Views: 17
ប្រែសម្រួល : កញ្ញាដាលីស (ស្ត្រេតថែមស៍) ៖ ចិនបានចេញផ្សាយព័ត៌មានលម្អិតអំពីដំណាក់កាលចុងក្រោយនៃការងារនៅលើស្ថានីយអវកាស Tiangong របស់ខ្លួន ជាយានគោចរកំពុងសាងសង់មួយ ដែលបានចាប់ផ្តើមបន្ទាប់ពីសហរដ្ឋអាម៉េរិករារាំងទីក្រុងប៉េកាំងពីការចូលរួមក្នុងស្ថានីយអវកាសអន្តរជាតិ។
ប្រព័ន្ធផ្សព្វផ្សាយរដ្ឋបានរាយការណ៍ថា យាន Shenzhou XIVដែលនឹងដឹកអវកាសយានិកបីនាក់នៅខែក្រោយសម្រាប់បេសកកម្មរយៈពេលប្រាំមួយខែទៅកាន់ស្ថានីយ Tiangongត្រូវបានផ្លាស់ទៅកាន់កន្លែងបាញ់បង្ហោះនៅមជ្ឈមណ្ឌលបាញ់បង្ហោះផ្កាយរណបជីវក្វាន់ (Jiuquan) នៅខេត្តម៉ុងហ្គោលីខាងក្នុងកាលពីថ្ងៃអាទិត្យ ខណៈការបាញ់បង្ហោះគ្រោងធ្វើឡើង”នៅប៉ុន្មានថ្ងៃខាងមុខ”។
សារព័ត៌មាន China Daily បានរាយការណ៍ថា បន្ទាប់ពីបេសកកម្មនោះ ចិននឹងបាញ់បង្ហោះផ្នែកនៃមន្ទីរពិសោធន៍របស់ស្ថានីយនៅក្នុងខែកក្កដា និងបាញ់បង្ហោះមន្ទីរពិសោធន៍ទីពីរនៅខែតុលា។
យោងតាមសារព័ត៌មាន China Daily បន្ទាប់ពីមន្ទីរពិសោធន៍អវកាស យានដឹកទំនិញ Tianzhou 5 និងអវកាសយានិកនៃយាន Shenzhou XVគ្រោងនឹងទៅដល់ស្ថានីយគន្លងគោចរដ៏ធំនេះនៅចុងឆ្នាំនេះ។
កាលពីសប្តាហ៍មុន ចិនបានបញ្ចេញរូបភាពថ្មីនៃស្ថានីយ Tiangong ដែលស្ថិតនៅក្នុងគន្លងគោចរពីលើផែនដី ៤០០ គីឡូម៉ែត្រ។
នៅពេលណាដែលស្ថានីយ Tiangong ត្រូវបានបញ្ចប់ ចិននឹងក្លាយជាប្រទេសតែមួយគត់ដែលដំណើរការស្ថានីយអវកាសដោយខ្លួនឯងដោយបន្ថែមលើសមិទ្ធិផលផ្សេងទៀតដូចជាការចុះចតយាននៅលើភពព្រះអង្គារកាលពីឆ្នាំមុន និងការចុះចតយាននៅផ្នែកឆ្ងាយនៃឋានព្រះចន្ទក្នុងឆ្នាំ ២០១៩។
ក្រោមការដឹកនាំរបស់ប្រធានាធិបតីស៊ី ជីនពីង ចិនបានបង្កើនកិច្ចខិតខំប្រឹងប្រែងដើម្បីតាមឱ្យទាន់សហរដ្ឋអាម៉េរិកក្នុងនាមជាមហាអំណាចក្នុងលំហដោយសហការជាមួយរុស្ស៊ីលើស្ថានីយស្រាវជ្រាវឋានព្រះចន្ទដែលបានស្នើឡើង និង ជំទាស់នឹងកិច្ចព្រមព្រៀងយាន Artemis ដែលគាំទ្រដោយរដ្ឋាភិបាលទីក្រុងវ៉ាស៊ីនតោនដែលមានបំណងជួយគ្រប់គ្រងសកម្មភាពអវកាសនាពេលអនាគតដូចជាការជីកយករ៉ែនៅលើឋានព្រះចន្ទជាដើម៕
គំរូស្ថានីយអវកាស Tiangong របស់ចិននៅក្នុងសន្និសីទអប្សរាក្នុងក្រុងហាងចូវខេត្តចឺជាំងកាលពីថ្ងៃទី១៩ ខែតុលា ឆ្នាំ២០២១