Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Մարտի 27-ի գիշերը Իսրայելում բազմամարդ ցույցեր են տեղի ունեցել այն բանից հետո, երբ երկրի վարչապետ Բենյամին Նեթանյահուն հեռացրել է պաշտպանության նախարար Յոավ Գալանտին, որը հանդես էր գալիս դատական բարեփոխումների դեմ:
Ըստ Haaretz-ի՝ ցույցերը տեղի են ունեցել ավելի քան 150 վայրերում, մի շարք դեպքերում ցուցարարները արգելափակել են ճանապարհները: Թել Ավիվում հարյուրավոր ցուցարարներ կանգնեցրել են երթևեկությունը հիմնական մայրուղու՝ Այալոնի վրա: Երուսաղեմում մոտ 1000 ցուցարարներ հավաքվել են վարչապետի նստավայրի առջև, մոտ 1000 ցուցարարներ էլ երթով անցել են խորհրդարանի շենքի առջևով:
Թե, ընդհանուր առմամբ, քանի մարդ է մասնակցել ցույցերին՝ հայտնի չէ: The Times of Israel-ը, վկայակոչելով տեղի հեռուստաալիքներին, հայտնել է, որ հարյուր հազարավոր մարդիկ են փողոց դուրս եկել, մինչդեռ Haaretz-ը խոսում է տասնյակ հազարավորների մասին:
Ցույցերն ավարտվել են վաղ առավոտյան, երբ ոստիկանությունը ջրցան մեքենաներով ցրել է դրանք: Որոշ տեղեկություններով՝ ցուցարարները ուժայինների ուղղությամբ քարեր, շշեր և այլ առարկաներ են նետել: Ըստ The Jurasalem Post-ի՝ վիրավորվել է առնվազն երեք ոստիկան: Հաղորդվում է նաև, որ կան մի քանի բերման ենթարկվածներ:
Կատարվածի ֆոնին վարչապետը քննարկումներ է սկսել իր կոալիցիայի անդամների հետ՝ բարեփոխումների մասին օրենքը սառեցնելու վերաբերյալ: Ակնկալվում է, որ այսօր Նեթանյահուն հանդես կգա հարցի վերաբերյալ հանրային ելույթով:
Երկրի նախագահ Իցխակ Հերցոգն էլ կոչ է արել կառավարությանը դադարեցնել դատական ռեֆորմը՝ հանուն «Իսրայելի ժողովրդի միասնության, հանուն այն պատասխանատվության, որը մենք պարտավոր ենք ստանձնել»:
Հունվարի սկզբից Իսրայելում պարբերաբար զանգվածային ցույցեր են տեղի ունենում դատական բարեփոխման դեմ, ըստ որի նախատեսվում է սահմանափակել Գերագույն դատարանի լիազորությունները: Եթե օրինագիծն ընդունվի, Իսրայելի կառավարությունը լիարժեք վերահսկողություն կստանա դատավորների նշանակման գործում:
Մարտի 26-ին վարչապետ Բենյամին Նեթանյահուն հեռացրեց պաշտպանության նախարար Յոավ Գալանտին, քանի որ վերջինս դեմ էր դատական բարեփոխմանը: Դրանից մեկ օր առաջ նախարարը կոչ էր արել իշխանություններին ժամանակավորապես սառեցնել օրինագծի ընդունումը և փոխադարձ համաձայնության հասնել այդ հարցում: Նեթանյահուն հայտարարել է, որ կորցրել է վստահությունը նախարարի հանդեպ, քանի որ նա «գործել է կառավարության թիկունքում»:
Պատրաստեց Վիկտորյա ԱՆԴՐԵԱՍՅԱՆԸ
