Կրեմլը ծրագրել էր բելառուսական բանակն Ուկրաինայի դեմ պատերազմի մեջ ներգրավելու արմատական տարբերակ։ Մասնավորապես, Ռուսաստանը նախատեսում էր վերացնել Բելառուսի ինքնահռչակ նախագահ Ալեքսանդր Լուկաշենկոյին եւ վերահսկողություն հաստատել նրա բանակի վրա։ Ռուսական ռազմական ղեկավարության աղբյուրները հաստատել են, որ Կրեմլն արդեն որոշում է կայացրել Լուկաշենկոյին վերացնելու մասին, գրում են Ռոբերտ Լանսինգի ինստիտուտի (RLI) վերլուծաբանները։
Կրեմլը նախատեսում է Լուկաշենկոյի վերացման «ՆԱՏՕ-ի հետախուզության ղեկավարությամբ Ուկրաինայի և Լեհաստանի մասնակցության մասին» շինծու ապացույցներ ներկայացնել, նույնիսկ եթե մահափորձը ձախողվի։ Այս իրավիճակը պաշտոնապես պատճառ կդառնա Ուկրաինայի դեմ պատերազմին բելառուսական զորքերի հետագա մասնակցության համար, գրում են վերլուծաբանները։
Ռուսաստանի Դաշնության ռազմական հետախուզությունն առաջիկա օրերին կարող է փորձել սցենար մշակել կամ Բելառուսի նախագահ Ալեքսանդր Լուկաշենկոյի մահափորձով, կամ դրա իմիտացիայով։ Այս գործողության նպատակը Բելառուսի բռնապետին վախեցնելն է լինելու՝ նրան դրդելով հրաման տալ պատերազմի մեջ մտնել Ռուսաստանի կողմից։
Հետախուզության գլխավոր վարչությունն արդեն աշխատում է գործողության ընթացքում Լուկաշենկոյին վերացնելու սցենարի վրա։ Ենթադրվում է, որ այդ ժամանակ նրա աթոռը կզբաղեցնի ՀԱՊԿ ներկայիս գլխավոր քարտուղար Ստանիսլավ Զասը, որը ծնունդով Չեռնիգովի մարզից է, ով լիովին հավատարիմ է Ռուսաստանի Դաշնությանը, ասվում է հոդվածում։
Վերլուծաբանները չեն բացառում, որ Ռուսաստանը ցանկանում է միավորել երկու բանակներն իր մեկ հրամանատարության ներքո։ Այդ ժամանակ Լուկաշենկոն կկորցնի երկիրը կառավարելու հնարավորությունը։ Այժմ մեծ ռիսկ կա, որ բռնապետը կկորցնի իր պաշտոնը, իսկ նրա տեղը կզբաղեցնի խամաճիկ Զասը։
«Ռուսաստանը, ամենայն հավանականությամբ, զինված սադրանքներ կկատարի Բելառուսում՝ Լուկաշենկոյին պատերազմի մեջ մտնելուն դրդելու համար: Բայց իշխանությունը կորցնելու վախը կմնա նրա հիմնական խոչընդոտը այս քայլի համար: Մոսկվայի աղբյուրների վերջին հաղորդագրությունները հաստատում են ինստիտուտի վերլուծաբանների նախկին եզրակացությունները՝ հօգուտ դրամատիկ սցենարի Ալեքսանդր Լուկաշենկոյի համար», գրում են վերլուծաբանները։
