Views: 7
ដោយៈ ប.ខុន / ភ្នំពេញៈ ទឹកជំនន់នៅស្រុកភ្នំស្រុក និងស្រុកព្រះនេតព្រះ ដែលធ្វើឱ្យប៉ះពាល់ដល់ផ្លូវខេត្ត ផ្លូវស្រុក ភូមិដ្ឋាន និងវាលស្រែល្វឹងល្វើយ ដែលជាទឹកធ្លាក់ចុះ មកពីស្ទឹងស្រែង មកដល់ពេលនេះ មិនទាន់ស្រកនៅឡើយទេ តែទឹកជំនន់នៅខាងស្រុកមង្គលបុរី បានស្រកអស់ហើយ។
លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយម ខេត្តបន្ទាយមានជ័យ បានប្រាប់ឱ្យរស្មីកម្ពុជាដឹង នៅថ្ងៃទី២៨ ខែកញ្ញា ឆ្នាំ២០២២ថាៈ ទឹកជំនន់នៅខាង ស្រុកមង្គលបុរី បានស្រកអស់ហើយ តែនៅខាងស្រុកភ្នំស្រុក និងស្រុកព្រះនេតព្រះ ជាទឹកធ្លាក់ចុះមកពីស្ទឹងស្រែង (ស្ទឹងក្រឡាញ់) ខេត្តឧត្តរមានជ័យ ដែលបានឡើង លើសពីកម្រិតត្រូវ ប្រកាសឱ្យមានការប្រុងប្រយ័ត្ននោះ នៅមិនទាន់ស្រកនៅឡើយទេ។
ប្រធានមន្ទីរធនធានទឹកខេត្ត ខាងលើ បាននិយាយឱ្យដឹងទៀតថាៈ ទឹកជំនន់បានលិច វាលស្រែល្វឹងល្វើយ តែមិនមានផលប៉ះពាល់ ដល់ដំណាំស្រូវធ្ងន់ធ្ងរនោះទេ ដោយ សារជាតំបន់ ដែលប្រជាពលរដ្ឋ ធ្វើស្រូវស្រាលបានច្រូតកាត់អស់ហើយ តែទឹកបានលិច ផ្លូវខេត្ត ផ្លូវស្រុក ជាផ្លូវកៅស៊ូ ផ្លូវក្រួសក្រហម លិចភូមិដ្ឋាន ដោយមិនមានគ្រោះថ្នាក់ដល់ អាយុជីវិតប្រជាពលរដ្ឋទេ មូលហេតុ ពួកគាត់បានដឹងមុន ហើយជម្លៀសសត្វពាហនៈ ទៅកាន់ទីទួលសុវត្ថិភាព អស់មុនពេលទឹកជន់លិច។
លោក យឹម ប៊ុនរ៉ុម បាននិយាយឱ្យដឹងទៀតថាៈ ទឹកជំនន់នៅស្រុកភ្នំស្រុក ស្រុកព្រះនេតព្រះ ស្រកយឺតដោយសារផ្លូវទឹក ឆ្លងកាត់ផ្លូវជាតិលេខ៦ មានកម្រិត ទើបធ្វើ ឱ្យមានការលិចលង់យូរនៅផ្នែកខាងលើផ្លូវជាតិ។ ចំណែកទឹកជំនន់ នៅខាងស្រុកមង្គលបុរី ដែលកើតមានញឹកញាប់ នៅក្នុងឆ្នាំនេះ តែបានដោះលឿនចូលបឹងទន្លេសាប បន្ទាប់ពីបានជីកប្រឡាយចា ប្រវែងជាង ៣០ គីឡូម៉ែត្រ ដោយមានទទឹងនៅកន្លែងខ្លះ ដល់ពី ៥០ ទៅ ៦០ ម៉ែត្ររួចមក។
