Views: 11
ដោយ: ភ្នំខៀវ / បាត់ដំបង÷ ច្រកទ្វារតំបន់ព្រំដែន ៤០០ ក្នុងស្រុកសំឡូត ខេត្តបាត់ដំបង បើកដំណើរការឡើងវិញបន្ទាប់ពីបានបិទផ្អាករយ:ពេលយូរដោយសារការរីករាលដាលនៃជំងឺកូវីដ-១៩។
យោងតាមលិខិតប្រកាសផ្លូវការរបស់រដ្ឋបាលខេត្តបាត់ដំបងបានបង្ហាញឲ្យដឹងថា÷ ដោយពិនិត្យឃើញថាចំនួនអ្នកឆ្លងជំងឺកូវីដ-១៩ នាពេលបច្ចុប្បន្នមានការថយចុះ និងគ្រប់យ៉ាងមានដំណើការល្អប្រសើរឡើងវិញជាបន្តបន្ទាប់ ហើយប្រជាពលរដ្ឋទទួលបានការចាក់វ៉ាក់សាំងការពារជំងឺកូវីដ-១៩ បានយ៉ាងពេញលេញ និងមានប្រសិទ្ធភាព។ ម្យ៉ាងទៀតដើម្បីបន្តពង្រឹងកិច្ចសហប្រតិបត្តិការរវាងអាជ្ញាធរខេត្តជាប់ព្រំដែន (ខេត្តបាត់ដំបង – ខេត្តត្រាត) មានទំនាក់ទំនង និងកិច្ចសហការយូរអង្វែងបន្ថែមទៀត ទើបរដ្ឋ បាលខេត្តជាប់ព្រំប្រទល់គ្នា ពិសេសក្នុងនាមជាប្រទេសជិតខាងទាំងពីរបានសម្រេចពិភាក្សាបើកជាផ្លូវការឡើងវិញ គោលបំណងបង្កលក្ខណៈងាយស្រួលដល់ប្រជាពលរដ្ឋជាកសិករនៃខេត្តទាំងពីរមានឱកាសដោះដូរផលិតផល ទំនិញ ឬពលរដ្ឋអ្នកទេសចរណ៍ឆ្លងកាត់ដើរលេងកម្សាន្តទៅវិញ ទៅមក។
ប្រភពដដែលបានបញ្ជាក់ដែរថា÷ ការឯកភាពគ្នារវាងខេត្តជាប់ព្រំដែន ខេត្តបាត់ដំបង – ខេត្តត្រាត នេះចាប់ដំណើការដូចធម្មតាឡើងវិញចាប់ពីថ្ងៃប្រកាសជូនដំណឹងតទៅ គឺចាប់ពីថ្ងៃទី០៥ ខែវិច្ឆិកា ឆ្នាំ២០២២ កន្លងមកថ្មីៗនេះ។
សូមបញ្ជាក់ថាច្រកទ្វារតំបន់ព្រំដែន ៤០០ មានទីតាំងឋិតនៅក្នុងស្រុកសំឡូត ខេត្តបាត់ដំបង និងតំបន់ឈមគ្នាជាមួយភាគីប្រទេសថៃ ក្នុងភូមិសាស្ត្រតំបន់ បានម៉ាក់មួង ស្រុកបររ៉ៃ ខេត្តត្រាត៕/R