lona tuagane o Lote e saili se auala e toe totogi ai le tinoitupe atoa e $32,000 a le Tina na aafia.
E oo mai i le taimi na pu’e faapagota ai e Leoleo le ua molia, e augapiu ma se sene enaena o le tupe ua toe totogi.
