Views: 8
ប្រែសម្រួលៈបំណង(ស្ត្រេតថែមស៍)៖ ចិនបាននិយាយនៅថ្ងៃអង្គារទី២៩វិច្ឆិកានេះថា ខ្លួននឹងបង្កើនល្បឿនចាក់វ៉ាក់សាំងកូវីដ១៩អោយដល់មនុស្សចាប់ពីអាយុ៦០ឆ្នាំឡើងបន្ទាប់ពីប្រទេសជួបកំណើននៃការឆ្លងជំងឺនេះខ្ពស់បំផុតមិនដែនធ្លាប់មាននៅបួនប្រាំថ្ងៃជាប់ៗគ្នាមកនេះ។
គណៈកម្មាធិការសុខាភិបាលជាតិចិនបានសន្យា«ពន្លឿនអត្រាចាក់វ៉ាក់សាំងសំរាប់មនុស្សវ័យ៨០ឆ្នាំឡើង ហើយបន្តបង្កើនការចាក់វ៉ាក់សាំងសំរាប់មនុស្សអាយុចាប់ពី៦០ទៅ៧៩ឆ្នាំ ដោយខ្លួននឹងបង្កើតក្រុមការងារពិសេសមួយ…ដើម្បីរៀបចំចាត់ចែងចាក់វ៉ាក់សាំងកូវីដ១៩យ៉ាងពិសេសដល់មនុស្សវ័យចាស់ៗ»។
សូមបញ្ជាក់ថា ប្រជាជនចិនអាយុ៨០ឆ្នាំឡើងតែ៦៥,៨ភាគរយបានចាក់វ៉ាក់សាំងការពារកូវីដ១៩បានពេញលេញ នៅពេលមនុស្សវ័យ៦០ឆ្នាំឡើងចំនួន៨៦,៤ភាគរយបានទទួលវ៉ាក់សាំងពីរដូស និងជាង៦៨ភាគរយបានទទួលដូសជំរុញ។
នៅថ្ងៃអង្គារនេះចិនបានរាយការណ៍ចំនួនឆ្លងកូវីដ១៩ថ្មីចំនួន៣៨.៤២១នាក់សំរាប់ថ្ងៃចន្ទ ដោយធ្លាក់ចុះបន្តិចពីចំនួនឆ្លងកាលពីមួយថ្ងៃមុន។
បុរសទទួលវ៉ាក់សាំងកូវីដ១៩ប្រភេទហឺតស្រូបចូលតាមមាត់នៅខេត្តហៃណានកាលពីថ្ងៃ២៥វិច្ឆិកា
ជុំវិញកូវីដ១៩នៅចិននេះដែរ អាជ្ញាធរបានចាប់ផ្តើមរឹតបន្តឹងសន្តិសុខនិងការជួបជុំក្នុងទីក្រុងនានាបន្ទាប់ពីផ្ទុះការតវ៉ាប្រឆាំងកក្រើកចិនកាលពីចុងសប្តាហ៍ជុំវិញវិធានការប្រឆាំងកូវីដ១៩ដ៏តឹងតែងនិងយូរជាងគេនៅក្នុងលោក។
សាក្សីបាននិយាយថាប៉ូលិសបានចាប់ផ្តើមសួរនាំអ្នកធ្វើការតវ៉ាប្រឆាំងនឹងវិធានការទប់ស្កាត់កូវីដ១៩ ហើយប៉ូលិសបង្ហាញវត្តមានយ៉ាងច្រើននៅតាមដងវិថីនៃរដ្ឋធានីប៉េកាំងនៅថ្ងៃអង្គារ។
កូវីដ១៩នៅចិននៅតែឆ្លងរាលដាលខ្លាំងទោះជាអាជ្ញាធរខិតខំអនុវត្តវិធានការទប់ស្កាត់ឥតបង្អង់ដៃតាំងពីជិតបីឆ្នាំមុននៅពេលប្រទេសភាគច្រើនបំផុតក្នុងលោកលែងសូវគិតគូរអំពីវិធានការទប់ស្កាត់និងគ្រប់គ្រងជំងឺនេះទៅហើយ។ការបិទខ្ទប់តំបន់ផ្ទុះជំងឺ ការធ្វើចត្តាឡីស័ករយៈពេលវែងនិងកេណ្ឌប្រជាជនមកធ្វើតេស្តិ៍រកមេរោគដដែលៗនាំអោយប្រជាជនមិនសម្បាយចិត្តនិងប៉ះពាល់សេដ្ឋកិច្ចជាខ្លាំង៕
វត្តមានប៉ូលិសក្រាស់ក្រែលនៅក្រុងប៉េកាំងក្រោយផ្ទុះការតវ៉ាប្រឆាំងកាលពីចុងសប្តាហ៍
