Views: 2
ប្រែសម្រួលៈបំណង(ដេល្លីម៉េល)៖ បណ្តាទីក្រុងនៅទូទាំងប្រទេសចិនកាន់តែបន្ធូរបន្ថយការរឹតបន្តឹងប្រឆាំងកូវីដ១៩កាលពីថ្ងៃសុក្រទី២ធ្នូ ដោយបន្ថយច្បាប់ធ្វើតេស្តិ៍រកមេរោគនិងការធ្វើចត្តាឡីស័កក្រោយផ្ទុះការតវ៉ាប្រឆាំងនៅទូទាំងប្រទេសចិនដើម្បីទាមទារអោយបញ្ចប់ការបិទខ្ទប់និងផ្តល់សេរីភាពនយោបាយច្រើនឡើង។
កំហឹងនិងអារម្មណ៍មួម៉ៅចំពោះវិធានការប្រឆាំងកូវីដ១៩ចិនបានបង្ខំអោយមនុស្សរាប់រយនាក់ចេញមកតាមដងវិថីនៃទីក្រុងនានាកាលពីចុងសប្តាហ៍ក្នុងបាតុកម្មទូទៅដែលគេមិនដែលឃើញនៅចិននៅរយៈពេលប៉ុន្មានទសវត្សរ៍មកនេះ។
ក្រោយផ្ទុះការតវ៉ា ទីក្រុងចិនជាច្រើនឥឡូវបានចាប់ផ្តើមបន្ធូរបន្ថយវិធាការប្រឆាំងកូវីដ១៩ ដូចជាឈប់តំរូវអោយប្រជាជនធ្វើតេស្តិ៍រកមេរោគរាល់ថ្ងៃ និងអនុញ្ញាតអោយអ្នកកើតកូវីដធ្វើចត្តាឡីស័កនៅផ្ទះជាដើម។
ក្នុងពេលជាមួយគ្នា អាជ្ញាធរកំពុងបន្តព្យាយាមទប់កុំអោយការតវ៉ាប្រឆាំងកើតមានជាថ្មី ដោយដាក់កម្លាំងសន្តិសុខច្រើនក្រាស់ក្រែលនៅតាមដងវិថី ត្រួតពិនិត្យការប្រើបណ្តាញសង្គមនិងស៊ើបអង្កេតតាមដានប្រជាជនជាដើម។
គិតត្រឹមថ្ងៃសុក្រ ទីក្រុងឆឹងឌូឈប់លែងតំរូវអោយអ្នកចង់ចូលទីសាធារណៈ ឬជិះរថភ្លើងក្រោមដីធ្វើតេស្តិ៍រកកូវីដទៀតហើយ ដោយត្រូវការតែលិខិតបញ្ជាក់ថាពួកគេមិនបានធ្វើដំណើទៅកាន់តំបន់ផ្ទុះកូវីដតែប៉ុណ្ណោះ។នៅក្នុងទីក្រុងប៉េកាំង អាជ្ញាធរសុខាភិបាលកាលពីថ្ងៃព្រហស្បតិ៍បានអំពាវនាវដល់មន្ទីរពេទ្យនានាកុំបដិសេធការព្យាបាលមនុស្សណាដែលមិនមានការបញ្ជាក់ថាបានធ្វើតេស្តិ៍ម៉ាស៊ីនធំPCRដើម្បីបញ្ជាក់ថាមិនមានមេរោគកូវីដ១៩។
ទីក្រុងចិនជាច្រើនដែលមានការផ្ទុះកូវីដ១៩ ឥឡូវអនុញ្ញាតអោយភោជ្ជនីយដ្ឋាន ផ្សារនិងសាលារៀនបើកឡើងវិញ ដោយខុសឆ្ងាយពីការអនុវត្តវិធានការទប់ស្កាត់កូវីដដ៏តឹងតែងកាលពីមុន។នៅទីក្រុងអ៊ុយរូមគី នៃតំបន់ស៊ីនជាំង អាជ្ញាធរនៅថ្ងៃសុក្រនេះបានប្រកាសអោយភោជ្ជនីយដ្ឋាន សណ្ឋាគារ ផ្សារនិងរមណីយដ្ឋានជិះស្គីបើកដំណើរការឡើងវិញបណ្តើរៗ។
បើតាមទីភ្នាក់ងារសារព័ត៌មានរដ្ឋចិនស៊ីនហួ ដោយសារអត្រាចាក់វ៉ាក់សាំងខ្ពស់គួបផ្សំនឹងបទពិសោធន៍ក្នុងការទប់ស្កាត់ជំងឺនេះ នាំអោយការឆ្លងរាលដាលវីរុសអូមីក្រុងចុះខ្សោយ ហើយប្រទេសកំពុងមានមោទនភាពនិងកំណត់របៀបឆ្លើយតបនឹងជំងឺឆ្លងនេះឡើងវិញ៕
ផ្សារបើកឡើងវិញនិងសកម្មភាពតាមដងផ្លូវវិលមកធម្មតាវិញនៅទីក្រុងចិនជាច្រើន
អាជ្ញាធររុះរើចេញជម្រកបណ្តោះអាសន្ននៅក្រៅប្លុកអាគារដែលមានអ្នកកើតកូវីដ១៩នៅក្រុងប៉េកាំងកាលពីថ្ងៃ១ធ្នូ ដែលជាសញ្ញាបង្ហាញថាអាជ្ញាធរលែងអនុវត្តវិធានការរឹតត្បិតចលនាមនុស្សទៀតហើយ
