Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Մարտի 22-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Ժողովուրդների հոգևոր միասնության միջազգային հիմնադրամի նախագահ փ․գ․դ․ Վալերի Ալեքսեևին։
Հանդիպմանը հիմնադրամի նախագահը, ուրախություն հայտնելով վերստին Մայր Աթոռ Սուրբ Էջմիածին իր այցի առիթով, Վեհափառ Հայրապետին ներկայացրեց անցած տարիների ընթացքում հիմնադրամի արձանագրած ձեռքբերումները և առաջիկա անելիքները։ Այս կապակցությամբ պրն․ Վ․ Ալեքսեևը տեղեկացրեց նաև ԱՊՀ երկրներում 2023 թվականը ռուսաց լեզվի տարի հռչակման առիթով հիմնադրամի կողմից ծրագրվող միջոցառումների, ի մասնավորի «Ռուս գրողները և ուղղափառությունը» տասներկու հատորանոց մատենաշարի շնորհանդեսի վերաբերյալ։
Ամենայն Հայոց Կաթողիկոսը, իր օրհնությունն ու բարեմաղթանքները բերելով Ժողովուրդների հոգևոր միասնության միջազգային հիմնադրամի նախագահին, գնահատանքով անդրադարձավ հիմնադրամի գործունեությանը, որն ուղղված է քրիստոնյա ժողովուրդների միջև հոգևոր-մշակութային կապերի ընդլայնմանն ու զորացմանը, հոգևոր-բարոյական արժեքների պաշտպանությանն ու ամրապնդմանը, Եկեղեցիների հոգևոր, կրթական ու սոցիալական առաքելությանը սատարելուն։ Նորին Սրբությունը ողջունեց նաև ներկայացված ծրագրերը, որոնք պիտի նպաստեն փոխճանաչմանը և ժողովուրդների միջև մշակութային կապերի սերտացմանը։
Զրույցի ընթացքում անդրադարձ կատարվեց երկրների և ժողովուրդների առջև ծառացած մարտահրավերներին, տարածաշրջանում առկա անվտանգային սպառնալիքներին, ինչպես նաև խաղաղության և կայունության հաստատման ուղղությամբ ներդրվող ջանքերին։
Մայր Աթոռ Սուրբ Էջմիածին
