Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
«Աշխարհում հայերին վերաբերող հարցերը լուծելու համար ամենամեծ գործիքակազմն ու հնարավորություններն ունի ՀՀ կառավարությունը»,- ՀՀ կառավարության դիմաց ՀՅԴ ՀԵՄ երիտասարդների կազմակերպած բողոքի ցույցի ժամանակ հայտարարեց «Հայաստան» խմբակցության պատգամավոր Քրիստինե Վարդանյանը:
Հիշեցնենք՝ երիտասարդներն իրենց բերանները կապել էին կարմիր ժապավեններով՝ ներկայացնելով իրենց բողոքի ձայնը, որ 100 օր 120 հազար մեր հայրենակիցներ շրջափակման մեջ են, բայց ՀՀ իշխանությունները լուռ են:
Քրիստինե Վարդանյանը փաստեց՝ դա ՀՀ իշխանությունների առաջնային պարտականությունն է. «Այստեղ կա երկրորդ հանգամանքը. դա իրավունք չէ, այլ պարտականություն: Հիմա էլ ստեղծվել է մի իրավիճակ, երբ Արցախում 12 հազար հայեր, որոնք ունեն ՀՀ անձնագիր, որոնք գտնվում են ամբողջական շրջափակման մեջ, ոտնահարվում են նրանց բնական իրավունքները, երկրի փաստացի ղեկավարը հայտարարում է, որ ցեղասպանության առաջ են կանգնած, բայց տեսնում ենք զրո գործնական քայլեր: Տեսնում ենք ԵՄ և այլ երկրների հայտարարությունները, դաշնակցի քայլերը, ջանքերը, այսօր ՀՀ սահմանին ՀՀ քաղաքացուն հետ բերել փորձելով՝ ՌԴ զինվորներ են վիրավորվել, տեսնում ենք՝ ՀՀ իշխանությունները մեղքը բոլորի հասցեին են հնչեցնում: Եթե բոլորն են մեղավոր, իշխանությունն ինչի՞ համար է»:
Քրիստինե Վարդանյանն օրինակ բերեց, որ եթե տասը մարդ դուրս գա ու փողոց փակի, կգան, կասեն, սահմանափակում եք ՀՀ քաղաքացիների ազատ տեղաշարժն ու ասաց. «Բա 120 հազար հայերի ազատ տեղաշարժի համար ո՞վ պետք է պայքարի»:
ՀՀ ԱԺ «Հայաստան» խմբակցության պատգամավոր Ասպրամ Կրպեյանն էլ նշեց. «Ես զարմանում եմ, որ դեռ մենք՝ ազգային դաշտում գտնվող արժանապատիվ հայ մարդիկս, որևէ ակնկալիք ունենք ՀՀ-ում իշխանությունը օկուպացրած որևէ ներկայացուցչից: Իրենք չեն թաքցնում, որ հստակ հրաժարվել են Արցախից, այնտեղ բնակվող հայերի ինքնորոշման իրավունքի իրացումից: Նրանց թողել են բախտի քմահաճույքին, գերության մեջ: Իրենց պատճառով է, որ նրանց անվտանգությունը, իրավունքների պաշտպանությունը հանձնվել է երրորդ երկրի ներկայացուցիչներին: Հիմա ասում են՝ մենք ի՞նչ անեք, մենք պիտի 120 հազարին զոհենք, որ այստեղ բնակվող երեք միլիոնին փրկենք: Այն անհոգությամբ, դավադրությամբ ու վճռականությամբ, որով իրենք հիմա զոհում են և գերության մեջ, ցեղասպանության վտանգի առաջ են թողնում 120 հազար ՀՀ քաղաքացիներին, թող որևէ մեկը չկասկածի, որ մեզնից յուրաքանչյուրին են այդ կարգավիճակում թողնելու: Իրենց գերնպատակը ոչ թե հայկական պետականության գոյություն ապահովելն է, այլ այդ պետականությունը վերջնականապես կազմաքանդելն է և իրենց իշխանությունը պահպանելն է»:
Փաստմանը՝ ՀՀ ԱԺ-ում ՔՊ-ն ձեռնպահ քվեարկեց Լաչինի միջանցքի շրջափակման հարցով հայտարարությանը և հարցին՝ դա ինչպե՞ս կմեկնաբանեք, Ասպրամ Կրպեյանը պատասխանեց. «Սկզբում իրենց պահանջն էր, որ հայտարարությունից հանվի Արցախի հանրապետություն, հետո Լեռնային Ղարաբաղի հանրապետություն ձևակերպումները՝ դրանք փոխարինելով վերացական ձևակերպմամբ՝ Արցախում բնակվող հայերի իրավունքները: Դա ուղղակի ծիծաղաշարժ է: Ես երբևէ չէի մտածում, որ ՀՀ-ում կարող են գալ իշխանության մարդիկ, որոնք կհանդգնեն կասկածի տակ դնել Արցախի հայկականությունը, մեր անկախության կարևորագույն հիմնասյունը հանդիսացող արցախյան շարժումը կարող են ստորադասել իրենց հեղաշրջմանը և կհանդգնեն պարզապես հայ մարդուն սկուտեղի վրա հանձնել թշնամուն: Եվ զարմանալի չէ: Դրա համար բազում պատճառներ են փորձում գտնել, որոնցից յուրաքանչյուրը նույնքան ծիծաղաշարժ է, ինչքան և բոլոր այն քայլերն ու գործողությունները, որոնք մեր պետականության դեմ և մեր հայրենակիցների նկատմամբ ցուցաբերում են: Ծիծաղաշարժ՝ բառի ամենադժբախտ ու դժգույն իմաստով»:
Տաթև ՀԱՐՈՒԹՅՈՒՆՅԱՆ
