Views: 2
ដោយៈ ទេពកង្រី / កំពង់ឆ្នាំង: នៅព្រឹកថ្ងៃទី២៥ ឧសភា ២០២២ សាលាបឋមសិក្សាគំរូ ក្រុងកំពង់ឆ្នាំង មានរៀបចំសច្ចាប្រណិធាន និងបំពាក់កន្សែងកាយរិទ្ធិ ជូនប្អូនៗ ចំនួន ១៥០ នាក់។
ពិធីនេះប្រារព្ធធ្វើឡើង ក្រោមអធិបតីភាព ប្រធានមន្ទីរអប់រំ យុវជន និងកីឡា លោក ស៊ឹម ប្រឹម លោក ញ៉ែ មុន្នី ប្រធានការិយាល័យអប់រំ យុវជន និងកីឡាក្រុងកំពង់ឆ្នាំង លោក ម៉ម ច័ន្ទថាត ប្រធានគណៈកម្មការគ្រប់គ្រងសាលារៀន ព្រមទាំងលោកគ្រូអ្នកគ្រូ ២០០ នាក់ និងសិស្សានុសិស្ស ដែលត្រូវបំពាក់កន្សែងកាយរឹទ្ធិ ចំនួន ១៥០ នាក់ ។
នាយកសាលាគំរូក្រុងកំពង់ឆ្នាំង បានថ្លែងកោតសរសើរ ចំពោះលោកគ្រូអ្នកគ្រូ ដែលបានយក អស់កម្លាំងកាយចិត្ត កម្លាំងប្រាជ្ញាស្មារតី សហការល្អ ខិតខំប្រឹងប្រែងច្នៃប្រឌិត និងផ្ដល់បច្ចេក ទេស ជូនដល់ក្មួយៗកាយរិទ្ធិ ដែលបានសិក្សារៀនសូត្រ អំពីច្បាប់ គោលការណ៍បច្ចេកទេស ពិធីកាយរឹទ្ធិ ឆ្លើយតបបានទៅនឹងគោលបំណង នៃពិធីសច្ចាប្រណិធាន និងបានបំពាក់កន្សែង នៅពេលនេះ វាជាកិច្ចការទាំងអស់នេះ ធ្វើឡើងដើម្បីរួមចំណែកយ៉ាងសំខាន់ ក្នុងការកសាង ធនធានមនុស្ស វ័យក្មេង នៅពេលអនាគត ។
នាយកសាលាបឋមសិក្សាគំរូ ក្រុងកំពង់ឆ្នាំង បានបញ្ជាក់ថាៈ ការបង្កើតឲ្យមានកាយរិទ្ធជាតិ កម្ពុជា គឺជាការងារចាំបាច់ ដែលមិនអាចខ្វះបាន សម្រាប់ការអប់រំ ទាំងក្នុងនិងក្រៅប្រព័ន្ធ ដើម្បីអភិវឌ្ឍន៍កុមារ យុវជន ឱ្យមានសក្តានុពលភាព ពេញលេញ ទាំងផ្លូវកាយ ទាំងផ្លូវចិត្ត បញ្ញាស្មារតី មានការទទួលខុសត្រូវចំពោះខ្លួនឯង និងសង្គមជាតិ ក្លាយជាពលរដ្ឋល្អ ចេះរួមរស់ជាមួយគ្នា ដោយភាពសុខដុមរមនា និងប្រកបដោយសេចក្តីសុខសន្តិភាព ឯកភាពជាតិ ទាំងក្នុងសហគមជាតិ និងអន្តរជាតិ ។
ដោយឡែក លោកប្រធានមន្ទីរអប់រំ យុវជន និងកីឡាខេត្តកំពង់ឆ្នាំង បានលើកឡើងថាៈ រាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាមគ្គុទេសក៍ ប្រកបដោយគតិបណ្ឌិត ដែលសម្ដេចតែងតែបាន ចាត់ទុក និងមានប្រសាសន៍ថា ប្អូនកុមារ ជាទំពាំងស្នងឫស្សី ជាកម្លាំងស្នូល ជាកោសិកាជាតិ ដ៏រឹងមាំ និងជាអនាគតប្រទេសជាតិ ។
ប្រធានមន្ទីរអប់រំ បានបញ្ជាក់ថាៈ កិច្ចការនេះ មានសារៈសំខាន់ណាស់ សម្រាប់ការអភិវឌ្ឍខ្លួន របស់ក្មួយ ឱ្យប្រកបដោយសមត្ថភាព មានចំណេះដឹង ចំណេះធ្វើ សីលធម៌ និងដោយសុខ សន្តិភាព ជួយឲ្យសង្គមជាតិ មានយុត្តិធម៌ មានប្រជាធិបតេយ្យ និងនីតិរដ្ឋ ។
លោកបានផ្ដាំផ្ញើដល់ប្អូនៗ ក្មួយៗ កាយរិទ្ធទាំងអស់ នៅពេលនេះ ត្រូវគោរពឱ្យបានខ្ជាប់ខ្ជួន នូវពាក្យសច្ចាប្រណិធាន របស់កាយរិទ្ធ ដែលមានខ្លឹមសារថា ដោយយកកិត្តិយសរបស់ខ្លួន ជាសាក្សី ជួយឱ្យអស់ពីចិត្តពីថ្លើម ជាតិ សាសនា ព្រះមហាក្សត្រ ជួយសង្គ្រោះមនុស្សជាតិ គ្រប់កាលៈទេសៈ គោរពច្បាប់កាយរិទ្ធ និងថែរក្សាខ្លួនប្រាណ ឱ្យមានកាយសម្បទាមាំមួន ចិត្តគំនិតភ្ញាក់រលឹក និងមានសីលធម៌ខ្ពស់៕/V