Ditën e sotme kryedemokrati, Lulzim Basha është takuar me disa mjekë, ku ka dëgjuar nga afër problemet që ata po hasin në punë, në përballimin e pandemisë së koronavirusit.
Në një postim në Facebook, Basha thotë se mjekët folën pa doreza edhe për skemën e manipulimit të të vërtetës me njerëzit, që humbin jetën nga COVID.
Më tej ai ka treguar edhe kërkesat ndaj qeverisë të ekpertëve të shëndetësisë, ku përfshihen “kërkojnë testimin masiv dhe gjurmimin e kontakteve, rimbursimin e ilaçeve, hapjen e spitaleve rajonale, mbrojtjen e mjekëve dhe infermierëve dhe mbështetjen financiare të tyre.”
Postimi i plotë:
Konsultimi me mjekët ka qenë dhe mbetet një konstante e përpjekjeve që po bëjmë për të gjetur rrugët për tejkalimin e situatës kritike të krijuar nga pandemia dhe keqmenaxhimi i saj. Zëri dhe qëndrimi i mjekëve duhet të jetë i pari që duhet dëgjuar siç është e para dhe e vetmja përpjekja dhe ndihma që mjekët po u japin qytetarëve sot.
Ekspertët e shëndetësisë, me të cilët zhvillova një takim të frytshëm, kërkojnë testimin masiv dhe gjurmimin e kontakteve, rimbursimin e ilaçeve, hapjen e spitaleve rajonale, mbrojtjen e mjekëve dhe infermierëve dhe mbështetjen financiare të tyre. Mjekët folën pa doreza edhe për skemën e manipulimit të të vërtetës me njerëzit që humbin jetën nga COVID.
Edhe sa jetë shqiptarësh duhet të humbim që Edi Rama të ndalë fajësimin dhe përbaltjen e mjekëve dhe të marrë përsipër përgjegjësinë që i ngarkon ligji?
Shqipëria kërkon një shpresë të re. Shqipëria ka nevojë për një qeveri që kujdeset për qytetarët e saj – që mposht pandeminë dhe ringjall ekonominë.
Ne do ta shërojmë Shqipërinë dhe do ta sjellim këtë shpresë të re për vendin.
j.l./ dita
