Views: 1
ប្រែសម្រួល : កញ្ញាដាលីស (ស្ត្រេតថែមស៍) ៖ ជាងពីរឆ្នាំចូលទៅក្នុងជំងឺរាតត្បាត ក្រុមហ៊ុន Appleបានធ្វើការជំរុញដ៏ធំមួយកាលពីថ្ងៃចន្ទ ទី៦ មិថុនាដើម្បីត្រឡប់ទៅរកប្រក្រតីភាពវិញដោយអញ្ជើញអ្នកបង្កើតសូហ្វវែនិងអ្នកកាសែតរាប់រយនាក់ទៅកាន់បរិវេណជំរំរបស់ខ្លួនសម្រាប់ការបង្ហាញប្រព័ន្ធសូហ្វវែចុងក្រោយបំផុតរបស់ខ្លួនដែលរួមបញ្ចូលការកែលម្អទាំងស្រុងចំពោះរឿងដំបូងបំផុតដែលគ្រប់អ្នកប្រើ iPhone ក្រឡេកមើល គឺ Lock Screen។
ក្រុមហ៊ុនបាននិយាយថា ខ្លួនកំពុងនាំមកនូវលក្ខណៈផ្ទាល់ខ្លួនកាន់តែច្រើនដល់ iPhone ជាមួយនឹងសមត្ថភាពក្នុងការកំណត់ Lock Screen តាមបំណងរបស់អ្នកប្រើជាមួយនឹងពណ៌ចម្រុះ Widget និងសកម្មភាពមានចលនានៅលើអេក្រង់។
សូហ្វវែថ្មីនេះនឹងអនុញ្ញាតឱ្យអ្នកប្រើប្រាស់ iPhone បង្កើត Lock Screen ផ្ទាល់ខ្លួនសម្រាប់សេណារីយ៉ូផ្សេងៗ ដូចជាអេក្រង់សម្រាប់ការងារដែលបង្ហាញប្រក្រតិទិនជាមុន ឬ អេក្រង់ផ្ទាល់ខ្លួន ដែលបង្ហាញទិន្នន័យសកម្មភាពហាត់ប្រាណ។
មុខងារសូហ្វវែថ្មី ដែលជាផ្នែកមួយនៃប្រព័ន្ធប្រតិបត្តិការ iOS 16 ថ្មីរបស់ Apple សម្រាប់ iPhone បានឆ្លុះបញ្ចាំងពីអ្វីដែល Google បានណែនាំសម្រាប់ប្រព័ន្ធ Android របស់ខ្លួនកាលពីឆ្នាំ ២០២១។
Google បានបង្កើតកម្មវិធី Material You ដែលអនុញ្ញាតឱ្យអ្នកប្រើប្រាស់ផ្លាស់ប្តូររូបរាង Lock Screen របស់ពួកគេដោយទាញចេញពីពណ៌នៅក្នុងផ្ទាំងរូបភាព Home Screen របស់ពួកគេ។
ក្រៅពីការអាប់ដេតទាំងនោះ ក្រុមហ៊ុន Apple បាននិយាយថា ខ្លួនកំពុងកែលម្អប្រព័ន្ធផ្ញើសាររបស់ខ្លួនទាំងស្រុង ដោយអនុញ្ញាតឱ្យមនុស្សអាចឆែកមើលឡើងវិញ និងកែសម្រួលអត្ថបទបន្ទាប់ពីពួកវាត្រូវបានផ្ញើរួច។ វាក៏មានសមត្ថភាពថ្មីក្នុងការសរសេរសារដោយប្តូរគ្នាយ៉ាងរលូនរវាងការវាយអក្សរ និងការបញ្ជាសរសេរដោយសំឡេងផងដែរ។
ក្រុមហ៊ុនក៏បានបង្ហាញផងដែរនូវកម្មវិធី Safety Check ជាសមត្ថភាពមួយសម្រាប់អ្នកប្រើ iPhone ចែករំលែកទិន្នន័យផ្ទាល់ខ្លួនជាមួយអ្នកដទៃ ដូចជា ទីតាំង និងដកហូតសិទ្ធិប្រើទិន្នន័យទាំងនោះវិញដើម្បីគេចចេញពីទំនាក់ទំនងដែលមានការរំលោភបំពាន៕
ប្រព័ន្ធសូហ្វវែចុងក្រោយបំផុតរបស់ Apple រួមបញ្ចូលការកែលម្អទាំងស្រុងចំពោះរឿងដំបូងបំផុតដែលគ្រប់អ្នកប្រើ iPhone ក្រឡេកមើល គឺ Lock Screen
