ԱՄՆ պետքարտուղար Էնթոնի Բլինկենը Ֆիլիպիններում կայացած մամուլի ասուլիսի ժամանակ հայտարարել է, որ Չինաստանի որոշումը՝ դադարեցնել համագործակցությունը Միացյալ Նահանգների հետ մի շարք ոլորտներում՝ ի պատասխան Ներկայացուցիչների պալատի խոսնակ Նենսի Փելոսիի Թայվան կատարած այցի, անպատասխանատու է։
Պեկինի կողմից կլիմայի փոփոխության շուրջ ԱՄՆ-Չինաստան երկխոսության դադարեցումը երկարաժամկետ հետևանքներ կունենա ոչ միայն երկու երկրների, այլև ողջ աշխարհի ապագայի համար, ասել է Պետդեպարտամենտի ղեկավարը։ Բլինկենն ընդգծել է, որ Վաշինգտոնը շահագրգռված է Պեկինի հետ կապի ուղիների պահպանմամբ և տարաձայնությունների հարթմամբ։
Բլինկենը նաև կշտամբել է Չինաստանին՝ Փելոսիի Թայվան խաղաղ այցին անհամաչափ միջոցներ ձեռնարկելու համար։ Մասնավորապես, օգոստոսի 4-ին Պեկինը զորավարժություններ է սկսել կղզու շրջակա ջրերում և օդում, որոնց ընթացքում արձակել է 11 բալիստիկ հրթիռ։ Դրանցից հինգը վայրէջք է կատարել Ճապոնիայի բացառիկ տնտեսական գոտում։
Չինաստանի արտաքին գործերի նախարար Վան Ին Փելոսիի ժամանումը անվանել է «բացահայտ կանխամտածված սադրանք», որը նախապես ծրագրված էր ամերիկյան կողմից։ Նախարարությունը բողոքել է՝ ասելով, որ Ներկայացուցիչների պալատի նախագահի այցը «մեծապես ազդել է չին-ամերիկյան հարաբերությունների քաղաքական հիմքի վրա, խախտել է Չինաստանի ազգային ինքնիշխանությունն ու տարածքային ամբողջականությունը և լրջորեն խաթարել Թայվանի նեղուցի կայունությունը»։
