Views: 9
ប្រែសម្រួលៈបំណង(Financial Times)៖យោងតាមប្រភពព័ត៌មានជាច្រើន កាសែតFinancial Timesបានរាយការណ៍កាលពីថ្ងៃពុធទី៣០វិច្ឆិកាថា ស្ថាបនិកក្រុមហ៊ុនAlibabaលោកជែក ម៉ា បាននិងកំពុងរស់នៅក្នុងទីក្រុងតូក្យូ ប្រទេសជប៉ុនអស់ពេលជិតប្រាំមួយខែមកហើយបន្ទាប់ពីបាត់មុខពីពិធីសាធារណៈនានាក្រោយអាជ្ញាធរចិនធ្វើការបង្ក្រាបលើវិស័យបច្ចេកវិទ្យា។
មហាសេដ្ឋីរូបនេះបានរក្សាការមិនសូវចេញមុខមាត់ចាប់តាំងពីការបង្ក្រាប រួមមានក្រុមនិយ័តករចិនលុបចោលការលក់ភាគហ៊ុនអោយសាធារណជន(IPO)របស់ក្រុមហ៊ុនAnt Groupរបស់ម៉ា និងចេញការពិន័យប្រាក់ច្រើនបំផុតលើក្រុមហ៊ុនAlibaba។
Financial Timesបាននិយាយថា លោកបានចំណាយពេលភាគច្រើននៅប្រាំមួយខែមកនេះជាមួយគ្រួសារនៅក្រុងតូក្យូ និងផ្នែកផ្សេងទៀតនៃប្រទេសជប៉ុន ហើយបានទៅទស្សនាប្រទេសអាម៉េរិកនិងអ៊ីស្រាអែលផង។កាសែតអង់គ្លេសនេះបាននិយាយថា លោកម៉ាជាសមាជិកឯកជនរបស់ក្លឹបមួយចំនួននៅតូក្យូ និងបានក្លាយជាអ្នកប្រមូលទិញវត្ថុសិល្បៈជប៉ុនដ៏ងប់ងុលថែមទៀត ។
សូមបញ្ជាក់ថា ចាប់តាំងពីបាត់មុខជាសាធារណៈនៅចិន លោកម៉ាត្រូវបានប្រទះឃើញនៅជាច្រើនកន្លែងក្នុងលោករួមមាននៅកោះម៉ាល់ឡ័រកា(Mallorca)របស់អេស្ប៉ាញកាលពីឆ្នាំមុន។
នៅប៉ុន្មានឆ្នាំចុងក្រោយនេះ មន្ត្រីចិនផ្តោតលើការរកស៊ីបែបប្រឆាំងការប្រកួតប្រជែង គឺផ្តាច់មុខរបស់ក្រុមហ៊ុនធំៗក្នុងប្រទេសចិន ជុំរុញឡើងដោយការព្រួយបារម្ភថា ពួកក្រុមហ៊ុនអ៊ីធឺណិតធំៗគ្រប់គ្រងទិន្នន័យច្រើនពេកនិងពង្រីកខ្លួនលឿនពេក។
នៅខែកក្កដាឆ្នាំនេះ របាយការណ៍មួយបាននិយាយថាលោកម៉ាមានផែនការប្រគល់ការគ្រប់គ្រងក្រុមហ៊ុនAnt Groupដើម្បីបន្ថយការព្រួយបារម្ភក្នុងចំណោមនិយ័តករចិន និងធ្វើអោយរស់ឡើងវិញIPOរបស់វា។ក្រុមហ៊ុនពាណិជ្ជកម្មតាមអេឡិចត្រូនិច Alibabaដ៏ធំរបស់លោកក៏ត្រូវបានរាយការណ៍ថារកស៊ីមិនចំណេញលើកដំបូងកាលពីខែសីហាជានៅពេលចិនបានតស៊ូនឹងការធ្លាក់ចុះសេដ្ឋកិច្ចនិងការឆ្លងកូវីដ១៩កើនឡើងវិញ៕
ជែក ម៉ា បានរក្សាការមិនចេញមុខមាត់ចាប់តាំងពីអាជ្ញាធរចិនធ្វើការបង្ក្រាបលើក្រុមហ៊ុនបច្ចេកវិទ្យាខ្ពស់ៗនិងការរកស៊ីផ្តាច់មុខរួមទាំងក្រុមហ៊ុនAlibabaរបស់លោក
