ប្រជាពលរដ្ឋជាង៤០០នាក់ តំណាងឱ្យពលរដ្ឋ៥៥៧គ្រួសារ មកពីសហគមន៍ចំនួន៣ នៃឃុំព្រលាន ស្រុកបទុមសាគរ ខេត្តកោះកុង បានប្រមូលផ្ដុំគ្នានៅសាលាស្រុក នៅព្រឹកថ្ងៃព្រហស្បតិ៍នេះ ដើម្បីជំរុញទៅអាជ្ញាធរឱ្យពន្លឿនការដោះស្រាយវិវាទដីធ្លីជូនពួកគេ ដោយអះអាងថា ក្រុមហ៊ុនរបស់លោកឧកញ៉ា លី យ៉ុងផាត់ បានរំលោភយកជិត២០ឆ្នាំមកហើយ។
អ្នកស្រី ជុំ ស្រីនៅ ដែលអះអាងថាជាតំណាងពលរដ្ឋសហគមន៍៨៤៣ នៅភូមិកណ្ដោល ឃុំព្រលាន ប្រាប់វីអូឌីថា ពលរដ្ឋជាង៤០០នាក់នោះ មកពីសហគមន៍៨៤៣ ភូមិកណ្ដោល សហគមន៍១២៩ ភូមិធ្នុង និងសហគមន៍ព្រលាន បានប្រមូលផ្ដុំគ្នានៅមុខសាលាស្រុកបទុមសាគរ ដើម្បីដាក់ញត្តិ ដោយភ្ជាប់ជាមួយលិខិតរបស់អាជ្ញាធរមូលដ្ឋាន ដែលបញ្ជាក់ថាពួកគេបាត់បង់ដីធ្លី ទៅកាន់រដ្ឋបាលស្រុក ដើម្បីឱ្យជួយពន្លឿនការដោះស្រាយជូនពួកគេ។
តំណាងពលរដ្ឋរូបនេះឱ្យដឹងថា សហគមន៍៨៤៣ នៅភូមិកណ្ដោល មានពលរដ្ឋ១៨៥គ្រួសារ ត្រូវបានក្រុមហ៊ុនរបស់លោកឧកញ៉ា លី យ៉ុងផាត់ ឈូសឆាយរំលោភយកដីធ្លីអស់តាំងពីឆ្នាំ២០០៦ ដោយមិនបានដោះស្រាយសំណងអ្វីជូនពលរដ្ឋនោះទេ។ អ្នកស្រីបន្តថា ការប្រមូលផ្ដុំដាក់ញត្តិរបស់អ្នកភូមិ នៅថ្ងៃនេះ គឺអភិបាលស្រុកទើបឡើងកាន់តំណែងថ្ មីលោក ក្រួច បូរីសីហា មិនទទួលយកសំណើរបស់ពលរដ្ឋនោះទេ ដែលធ្វើឱ្យពលរដ្ឋបន្តប្រមូលផ្ដុំនៅមុខសាលាស្រុក រហូតមកដល់ម៉ោង២រសៀលនេះ។
អ្នកស្រីបន្ថែមថា៖ «ដីរបស់អ្នកភូមិដែលគាត់បានកាប់គាស់តាំងពីដូនតា ត្រូវក្រុមហ៊ុនលោក លី យ៉ុងផាត់ រំលោភយកដោយអត់មានសំណងជូនពួកគាត់។ ដូច្នេះហើយទើបប្រជាពលរដ្ឋនាំគ្នាតវ៉ាទាមទាររកដំណោះស្រាយ។ ប្រជាពលរដ្ឋគាត់គ្មានពេលសម្រាប់ដើរតវ៉ាទេ ប៉ុន្តែដោយសារការឈឺចាប់នឹងការបាត់បង់ដីធ្លី ទើបពួកគាត់បង្ខំចិត្តតវ៉ា ក្រែងលោបានដីហ្នឹងមកវិញ ដើម្បីធ្វើកសិកម្មដាំដុះចិញ្ចឹមជីវិត ព្រោះឥលូវកូនបាត់បង់ការសិក្សា និងបានចំណាកស្រុកទៅប្រទេសថៃអស់ហើយ»។
អ្នកស្រី ឈឺន គី ដែលអះអាងថាជាតំណាងប្រជាពលរដ្ឋសហគមន៍១២៩ នៅភូមិធ្នុង បានឱ្យដឹងដែរថា សហគមន៍នេះមានពលរដ្ឋ១២៩គ្រួសារ ដែលត្រូវក្រុមហ៊ុនរបស់លោកឧកញ៉ា លី យ៉ុងផាត់ រំលោភយកដីធ្លីដូចគ្នា។ អ្នកស្រីបង្ហាញការខកចិត្តចំពោះអភិបាលស្រុកបទុមសាគរ ដែលមិនព្រមទទួលយកញត្តិរបស់ពលរដ្ឋ។
