Մեծ Բրիտանիայի պաշտպանության նախարարության հետախուզությունն այսօրվա զեկույցը նվիրել է Դոնեցկի շրջանի Ավդեեվկա քաղաքի շուրջ ռազմական գործողություններին և ռուսական բանակի մարտունակությանը, հայտնում է BBC-ն։
Վերջին օրերին Ռուսաստանը շարունակում է առաջնահերթություն տալ Դոնեցկի շրջանի Ավդեեվկա քաղաքի շրջափակմանը, սակայն ռուսական զորքերը քիչ առաջընթաց են գրանցել՝ զրահատեխնիկայի մեծ կորուստների գնով, նշվում է զեկույցում։
Փորձելով շրջափակել Ավդեեվկան հարավից՝ ռուսական 10-րդ տանկային գունդը հավանաբար կորցրել է իր մարտական մեքենաների մեծ մասը։ Գունդը 3-րդ բանակային կորպուսի մաս է՝ առաջին խոշոր նոր կազմավորումը, որը Ռուսաստանը ստեղծել է 2022 թվականի օգոստոսին Ուկրաինա ներխուժմանը աջակցելու համար։
Բաց աղբյուրներից ստացված տվյալները ցույց են տալիս, որ 3-րդ բանակային կորպուսում զինվորականների կարգապահության և մարտական ոգու հետ կապված խնդիրներ կան. ռազմական կազմավորումը ցույց է տալիս սահմանափակ մարտունակություն, ասում են վերլուծաբանները:
Նրանց կարծիքով, 10-րդ տանկային գնդի կորուստները, հավանաբար, պայմանավորված են եղել մարտավարական սխալներով, մասնավորապես՝ ճակատային գրոհներով, որոնք նման են ռուսական զրահատեխնիկայի այլ վերջին անհաջող հարձակումներին, օրինակ՝ Ուգլեդար քաղաքի շուրջ։
