Views: 12
ប្រែសម្រួល : កញ្ញាដាលីស (ស្ត្រេតថែមស៍) ៖ មជ្ឈមណ្ឌលទិន្នន័យព្រិលនិងទឹកកកជាតិអាម៉េរិក (NSIDC) បានឱ្យដឹងកាលពីថ្ងៃចន្ទថា ទឹកកកសមុទ្រដែលហ៊ុមព័ទ្ធជុំវិញមហាសមុទ្រនៅទ្វីបអង់តាក់ទិកបានឈានដល់កម្រិតទាបបំផុតយ៉ាងធ្ងន់ធ្ងរក្នុងរដូវរងានេះ ដោយបន្ថែមការភ័យព្រួយរបស់អ្នកវិទ្យាសាស្ត្រថាផលប៉ះពាល់នៃការប្រែប្រួលអាកាសធាតុនៅប៉ូលខាងត្បូងកំពុងកើនឡើង។
ក្រុមអ្នកស្រាវជ្រាវបានព្រមានថា ការផ្លាស់ប្តូរអាចមានផលវិបាកធ្ងន់ធ្ងរសម្រាប់សត្វនានាដូចជាសត្វភេនឃ្វីន ដែលបង្កាត់ពូជនិងចិញ្ចឹមកូនរបស់ពួកវានៅលើទឹកកកសមុទ្រ ខណៈពន្លឿនការឡើងកម្តៅផែនដីតាមរយៈការកាត់បន្ថយចំនួនពន្លឺព្រះអាទិត្យ ដែលជះត្រឡប់ទៅបរិយាកាសវិញដោយការចាំងផ្លាតនឹងទឹកកកពណ៌ស។
NSIDC បាននិយាយថា វិសាលភាពទឹកកកសមុទ្រអង់តាក់ទិកបានឡើងដល់កំពូលនៅឆ្នាំនេះនៅថ្ងៃទី ១០ ខែកញ្ញា នៅពេលដែលវាគ្របដណ្តប់លើផ្ទៃដី ១៦,៩៦ លានគីឡូម៉ែត្រការ៉េ ដែលជាការថយចុះខ្លាំងបំផុតក្នុងរដូវរងាចាប់តាំងពីកំណត់ត្រាតាមផ្កាយរណបបានចាប់ផ្តើមក្នុងឆ្នាំ១៩៧៩។ នោះជាទឹកកកតិចជាងមុនប្រហែល ១ លានគីឡូម៉ែត្រការ៉េធៀបនឹងកំណត់ត្រារដូវរងាក្នុងឆ្នាំ ១៩៨៦។
អ្នកវិទ្យាសាស្ត្រជាន់ខ្ពស់របស់ NSIDC លោក វ៉ាល់ មេយើ (Walt Meier) បាននិយាយថា “វាមិនមែនគ្រាន់តែជាឆ្នាំបំបែកឯតទគ្គកម្មប៉ុណ្ណោះទេ វាជាឆ្នាំបំបែកឯតទគ្គកម្មដ៏ធ្ងន់ធ្ងរផងដែរ”។
នៅក្នុងសេចក្តីថ្លែងការណ៍ NSIDC បាននិយាយថា តួលេខនេះគឺបឋមទេ ជាមួយនឹងការវិភាគពេញលេញត្រៀមចេញផ្សាយនៅខែក្រោយ។
រដូវកាលគឺគេគិតបញ្ច្រាស់នៅអឌ្ឍគោលខាងត្បូង ដោយទឹកកកសមុទ្រជាទូទៅកើនឡើងដល់ចំណុចកំពូលក្នុងខែកញ្ញា ជិតចុងបញ្ចប់នៃរដូវរងា ហើយក្រោយមករលាយដល់ចំណុចទាបបំផុតក្នុងខែកុម្ភៈឬខែមីនា នៅពេលដែលរដូវក្តៅខិតជិតមកដល់៕
ទឹកកកនៅអង់តាក់តិចថយចុះ ១ លានគីឡូម៉ែត្រការ៉េធៀបនឹងឆ្នាំ១៩៨៦
