Views: 3
ដោយៈ ប.ខុន / ភ្នំពេញៈ ស្ថានភាពទឹកធ្លាក់មកពីតាមព្រំដែន កម្ពុជា ថៃ ក្នុងភូមិសាស្ត្រ ខេត្តបន្ទាយមានជ័យ បន្តហក់ឡើងដល់កម្រិតកម្ពស់ ត្រូវប្រកាសឱ្យមានការប្រុងប្រយ័ត្ន និងនៅកន្លែងខ្លះ បានឡើងលើសពីកម្រិតប្រកាស ហើយធ្វើឱ្យទឹកជន់លិចភូមិមួយចំនួន ថែមទៀត។
លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយម ខេត្តបន្ទាយមានជ័យ បានប្រាប់ឱ្យរស្មីកម្ពុជាដឹង នៅថ្ងៃទី១ ខែតុលា ឆ្នាំ២០២២ថាៈ ស្ថានភាពទឹក នៅច្រកទឹកអូរស្ពាន ស្រុកម៉ាឡៃ ទឹកស្រកហូរស្រុង ដល់វាលសាយសាម៉ន ស្រុកមង្គលបូរីហើយ ។ តែស្ថានភាពទឹក នៅអូរល្ហុង បានហក់ឡើង នៅក្រុងប៉ោយប៉ែត ដល់កម្ពស់ ៥,៥២ ម៉ែត្រ គឺលើសកម្ពស់ត្រូវប្រកាសឱ្យមានការប្រុងប្រយ័ត្ន ធ្វើឱ្យទឹកហូរ ចូលលិចតាមភូមិមួយចំនួន ជាទឹកភ្លៀងធ្លាក់នៅតាមជាយដែន។
ចំណែកស្ថានភាពទឹក នៅអូរបីជាន់វិញ លោក យឹម ប៊ុនរ៉ុម ប្រាប់ឱ្យដឹងថាៈ ទឹកបានឡើង ដល់កម្ពស់ ៣,៤៩ ម៉ែត្រ ខ្វះ ០,០១ ម៉ែត្រទៀត គឺឡើងដល់កម្ពស់ត្រូវប្រកាសឱ្យមាន ការប្រុងប្រយ័ត្ន ជាទឹកភ្លៀងធ្លាក់មកពីតាមជាយដែនកម្ពុជា ថៃ ។ ស្ថានភាពទឹក នៅអូរកំបុតឡើង ដល់កម្ពស់ ៤,៩២ ម៉ែត្រ ឡើងលើសកម្រិតត្រូវប្រកាសឱ្យមាន ការប្រុងប្រយ័ត្ន ០,៦២ ម៉ែត្រ ។
លោក យឹម ប៉ុនរ៉ុម បាននិយាយឱ្យដឹងទៀតថាៈ ស្ថានភាពទឹកស្ទឹងមង្គលបូរី បន្តឡើង ដល់កម្ពស់ ៦,៣៩ ម៉ែត្រ នៅខ្វះ ០,១១ ម៉ែត្រទៀត ទឹកឡើងដល់កម្រិត ត្រូវប្រកាស ឱ្យមានការប្រុងប្រយ័ត្ន។ ទឹកស្ទឹងក្រុងសិរីសោភ័ណ បានឡើងដល់កម្ពស់ ៧,៤៨ ម៉ែត្រ នៅខ្វះ ០,០២ ម៉ែត្រទៀត ទឹកឡើងដល់កម្រិត ត្រូវប្រកាសឱ្យមានការប្រុងប្រយ័ត្ន។ ទឹកស្ទឹងស្ពានស្រែង ស្ថិតនៅនឹងកម្ពស់ ១៤ ម៉ែត្រ ស្មើកម្ពស់ត្រូវប្រកាសឱ្យមាន ការប្រុងប្រយ័ត្ន។ ស្ថានភាពទឹកអាងត្រពាំថ្ម ឡើងដល់កម្ពស់ ១៧,៣៩ ម៉ែត្រ នៅខ្វះ ០,០១ ម៉ែត្រទៀត គឺឡើងដល់កម្រិតប្រកាសឱ្យមានការប្រុងប្រយ័ត្ន ៕ V / N