ខេត្តស្វាយរៀង ៖ អគ្គិភ័យមួយឆាបឆេះសន្ធោរសន្ធៅលើផ្ទះក្បឿង២ខ្នង ដែលសង់ពីថ្មខាងក្រោមឈើអស់ទាំងស្រុង និងឆេះខូចខាតទ្រព្យសម្បត្តិមួយចំនួន រួមមានមាស០៧តម្លឹង, ប្រាក់០៥លានរៀល, ប្រាក់ដុល្លារ១,០០០ដុល្លារ ព្រមទាំងសម្ភារមួយចំនួនធំ ។ ករណីនេះកើតឡើង កាលពីថ្ងៃទី០២ មិថុនា វេលាម៉ោង៤និង៤៥នាទីរសៀល ភូមិបន្ទាយ ឃុំកណ្តៀងរាយ ស្រុកស្វាយទាប ។
បើតាមសមត្ថកិច្ចឃុំកណ្តៀងរាយបានឲ្យដឹងថា ភ្លើងអគ្គិភ័យឆាបឆេះផ្ទះរបស់ជនរងគ្រោះឈ្មោះពេជ្រ ណារិន ភេទប្រុស អាយុ៦៤ ឆ្នាំ និងប្រពន្ធឈ្មោះឥន សុខឿនអាយុ៦១ឆ្នាំ រស់នៅភូមិបន្ទាយ ឃុំកណ្តៀងរាយ ស្រុកស្វាយទាបខេត្តស្វាយរៀង ។ ប្រភពបន្តថា ផ្ទះដែលត្រូវភ្លើងអគ្គិភ័យឆាបឆេះនោះសង់អំពីបេតុងថ្មខាងក្រោមឈើពីលើដំបូលប្រក់ក្បឿង ដោយមានទំហំបណ្តោយ០៩ម៉ែត្រ ទទឹង០៨ម៉ែត្រជញ្ជាំងក្តារនាបក្តារ ត្រូវឆេះអស់ទាំងស្រុង ទើបមានរថយន្តពន្លត់អគ្គីភ័យទៅដល់ភ្លើងពេញក្រមុំ មិនអាចពន្លត់បាន ក៏ប៉ុន្តែបានពន្លត់ភ្លើងរលត់ មិនឲ្យឆាបឆេះទៅដល់ផ្ទះប្រជាពលរដ្ឋដែលរស់នៅជិតខាង។
ប្រភពបន្តទៀតថា សម្ភារខូចខាតរួមមាន៖១/មាសចំនួន ៧ដំឡឹង២/ប្រាក់ចំនួន៥ លានរៀល៣/ប្រាក់ដុល្លារចំនួន ១,០០០ដុល្លារនិង សំលៀកបំពាក់ គ្រឿងសង្ហារឹម សម្ភារប្រើបាស់ និងសម្ភារពេទ្យមួយចំនួនទៀតក្លាយជាផេះ ក្នុងករណីនេះបណ្តាលឲ្យប្រពន្ធម្ចាស់ផ្ទះរងរបួសស្រាល។
ចំពោះមូលហេតុគឺបណ្តាលមកពីឆ្លងចរន្តអគ្គិសនី ខណៈម្ចាស់ផ្ទះមិននៅ ចេញទៅក្រៅមួយភ្លែតត្រឡប់មកវិញឃើញអណ្តាតភ្លើងឆាបឆេះសន្ធោសន្ធៅទៅហើយ ស្ត្រីម្ចាស់ផ្ទះព្យាយាមចូលទៅយកទ្រព្យសម្បត្តិក៏ត្រូវអណ្តាតភ្លើងឆាបឆេះធ្លាក់ឈើមកលើបណ្តាលឲ្យរងរបួសត្រូវអ្នកស្រុកចាប់លែងឲ្យចូល ។ដោយអាកាសធាតុក្តៅ ខ្លាំងនិងមានខ្យល់ ទើបអណ្តាតភ្លើងឆាបឆេះលឿន ពេលរថយន្តពន្លត់អគ្គីភ័យមកដល់ភ្លើងឆេះពេញក្រមុំមិនអាចពន្លត់បានត្រូវឆេះអស់ទាំងស្រុងតែម្តងសល់តែគុំនរផេះ ចូលរួមសោកស្តាយផង៕