តំណាងពលរដ្ឋរូបនេះបន្តថា ក្រោមជម្លោះដីធ្លីជាមួយក្រុមហ៊ុនស្ករអំពៅរបស់លោកឧកញ៉ា លី យ៉ុងផាត់ បានធ្វើឱ្យប្រជាពលរដ្ឋរងទុក្ខលំបាកក្នុងជីវភាព ដោយសារគ្មានដីសម្រាប់បង្កបង្កើនផល ហើយពលរដ្ឋខ្លះបានចំណាកស្រុកទៅប្រទេសថៃទាំងប្រថុយប្រថាន ខណៈពលរដ្ឋមិនក្រោម២០នាក់ បានជាប់បណ្ដឹងនៅតុលាការដោយសារតែការតវ៉ារឿងដីធ្លីនេះ។
អ្នកស្រីបន្ថែមថា៖ «សូមឱ្យសម្ដេច ហ៊ុន សែន ជួយជំរុញទៅអាជ្ញាធរថ្នាក់ក្រោម ឱ្យជួយដោះស្រាយជូនប្រជាជននៅភូមិខ្ញុំឱ្យបានឆាប់ផង ព្រោះប្រជាជនទាំងអស់គ្នាហ្នឹងកំពុងតែជួបទុក្ខលំបាក ខ្វះខាតក្នុងជីវភាពគ្រួសារ ខ្វះខាតដីធ្លីសម្រាប់ធ្វើកសិកម្មផ្សេងៗសម្រាប់ចិញ្ចឹមជីវិត»។
អ្នកស្រី ណុយ សុខ ដែលអះអាងថាជាតំណាងពលរដ្ឋសហគមន៍ភូមិព្រលាន បានឱ្យដឹងថា នៅសហគមន៍នេះមានពលរដ្ឋ២៤៣គ្រួសារ បានបាត់បង់ដីធ្លីដោយសារក្រុមហ៊ុន «កោះកុងស៊ូហ្គើ» និង «កោះកុងផ្លេនថេសិន» របស់ឧកញ៉ា លី យ៉ុងផាត់ រំលោភយក។
តំណាងពលរដ្ឋដែលកំពុងជាប់បណ្ដឹងនៅតុលាការដោយសារការតវ៉ាដីធ្លីនេះ បាននិយាយទៀតថា អ្នកស្រីបានរងភាពអយុត្តិធម៌ និងមានការឈឺចាប់ជាខ្លាំង ដោយសារអ្នកស្រីត្រូវបានក្រុមហ៊ុនរំលោភយកដីធ្លីអស់ហើយ និងត្រូវបានអាជ្ញាធរប្ដឹងទៅតុលាការថែមទៀត ក្រោយតវ៉ាទាមទារដីធ្លីរបស់ខ្លួនឯង។
អ្នកស្រីបន្ថែមថា៖ «អ៊ីចឹងខ្ញុំសូមសំណូមពរខាងតុលាការទម្លាក់ចោលការចោទប្រកាន់លើពួកខ្ញុំ និងស្នើអាជ្ញាធរដោះស្រាយដីធ្លីជូនពួកខ្ញុំ ដើម្បីបញ្ចប់ជម្លោះ ព្រោះពួកខ្ញុំជាជនរងគ្រោះបាត់បង់ដីធ្លីពិតប្រាកដមែន»។
អភិបាលស្រុកបទុមសាគរ ដែលទើបឡើងកាន់តំណែងថ្មី លោក ក្រួច បូរីសីហា មានប្រសាសន៍ថា ការដែលរដ្ឋបាលស្រុកមិនទទួលញត្តិ ឬសំណើរបស់ក្រុមពលរដ្ឋ ដោយសារជម្លោះនេះ អាជ្ញាធរពាក់ព័ន្ធបានដោះស្រាយចប់ជាច្រើនឆ្នាំមកហើយ ហើយកន្លងមក ទាំងរដ្ឋបាលខេត្តកោះកុង និងក្រសួងរៀបចំដែនដី ក៏បានចេញលិខិតបដិសេធការដោះស្រាយច្រើនដងដែរ ចំពោះករណីនេះ។
លោកបន្ថែមថា៖ «រឿងដីចម្ការអំពៅនេះ គឺយើងបានបិទចប់សព្វគ្រប់អស់ហើយចំពោះការដោះស្រាយ ហើយខ្ញុំក៏បានពន្យល់ណែនាំពួកគាត់ដែរ ប៉ុន្តែពួកគាត់មិនព្រមទទួលយក ហើយនៅតែបន្តតវ៉ា។ ខ្ញុំជឿថា ការតវ៉ានេះមានអ្នកនៅពីក្រោយ វាមានអង្គការចាត់តាំងច្បាស់លាស់ណាស់ បានគាត់ហ៊ានឡើងមកតវ៉ាដូចអ៊ីចឹង»។
