Views: 1
ប្រែសម្រួលៈបំណង(ដេល្លីម៉េល)៖ ចំនួនមនុស្សស្លាប់ពីគ្រោះថ្នាក់បាក់គម្របមាត់អណ្តូងនៅវត្តហិណ្ឌូមួយក្នុងប្រទេសឥណ្ឌាបានកើនដល់៣៥នាក់កាលពីថ្ងៃសុក្រ ដោយការងារជួយសង្គ្រោះនៅបន្តទៀតដើម្បីស្វែងរកមនុស្សនៅបាត់ខ្លួនម្នាក់។
អ្នកគោរពបូជ្ញាសាសនាហិណ្ឌូរាប់សិបនាក់ដែលកំពុងធ្វើពិធីសាសនាមួយបានធ្លាក់ចូលក្នុងអណ្តូងដ៏ធំនៅពេលគម្របបិទមាត់អណ្តូងបានបាក់ក្រោមទម្ងន់មនុស្សរាប់សិបនាក់កាលពីថ្ងៃព្រហស្បតិ៍នៅវត្តមួយក្នុងទីក្រុងអ៊ីដ័រ(Indore)។
មន្ត្រីក្រុងម្នាក់បាននិយាយថា «មនុស្ស៣៥នាក់បានស្លាប់ ម្នាក់កំពុងបាត់ខ្លួន ហើយប្រតិបត្តិការជួយសង្គ្រោះនៅបន្ត»។
សាក្សីនៅកន្លែងកើតហេតុបានប្រាប់ទីភ្នាក់ងារសារព័ត៌មានបារាំងថា ពួកអ្នកជួយសង្គ្រោះកំពុងកំណត់ថាតើនៅសល់មនុស្សបាត់ខ្លួនម្នាក់ទៀតឬអត់ រីឯសារព័ត៌មានTimes of India បាននិយាយថាស្ត្រី កូនក្មេងនិងទារកអាយុ១៨ខែម្នាក់ស្ថិតចំណោមអ្នកឈរលើគម្របមាត់អណ្តូងនិងបាក់ធ្លាក់ចុះទៅក្នុងទឹកនៅជំរៅ៧,៥ម៉ែត្រ។
នាយករដ្ឋមន្ត្រីឥណ្ឌា ក្នុងពេលជាមួយគ្នាបាននិយាយថាលោកមានការឈឺចាប់ជាខ្លាំងហើយរដ្ឋាភិបាលកំពុងដឹកនាំការងារជួយសង្គ្រោះយ៉ាងលឿន។ការិយាល័យរបស់លោកនាយករដ្ឋមន្ត្រីបាននិយាយថា គ្រួសារជនរងគ្រោះនឹងទទួលបានសំណង២សែនរូបពី(២.៤០០ដុល្លារ)។
សូមបញ្ជាក់ថា វត្តហិណ្ឌូនៅទូទាំងឥណ្ឌាកាលពីថ្ងៃព្រហស្បតិ៍បានប្រារព្វបុណ្យ រ៉ាម ណាវ៉ាមី(Ram Navami)ដើម្បីរំលឹកខួបកំណើតរបស់ព្រះរ៉ាមរបស់សាសនាហិណ្ឌូ។
តាមពិតគ្រោះថ្នាក់សម្លាប់មនុស្សច្រើនៗនៅតាមទីសក្ការឥណ្ឌាកើតមានជាធម្មតានៅក្នុងបុណ្យសាសនាធំៗ។កាលពីឆ្នាំ២០១៦ មនុស្ស១១២នាក់បានស្លាប់ក្រោយការផ្ទុះធំមួយបង្កឡើងដោយការដុតផាវកាំជ្រួចនៅវត្តហិណ្ឌូមួយ។មនុស្ស១១៥នាក់ទៀតបានស្លាប់នៅឆ្នាំ២០១៣ ក្រោយការប្រជ្រៀតជាន់គ្នានៅលើស្ពានមួយក្បែរវត្តក្នុងរដ្ឋម៉ាតយ៉ា ប្រាដែស(Madhya Pradesh)។
អ្នកធ្វើធម្មយាត្រា២២៤នាក់បានស្លាប់នៅក្នុងការប្រជ្រៀតជាន់គ្នាមួយនៅឆ្នាំ២០០៨នៅវត្តលើកំពូលភ្នំមួយក្នុងទីក្រុង ចុតពួរ(Jodhpur)
មនុស្សធ្លាក់ចូលក្នុងអណ្តូងជំរៅ៧,៥ម៉ែត្រកាលពីថ្ងៃ៣០មីនា
