Views: 6
ប្រែសម្រួលៈបំណង(ស្ត្រេតថែមស៍)៖ អ្នកការទូតជាន់ខ្ពស់ចិនលោកវ៉ាង យី បានទទូចសុំអោយអឺរ៉ុបដើរតួនាទីមួយនៅក្នុងការគាំទ្រកិច្ចពិភាក្សាសន្តិភាពដើម្បីបញ្ចប់សង្គ្រាមនៅអ៊ុយក្រែន ទោះជាសហរដ្ឋអាម៉េរិកបានព្រមានថា សំណើរបស់រដ្ឋាភិបាលទីក្រុងប៉េកាំងនឹងនាំអោយរដ្ឋាភិបាលទីក្រុងមូស្គូកាន់កាប់ទឹកដីដែលខ្លួនបានវាយយកកន្លងមក។
លោកវ៉ាងបានប្រាប់លោក អេម៉ានុយអែល ប៊ន(Emmanuel Bonne)ទីប្រឹក្សាការទូតមួយរូបរបស់ប្រធានាធិបតីបារាំងក្នុងការនិយាយទូរស័ព្ទកាលពីថ្ងៃព្រហស្បតិ៍ថា«ចិនទន្ទឹងរង់ចាំបារាំងនិងប្រទេសអឺរ៉ុបដទៃទៀត»ដើរតួនាទីត្រឹមត្រូវរបស់គេ។
យោងតាមក្រសួងការបរទេស លោកវ៉ាងបាននិយាយថា«បទឈប់បាញ់មួយ ការបញ្ឈប់សង្គ្រាម ការបន្តកិច្ចពិភាក្សារកសន្តិភាពនិងដំណោះស្រាយនយោបាយមួយនៃវិបត្តិនេះគួរក្លាយជាការមូលមតិគ្នាជាយុទ្ធសាស្ត្រមួយរវាងចិននិងអឺរ៉ុប»។
ការលើកឡើងរបស់មន្ត្រីការទូតចិននេះកើតឡើងក្រោយពីប្រធានាធិបតីចិនលោក ស៊ី ជីនពីង ទើបបញ្ចប់ដំណើរទស្សនកិច្ចនៅរុស្ស៊ី កន្លែងដែលលោកបានជួប្រធានាធិបតី វ្ល៉ាឌីមៀ ពូទីន និងបានសន្យាពង្រឹងទំនាក់ទំនង ហើយរុស្ស៊ីបានសាទរសំណើរបស់ចិនសំរាប់បញ្ចប់ការវាយប្រយុទ្ធគ្នា។តាមសំណើនេះ ទាហានរុស្ស៊ីនឹងរក្សាការឈរជើងនៅនឹងកន្លែងលើទឹកដីអ៊ុយក្រែន ជាអ្វីដែលរដ្ឋាភិបាលទីក្រុងគៀវថាធ្វើទៅមិនរួច។
ប្រធានាធិបតីអ៊ុយក្រែនបានប្តេជ្ញាបន្តប្រយុទ្ធរហូតដល់ទាហានរុស្ស៊ីចាកចេញ ហើយរដ្ឋាភិបាលទីក្រុងមូស្គូក៏មិនបង្ហាញសញ្ញានៃការឈប់វាយប្រហារ និងបន្តកាន់កាប់ផ្នែកជាច្រើននៅអ៊ុយក្រែនខាងកើតព្រទាំងទឹកដីគ្រីម៉េ បន្ទាប់ពីការធ្វើប្រជាមតិមួយដើម្បីកាត់យកតំបន់ទាំងនោះជាផ្នែកនៃទឹកដីរុស្ស៊ី។
អាម៉េរិកនិងសម្ពន្ធមិត្តបានច្រានចោលគំនិតផ្តួចផ្តើមរបស់ចិន ដោយចាត់ទុកថាវាមានភាពលម្អៀងទៅរករុស្ស៊ី នៅពេលអ៊ុយក្រែនប្រតិកម្មបែបប្រយ័ត្នប្រយែង។ទោះជាយ៉ាងណា ពួកមន្ត្រីអាម៉េរិកមានការព្រួយបារម្ភថា ការច្រានចោលសំណើរបស់ចិននាំអោយគេគិតថា រដ្ឋាភិបាលទីក្រុងវ៉ាស៊ីនតោនមិនចង់បានសន្តិភាព។
ការស្នើឡើងរបស់ចិនក៏កើតឡើងនៅពេលនាយករដ្ឋមន្ត្រីអេស្ប៉ាញលោក ប៉េដ្រូ សាន់ចេស(Pedro Sanchez)បានប្រកាសថាលោកនឹងចាប់ផ្តើមធ្វើទស្សនកិច្ចចិនប្រាំថ្ងៃនៅសប្តាហ៍ក្រោយដើម្បីនិយាយជាមួយប្រធានាធិបតីស៊ី អំពីសំណើចរចាស្វែងរកសន្តិភាពរវាងអ៊ុយក្រែននិងរុស្ស៊ី។
ប្រធានាធិបតីប្រេស៊ីល ក៏នឹងមកធ្វើទស្សនកិច្ចចិននៅថ្ងៃអាទិត្យ និងប្រធានាធិបតីបារាំងបាននិយាយថាលោកនឹងមកចិននៅខែមេសា ដើម្បីជំរុញអោយចិនជួយបញ្ចប់សង្គ្រាមនៅអ៊ុយក្រែន
ចិនចាប់ផ្តើមកិច្ចការទូតពិភពលោកសំរាប់សំណើសន្តិភាពអ៊ុយក្រែនរបស់ខ្លួន។ នាយករដ្ឋមន្ត្រីអេស្ប៉ាញនឹងមកទស្សនកិច្ចចិននៅសប្តាហ៍ក្រោយដើម្បីជួបប្រជុំជាមួយលោក ស៊ី ជីនពីង។ក្នុងរូបលោកសាន់ចេស ជួបលោកស៊ីកាលពីឆ្នាំ២០១៨នៅទីក្រុងម៉ាឌ្រីត