ក្រសួងធនធានទឹក និងឧតុនិយម កាលពីថ្ងៃទី២៧ ខែកញ្ញា ឆ្នាំ២០២២ បានជូនដំណឹង ស្តីពីស្ថានភាពធាតុអាកាស សម្រាប់ពីថ្ងៃទី២៨ ខែកញ្ញា ដល់ថ្ងៃទី៤ ខែតុលាថាៈ នៅថ្ងៃទី២៨ និង ២៩ ខែកញ្ញា ប្រទេសកម្ពុជា បន្តទទួលរងឥទ្ធិពលពីព្យុះទី១៦ ឈ្មោះ ណូរុ (NORU)។ ព្យុះនេះ នឹងចូលលើប្រទេសវៀតណាម ភាគកណ្ដាល នៅវេលាម៉ោង ០១ យប់ ថ្ងៃទី២៨ ខែកញ្ញា ក្នុងកម្រិតជា (STS)រួចបន្ថយឥទ្ធិពល ទៅជាវិសម្ពាធ (TD) ដើរលើតំបន់អាងទន្លេមេគង្គ មុននឹងថមថយឥទ្ធិពល ទៅជាសម្ពាធទាប (LOW) ។ បន្ទាប់មក ប្រទេសកម្ពុជា ទទួលរងឥទ្ធិពល ពីជ្រលងសម្ពាធទាបឥណ្ឌា និងខ្យល់មូសុងនិរតីក្នុងកម្រិតមធ្យម ។
សេចក្តីជូនដំណឹង ខាងលើ បានសរសេរទៀតថាៈ ស្ថានភាពអាកាសធាតុ បែបខាងលើ ធ្វើឲ្យតំបន់ទំនាបកណ្តាល មានសីតុណ្ហភាព អប្បបរមាពី ២២ ទៅ ២៤ អង្សាសេ សីតុណ្ណភាព អតិបរមា មានពី ៣០ ទៅ ៣២ អង្សាសេ។ នៅថ្ងៃទី២៨ និងទី២៩ ខែកញ្ញា បណ្ដាខេត្តក្នុងភូមិសាស្ត្រជាប់ព្រំដែនថៃ អាចមានភ្លៀង ក្នុងកំរិតពីបង្គួរទៅច្រើន លាយឡំទៅដោយផ្គរ រន្ទះនិងខ្យល់កន្ត្រាក់។ រីឯរាជធានី និងបណ្តាខេត្តដទៃទៀត អាចមានភ្លៀងធ្លាក់ ក្នុងកំរិតពីតិចទៅបង្គួរ។ បន្ទាប់ពីនោះ ភ្លៀងអាចធ្លាក់ក្នុងកម្រិត ពីខ្សោយទៅមធ្យម។
សម្រាប់តំបន់ខ្ពង់រាប មានសីតុណ្ហភាព អប្បបរមាពី ២១ ទៅ ២៣ អង្សាសេ សីតុណ្ហភាព អតិបរមា មានពី ២៩ ទៅ ៣១ អង្សាសេ ។ នៅថ្ងៃទី២៨ និងទី២៩ ខែកញ្ញា អាចមានភ្លៀងធ្លាក់ ក្នុងកម្រិតពីបង្គួរទៅច្រើន លាយឡំទៅដោយផ្គរ រន្ទះ និងខ្យល់កន្ត្រាក់ ។ ចាប់ពីថ្ងៃទី៣០ ខែកញ្ញាទៅ ភ្លៀងអាចធ្លាក់ ក្នុងកំរិតពីខ្សោយ ទៅបង្គួរ។
នៅតំបន់មាត់សមុទ្រ មានសីតុណ្ហភាព អប្បបរមាពី ២២ ទៅ ២៤ អង្សាសេ សីតុណ្ណភាព អតិបរមា មានពី ២៨ ទៅ ៣០ អង្សាសេ ។ អាចមានភ្លៀងក្នុងកំរិតពីមធ្យម ទៅច្រើន លាយឡំទៅដោយផ្គរ រន្ទះ និងខ្យល់កន្ត្រាក់។ នៅលើផ្ទៃសមុទ្រ អាចមានភ្លៀង លាយឡំ និងខ្យល់បក់បោកខ្លាំង រលកសមុទ្រខ្ពស់ៗ បន្តរហូតដល់ថ្ងៃទី៣០ ខែកញ្ញា។
យោងលើស្ថានភាពធាតុអាកាស ដូចបាន ជម្រាបជូនខាងលើ ក្រសួងធនធានទឹក និងឧតុនិយម បានសូមអាជ្ញាធរដែនដី និងសាធារណជនជ្រាបជាព័ត៌មាន និងបន្តប្រុងប្រយ័ត្នចំពោះបាតុភូតធម្មជាតិ ដែលអាចកើតមានឡើងជាយថាហេតុ ៕ V / N