Views: 3
ប្រែសម្រួល : កញ្ញាដាលីស (ដេល្លីម៉េល) ៖ ធនាគារសហគមន៍ញូវយ៉ក (New York Community Bank) បានយល់ព្រមទិញផ្នែកដ៏សំខាន់នៃធនាគារដួលរលំ Signature Bank ក្នុងកិច្ចព្រមព្រៀងតម្លៃ ២,៧ ពាន់លានដុល្លារ នេះបើតាមការបញ្ជាក់របស់ក្រុមហ៊ុនធានារ៉ាប់រង Federal Deposit Insurance Corp (FDIC)កាលពីយប់ថ្ងៃអាទិត្យទី១៩មីនា។
ការដួលរលំនៃធនាគារ Signature Bank ត្រូវបានប្រកាសដោយ FDIC នៅថ្ងៃទី ១២ ខែមីនា ដោយសារតែការឆ្លងរាលដាលពីការដួលរបស់ធនាគារ Silicon Valley Bank។
សាខាទាំង ៤០ របស់ធនាគារ Signature Bank នឹងក្លាយជារបស់ធនាគារ Flagstar Bank ចាប់ផ្តើមពីថ្ងៃចន្ទនេះតទៅ។
Flagstar Bank គឺជាធនាគារបុត្រសម្ពន្ធមួយរបស់ធនាគារ New York Community Bank ។
កិច្ចព្រមព្រៀងនេះនឹងរួមបញ្ចូលការទិញ ៣៨,៤ ពាន់លានដុល្លារក្នុងទ្រព្យសកម្មរបស់ធនាគារ Signature Bank ដែលច្រើនជាងមួយភាគបីនៃតម្លៃសរុបរបស់ធនាគារ Signature Bank នៅពេលដែលធនាគារនេះបានដួលរលំកាលពីមួយសប្តាហ៍មុន។
FDIC បាននិយាយថា ប្រាក់កម្ចី ៦០ ពាន់លានដុល្លាររបស់ Signature Bank នឹងនៅតែអាចគ្រប់គ្រងបាន ហើយត្រូវគេរំពឹងថានឹងត្រូវលក់ចេញទាន់ពេលវេលា។
FDIC បានសរសេរលើ Twitter ថា “ថ្ងៃនេះ យើងបានចុះកិច្ចព្រមព្រៀងជាមួយធនាគារបុត្រសម្ពន្ធរបស់ New York Community Bancorp, Inc. ដើម្បីទិញនិងផ្ទេរប្រាក់បញ្ញើនិងទ្រព្យសកម្មចេញពីធនគារ Signature Bridge Bank”។
Signature Bank គឺជាធនាគារទីពីរដែលដួលរលំក្នុងវិបត្តិធនាគារ គឺប្រហែល ៤៨ ម៉ោងបន្ទាប់ពីការដួលរលំនៃធនាគារ Silicon Valley Bank។
Signature Bank ដែលមានមូលដ្ឋាននៅរដ្ឋញូវយ៉ក គឺជាអ្នកផ្តល់ប្រាក់កម្ចីពាណិជ្ជកម្មដ៏ធំមួយនៅក្នុងតំបន់ត្រីរដ្ឋ ប៉ុន្តែក្នុងប៉ុន្មានឆ្នាំថ្មីៗនេះបានប្រឡូកក្នុងវិស័យរូបិយប័ណ្ណគ្រីបតូ ដែលជាអាជីវកម្មមានសក្តានុពល។
បន្ទាប់ពីធនាគារ Silicon Valley Bank ដួលរលំ អ្នកដាក់ប្រាក់បញ្ញើមានការព្រួយបារម្ភអំពីសុខភាពរបស់ធនាគារ Signature Bank ដោយសារតែចំនួនប្រាក់បញ្ញើមិនមានធានារ៉ាប់រងដ៏ខ្ពស់របស់ខ្លួនក៏ដូចជាការប៉ះពាល់នឹងលុយគ្រីបតូនិងការផ្តល់ប្រាក់កម្ចី ដែលផ្តោតលើបច្ចេកវិជ្ជាផ្សេងទៀត។
នៅគ្រាដែលវាត្រូវបានបិទដោយនិយតករ Signature Bank គឺជាធនាគារធំបំផុតទីបីដែលដួលរលំក្នុងប្រវត្តិសាស្ត្ររបស់សហរដ្ឋអាម៉េរិក៕
ធនាគារ Signature Bank ដួលរលំក្នុងពេលតែ ៤៨ ម៉ោងក្រោយការដួលរលំរបស់ធនាគារ SVB