Մեծ Բրիտանիայի պաշտպանության նոր նախարար Գրանտ Շապսն ասել է, որ բրիտանական զորքերն առաջին անգամ կտեղակայվեն Ուկրաինայում։ Նման ծրագրերն արդեն քննարկվում են ռազմական ղեկավարության հետ։
The Telegraph-ին տված հարցազրույցում Գրանտ Շապսն ասել է, որ բանակցություններ է վարում բրիտանական բանակի պաշտոնյաների հետ՝ ուկրաինացի զինվորականների համար բրիտանական պաշտոնական ուսումնական ծրագիրը ուղղակիորեն Ուկրաինա տեղափոխելու վերաբերյալ, այլ ոչ թե բրիտանական և ՆԱՏՕ-ի այլ անդամների բազաներում: Նա նաև կոչ է արել բրիտանական պաշտպանական ընկերություններին գործարաններ բացել Ուկրաինայում:
Նշվում է, որ Շապսն անցյալ շաբաթ այցելել է Ուկրաինա։ Նրա խոսքով՝ ինքը Վլադիմիր Զելենսկու հետ քննարկել է, թե ինչ դեր կարող է ունենալ բրիտանական նավատորմը առևտրային նավերը Սև ծովում ռուսական հարձակումներից պաշտպանելու գործում։ Լրագրողները նշում են, որ այս երկու քայլերն էլ կնշանակեն բրիտանական ներգրավվածության զգալի էսկալացիա՝ Ուկրաինան Պուտինի ներխուժումից պաշտպանելու գործում, ասվում է հոդվածում։
