Views: 1
ដោយៈ ភ្នំសន្ទក/ កំពង់ធំ៖ ទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិ គ្រប់គ្រងគ្រោះមហន្តរាយ តំណាងសម្តេចតេជោ ហ៊ុន សែន នាយករដ្ឋមន្ត្រី និងជា ប្រធានគណៈកម្មាធិការជាតិ គ្រប់គ្រងគ្រោះមហន្តរាយ បានបន្តចុះសួរសុខទុក្ខ ប្រជាពលរដ្ឋ នៅភូមិក្រសាំង ឃុំទ្រា ស្រុកស្ទោង ខេត្តកំពង់ធំ ដែលក្នុងប៉ុន្មានថ្ងៃមកនេះ បានរងគ្រោះដោយទឹកជំនន់ទឹកភ្លៀង កាលពីល្ងាចម្សិលមិញ ថ្ងៃទី១ ខែតុលា ឆ្នាំ២០២២ ។
ក្នុងដំណើរចុះសាកសួរសុខទុក្ខប្រជាពលរដ្ឋ និងពិនិត្យស្ថានភាពទឹកជំនន់ នាពេលនេះ លោកទេសរដ្ឋមន្ត្រី បានពាំនាំនូវការសាកសួរសុខទុក្ខ អាណិតស្រឡាញ់ ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ចំពោះបងប្អូនជនរួមជាតិ ដែលរងគ្រោះ ដោយទឹកជំនន់ ពេលនេះ។ ទោះជាទឹកចាប់ផ្តើមស្រកទៅវិញជាបណ្តើរក៏ដោយ សម្តេច ទាំងពីរ នៅតែបន្តយកចិត្តទុកដាក់ខ្ពស់ ចំពោះទុក្ខលំបាករបស់បងប្អូនជានិច្ច។
លោកទេសរដ្ឋមន្ត្រី គន់ គីម ក៏បានកោតសរសើរខ្ពស់ ដល់រដ្ឋបាលស្រុកស្ទោង និងអាជ្ញាធរខេត្តកំពង់ធំ បន្តសម្រាលទុក្ខលំបាករបស់បងប្អូនប្រជាពលរដ្ឋ ដែលរងគ្រោះ ក្នុងដំណាក់កាល ទឹកកំពុងស្រកទៅវិញនេះ គណៈកម្មាធិការគ្រប់គ្រងគ្រោះមហន្តរាយ ខេត្ត និងស្រុកស្ទោង បានចែកអំណោយដល់ប្រជាពលរដ្ឋ ៥០០ គ្រួសារ បន្ថែមទៀត ដែលជាជំនួយរបស់សម្តេចតេជោ ហ៊ុន សែន ក្នុងនោះ មានមី១កេសតូច អង្ករ ២៥ គ.ក ទឹកត្រី១យួរ ទឹកស៊ីអ៊ីវ១យួរ និងទឹកសុទ្ធ១កេស នៅថ្ងៃទី២ ខែតុលា ឆ្នាំ២០២២នេះ នៅសាលាស្រុកស្ទោង។
ក្នុងឱកាសនេះ លោកទេសរដ្ឋមន្ត្រី បានបញ្ជាក់ពីការសន្និដ្ឋានសភាពការណ៍ថាៈ ស្ថានភាពគ្រោះពីជំនន់ទឹកភ្លៀង នាពេលនេះ គឺបានធូរស្រាលជាបណ្តើៗ ហើយចំពោះ ការខូចខាត ក៏មិនមានទំហំធំធេងនោះទេ ។ បន្ថែមលើសពីនេះ ដើម្បីជាគិតគូរដល់ ការស្តារជីវភាពរបស់ប្រជាពលរដ្ឋឡើងវិញ។
ជាចុងក្រោយ លោកទេសរដ្ឋមន្ត្រី បានដាក់បទបញ្ជា ដល់គណៈកម្មាធិការគ្រប់គ្រង គ្រោះមហន្តរាយខេត្ត និងស្រុក ឱ្យសិក្សាលំអិតពីការខូចខាត ដល់ផ្លូវលំជនបទនានា ហើយបន្តសហការជាមួយក្រសួង និងមន្ទីរជំនាញ ធ្វើការស្តារឡើងវិញជាបន្ទាន់ ពេលទឹកស្រកអស់ ដើម្បីជួយសម្រួលដល់ ការប្រកបរបរ ក្នុងជីវភាពរស់នៅរបស់ ប្រជាពលរដ្ឋ ឲ្យបានប្រសើរឡើងវិញ។
លោក សាយ គឹមឡម អភិបាលស្រុក បានប្រាប់តាមទូរស័ព្ទ ថ្ងៃទី២ ខែតុលា នេះថាៈ ប្រជាពលរដ្ឋ ក្នុងស្រុកស្ទោងទាំងមូល បានរងការប៉ះពាល់ផ្ទះសម្បែងជាង ៥.០០០ ខ្នងផ្ទះហើយ។ ក្នុងនោះដែរ រដ្ឋបាលស្រុកស្ទោង បានផ្តួចផ្តើមកៀរគរមូលនិធិពី មជ្ឈដ្ឋាននានា ជួយផ្តល់ជាជំនួយសម្រាលទុក្ខលំបាករបស់គ្រួសារ ងាយរងគ្រោះបំផុត បានសរុបចំនួន ១.១៣២ គ្រួសារ រួចហើយ។
លោកអភិបាលស្រុកស្ទោង បានបញ្ជាក់ថាៈ ស្ថានភាពទឹកជំនន់ទឹកភ្លៀង នៅស្រុកស្ទោង សម្រាប់ថ្ងៃទី១ ខែតុលា ឆ្នាំ២០២២ ទទួលរងផលប៉ះពាល់ ដូចខាងក្រោម៖
១-ភូមិដែលរងគ្រោះដោយទឹកជំនន់ចំនួន ៥២ ភូមិ លើ ៨ ឃុំ ស្មើនឹង ៥.៨៩២ គ្រួសារ លិចក្រោមផ្ទះ ចំនួន ៤.៦២៦ ខ្នងផ្ទះ។ ២-លិចទីធ្លាសាលារៀន ចំនួន ២០ សាលា និងផ្អាកបង្រៀនបណ្តោះអាសន្ន ។ ៣-លិចទីធ្លាមណ្ឌលសុខភាព ២មណ្ឌល ។ ចំណែកស្ថានភាពទឹកជំនន់ ក្នុងថ្ងៃនេះ ស្រកច្រើន បើប្រៀបធៀប កាលពីម្សិលមិញ៕/V