កាលពីថ្ងៃទី២១ ខែកញ្ញា ឆ្នាំ២០២០ ក្រសួងរៀបចំដែនដី នគរូបនីយកម្ម និងសំណង់ បានចេញសេចក្ដីប្រកាសព័ត៌មានមួយ ដោយបដិសេធមិនដោះស្រាយជូនក្រុមពលរដ្ឋទាំងនេះទេ ក្រោមហេតុផលថា ក្រសួងបានដោះស្រាយជូនពួកគេរួចរាល់ហើយ។
មន្ត្រីសម្របសម្រួលសហគមន៍នៅសមាគមសម្ព័ន្ធសហគមន៍កសិករកម្ពុជា លោក ញ៉ិល ភាព ដែលឃ្លាំមើលជម្លោះដីធ្លីនេះ មានប្រសាសន៍ថា ករណីរដ្ឋបាលស្រុកបទុមសាគរ មិនព្រមទទួលយកញត្តិនិងសំណើផ្សេងៗរបស់ក្រុមពលរដ្ឋនោះ គឺបង្ហាញពីការមិនទទួលខុសត្រូវលើការដោះស្រាយបញ្ហា និងទុក្ខលំបាករបស់ប្រជាពលរដ្ឋដែលជាម្ចាស់ឆ្នោត។ លោកថា ការមិនទទួលញត្តិ និងមិនដោះស្រាយបញ្ហាជូនពលរដ្ឋនេះ នឹងមិនអាចធ្វើឱ្យពលរដ្ឋឈប់ដើរតវ៉ានោះទេ។
លោកបន្ថែមថា៖ «ពិសេសក្រសួងរៀបចំដែនដី ត្រូវពិនិត្យស្រាវជ្រាវទៅដល់មូលដ្ឋានជាក់លាក់។ ហើយការចុះស្រាវជ្រាវហ្នឹងឱ្យមានការចូលរួមពីគ្រប់ភាគីពាក់ព័ន្ធ ជាពិសេសប្រជាពលរដ្ឋរងគ្រោះ និងក្រុមអង្គការសង្គមស៊ីវិល ថាតើប្រជាពលរដ្ឋទាំងអស់ហ្នឹងបានទទួលសំណងពិតប្រាកដឬក៏យ៉ាងណា! សូមឱ្យមានការចុះស៊ើបអង្កេតស្រាវជ្រាវ ហើយដោះស្រាយបញ្ហាហ្នឹងជូនប្រជាពលរដ្ឋទាំងអស់គ្នា ដើម្បីកុំឱ្យពលរដ្ឋឡើងមកតវ៉ាដល់ភ្នំពេញ និងចៀសវាងការចោទប្រកាន់ផ្សេងៗលើពលរដ្ឋបន្តទៀត»។
បើតាមលោក ញ៉ិល ភាព មានពលរដ្ឋខ្ទង់ពាន់គ្រួសារទៀតដែលកំពុងមានជម្លោះដីធ្លីជាមួយក្រុមហ៊ុនស្ករអំពៅរបស់លោក លី យ៉ុងផាត់ នៅខេត្តកោះកុង ហើយមិនទាន់បានដោះស្រាយចប់។
កាលពីថ្ងៃទី៦ ខែកញ្ញា ឆ្នាំ២០២២ ប្រជាពលរដ្ឋចំនួន៨៤៣គ្រួសារ និងមានដីសរុប១ ៧២៧,៦ហិកតា ស្ថិតក្នុងស្រុកបទុមសាគរ ស្រុកស្រែអំបិល និងស្រុកថ្មបាំង ខេត្តកោះកុង ដែលអះអាងថាត្រូវបានក្រុមហ៊ុន «កោះកុងស៊ូហ្គើ» និង «កោះកុងផ្លេនថេសិន» របស់លោកឧកញ៉ា លី យ៉ុងផាត់ សមាជិកព្រឹទ្ធសភាមកពីគណបក្សប្រជាជនកម្ពុជា បានឈូសឆាយរំលោភយកដីធ្លីអស់តាំងពីឆ្នាំ២០០៦ បាននាំគ្នាដាក់ញត្តិនៅតាមក្រសួង និងស្ថាប័នមួយចំនួនក្នុងរាជធានីភ្នំពេញ ដើម្បីជំរុញឱ្យមានដំណោះស្រាយដីធ្លីជូនពួកគេផងដែរ៕
