Views: 4
ដោយៈ សុខសុភ័ណ្ឌ / កំពង់ស្ពឺ: ស្ត្រីម្នាក់ បានស្លាប់នៅកន្លែងកើតហេតុ ដោយសារម៉ូតូបុក នៅពេលស្ត្រីនោះ បានកំពុងដើរឆ្លងផ្លូវ រីឯអ្នកបើកម៉ូតូ បុកស្ត្រីនោះ បានរបួសធ្ងន់ ហើយក៏បានស្លាប់ជាបន្ត នៅពេលគេបញ្ជូនទៅកាន់មន្ទីរពេទ្យ។ ហេតុការណ៍នេះ បានកើតឡើង នៅលើផ្លូវក្រាលបេតុង ភូមិចំការដូង សង្កាត់ច្បារមន ក្រុងច្បារមន ខែត្តកំពង់ស្ពឺ កាលពីវេលាម៉ោង ៩ យប់ថ្ងៃទី១១ ខែសីហា ឆ្នាំ២០២២។
នគរបាលមូលដ្ឋាន បានឲ្យដឹងថា ស្ត្រីរងគ្រោះ មានឈ្មោះ វ៉ាង ស្រីមុំ ភេទស្រី អាយុ ៤០ ឆ្នាំ រស់នៅភូមិសំបួរ សង្កាត់ច្បារមន ក្រុងច្បារមន បានដើរឆ្លងផ្លូវពីជើងទៅត្បូង ហើយត្រូវម៉ូតូមួយគ្រឿង ម៉ាកហុងដា សេ១២៥ ពណ៌ខ្មៅ សេរីឆ្នាំ២០១៧ ពាក់ផ្លាកលេខ កំពង់ស្ពឺ ១H៨៣៤០ បើកបរដោយឈ្មោះ ខៀវ មិនា ភេទប្រុស អាយុ ៥៨ ឆ្នាំ រស់នៅភូមិពេជ្រចង្វា ឃុំខ្ទុំក្រាំង ស្រុកសំរោងទង ពីទិសខាងលិច ទៅខាងកើត ហើយបានបុកពេញទំហឹង បណ្តាលឲ្យស្ត្រីរងគ្រោះ ខាងលើ ស្លាប់ភ្លាមៗ នៅនឹងកន្លែងតែម្តង។
ប្រភពដដែលបានបន្តទៀតថាៈ ចំណែកអ្នកបើកបរម៉ូតូ ក៏បានស្លាប់ នៅពេលបញ្ជូនទៅ មន្ទីរពេទ្យបង្អែក ខេត្តកំពង់ស្ពឺ។
ក្រោយកើតហេតុ មន្ត្រីជំនាញ បានប្រគល់សពទាំងពីរ ឲ្យក្រុមគ្រួសារ យកទៅធ្វើបុណ្យ តាមប្រពៃណី ។ រីឯវត្ថុតាងម៉ូតូ យកទៅរក្សាទុក នៅអធិការដ្ឋាននគរបាល ក្រុងច្បារមន រង់ចាំដោះស្រាយ នៅពេលក្រោយ៕/V