Views: 3
ប្រែសម្រួលៈបំណង(ស្ត្រេតថែមស៍)៖ ទាហានអ៊ុយក្រែនដល់ទៅ១៣.០០០នាក់ត្រូវបានសម្លាប់ចាប់តាំងពីការឈ្លានពានរបស់រុស្សីកាលពីខែកុម្ភៈ នេះបើតាមទីប្រឹក្សាជាន់ខ្ពស់ម្នាក់របស់ប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡេនស្គី។
លោកមីខាអ៊ីឡូ ប៉ូដូលយ៉ាក( Mykhailo Podolyak)បានប្រាប់ទូរទស្សន៍អ៊ុយក្រែនChannel 24កាលពីថ្ងៃព្រហស្បតិ៍ថា«យើងទទួលបានការវាយតំលៃផ្លូវការពីអគ្គសេនាធិការ…និងវាមានចំនួនពី១០.០០០ទៅ១៣.០០០នាក់»។
លោកបានបន្ថែមថា លោកប្រធានាធិបតីហ្សេឡេស្គី នឹងប្រកាសតួលេខនេះជាសាធារណៈនៅពេលត្រឹមត្រូវណាមួយ។
កាលពីខែមិថុនា ពេលកងកម្លាំងរុស្ស៊ីវាយដណ្តើមការគ្រប់គ្រងទាំងស្រុងលើតំបន់លូហ្កានសខ៍ (Lugansk) លោកហ្សេឡេនស្គី បាននិយាយថាអ៊ុយក្រែនបាន«បាត់បង់ទាហាន៦០ទៅ១០០នាក់ក្នុងមួយថ្ងៃ»និង៥០០នាក់ទៀតរងរបួសក្នុងមួយថ្ងៃក្នុងការប្រយុទ្ធ។
កាលពីខែកញ្ញា រដ្ឋមន្ត្រីការពារជាតិរុស្ស៊ីលោក សឺហ្កេ សយហ្គូ បាននិយាយថាទាហានរុស្ស៊ី៥.៩៣៧នាក់ត្រូវបានសម្លាប់ក្នុងការប្រយុទ្ធរយៈពេលជិតប្រាំពីរខែ។
ភាគីទាំងពីរត្រូវបានគេជឿថាបន្ថយចំនួនស្លាប់ឬរងរបួសពិតប្រាកដដើម្បីកុំអោយទាហានរបស់ខ្លួនបាក់ទឹកចិត្ត។
ឧត្តមសេនីយ៍កំពូលអាម៉េរិកលោកម៉ាក មីលលី បាននិយាយកាលពីខែវិច្ឆិកាថា ទាហានរុស្ស៊ីដល់ទៅជាង១០០.០០០នាក់ត្រូវបានសម្លាប់ឬរងរបួសនៅអ៊ុយក្រែន ដោយកងកម្លាំងអ៊ុយក្រែនក៏បាត់បង់ក្នុងចំនួនប្រហាក់ប្រហែលគ្នានេះដែរ។
ជនស៊ីវិលអ៊ុយក្រែនរាប់ពាន់នាក់ក៏ត្រូវបានសម្លាប់ក្នុងការប្រយុទ្ធគ្នាដ៏អាក្រក់បំផុតប្រចាំអឺរ៉ុបនេះចាប់តាំងពីសង្គ្រាមលោកលើកទីពីរ៕
ទាហានអ៊ុយក្រែនកាន់ទុក្ខនៅជាប់មឈូសមិត្តរួមអាវុធនៅកន្លែងបញ្ចុះសពមួយក្នុងទីក្រុងគៀវកាលពីថ្ងៃ២៣វិច្ឆិកា
