Views: 3
ប្រែសម្រួលៈបំណង(ស្ត្រេតថែមស៍)៖ ព្រះអង្គម្ចាស់វីលៀមរបស់អង់គ្លេសបានយាងទស្សនកិច្ចដោយមិនបានជូនដំណឹងជាមុនទៅកាន់ប៉ូឡូញកាលពីថ្ងៃពុធទី២២មីនាដើម្បីអរគុណទាហានអង់គ្លេសនិងប៉ូឡូញដែលចូលរួមពាក់ព័ន្ធក្នុងការគាំទ្រអ៊ុយក្រែន មុនពេលទ្រង់យាងជួបជនភៀសខ្លួនដែលបានរត់គេចចេញពីជម្លោះជាមួយរុស្ស៊ីដើម្បីស្តាប់ទុក្ខសោកនិងបទពិសោធន៍របស់គេ។
រជ្ជទាយាទអង់គ្លេសអង្គនេះបានយាងទៅកាន់ទីក្រុងហ្សេសសូវ(Rzeszow)នៅប៉ូឡូញភាគអាគ្នេយ៍ កន្លែងដែលទ្រង់ត្រូវជួបសន្ទនាជាមួយរដ្ឋមន្ត្រីការពារជាតិប៉ូឡូញ និងមានបន្ទូលទៅកាន់សមាជិកកងកម្លាំងប្រដាប់អាវុធប៉ូឡូញនិងទាហានអង់គ្លេសដែលឈរជើងនៅទីនោះ។
ការបញ្ជូនទាហានអង់គ្លេសទៅឈរជើងនៅប៉ូឡូញជាផ្នែកនៃការពង្រឹងកម្លាំងយោធារបស់អង្គការណាតូនៅប៉ែកខាងកើតរបស់ខ្លួន ក្រោយរុស្ស៊ីចូលឈ្លានបានអ៊ុយក្រែន។
ព្រះរាជដំណើរដែលមិនបានជូនដំណឹងជាមុននេះ ត្រូវបានធ្វើឡើងក្រោយការយាមកាមផ្តល់សន្តិសុខយ៉ាងតឹងតែង តែអ្នកនាំពាក្យរបស់ព្រះអង្គបាននិយាយថា ព្រះអង្គម្ចាស់វីលៀម ចង់យាងទៅកាន់ទីនោះនិងជាអ្វីដែលទ្រង់ស្នើសុំ។
ក្នុងសេចក្តីថ្លែងការណ៍មួយផ្សាយក្នុងសារព័ត៌មានប៉ូឡូញ ព្រះអង្គម្ចាស់វីលៀម បានមានបន្ទូលថា«ខ្ញុំមកទីនេះដើម្បីចង់អរគុណដោយផ្ទាល់ទាហានប៉ូឡូញនិងអង់គ្លេសដែលធ្វើការជាមួយគ្នាជាដៃគូយ៉ាងជិតស្និទ្ធ។ខ្ញុំក៏ចង់គោរពដឹងគុណដល់ប្រជាជនប៉ូឡូញចំពោះទឹកចិត្តមនុស្សធម៌ដ៏ញ៉ាំងទឹកចិត្តរបស់គេ។អ្នកបានបើកបេះដូងធំស្មើផ្ទះរបស់អ្នក»។
ក្រោយជួបស្វាគមន៍ក្រុមទាហាន ព្រះអង្គម្ចាស់ត្រូវយាងទៅកាន់ទីក្រុងវ៉ាសូវី ដើម្បីទតប្លុកការិយាល័យមួយ ដែលត្រូវបានប្រែក្លាយទៅជាមណ្ឌលរស់នៅរបស់ស្ត្រីនិងកុមារអ៊ុយក្រែនប្រមាណ៣០០នាក់ដែលបានភៀសខ្លួនចេញពីសង្គ្រាម។
នៅថ្ងៃព្រហស្បតិ៍នេះ ព្រះអង្គម្ចាស់វីលៀមនឹងដាក់កម្រងផ្កានៅស្តូបទាហានមិនស្គាល់ឈ្មោះក្នុងរដ្ឋធានីប៉ូឡូញ មុនជួបប្រធានាធិបតី អង់សេ ឌូដា(Andrzej Duda)ដើម្បញ្ជាក់ឡើងវិញអំពីទំនាក់ទំនងដ៏ជ្រាលជ្រៅរវាងប្រទេសទាំងពីរ និងបញ្ជាក់ការគាំទ្រជាបន្តនិងការដឹងគុណរបស់ទ្រង់ចំពោះប្រជាជនប៉ូឡូញ៕
ព្រះអង្គម្ចាស់វីលៀម ជួបទាហានប៉ូឡូញនិងអង់គ្លេសនៅទីក្រុងហ្សេសសូវនៅប៉ូឡូញភាគអាគ្នេយ៍