Views: 9
ប្រែសម្រួល : កញ្ញាដាលីស (ដេល្លីម៉េល) ៖ ឯកសាររបស់តុលាការដែលបានដាក់កាលពីថ្ងៃអង្គារទី២៩វិច្ឆិកាបានបង្ហាញថា គីម កាដាសៀន និងកេនយ៉េ វេសបានឈានដល់ការដោះស្រាយមួយនៅក្នុងការលែងលះរបស់ពួកគេ ដោយបញ្ចៀសការកាត់ក្តីដែលគ្រោងធ្វើនៅខែក្រោយ។
អតីតគូស្នេហ៍នេះនិងមេធាវីរបស់ពួកគេបានដាក់ឯកសារសុំការយល់ព្រមពីចៅក្រមលើលក្ខខណ្ឌដែលពួកគេបានព្រមព្រៀងគ្នា រួមទាំងការបង់ប្រាក់ឧបត្ថម្ភកូនចំនួន ២០០.០០០ដុល្លារក្នុងមួយខែពីលោកវេសដល់នាងកាដាសៀន។
អ្នកទាំងពីរនឹងឃុំគ្រងកូនរួមគ្នា ហើយនឹងមិនបង់ប្រាក់ឧបត្ថម្ភដល់ប្ដីឬប្រពន្ធនោះឡើយ នេះបើយោងតាមឯកសារដែលបានដាក់នៅតុលាការជាន់ខ្ពស់ឡូសអាន់ជែឡេស។
ចៅក្រមបានប្រកាសថាអ្នកទាំងពីរជាមនុស្សនៅលីវស្របច្បាប់តាមសំណើរបស់នាងកាដាសៀនក្នុងខែមីនា ដោយបញ្ចប់អាពាហ៍ពិពាហ៍រយៈពេលប្រាំបីឆ្នាំរបស់ពួកគេ ប៉ុន្តែបញ្ហាទ្រព្យសម្បត្តិនិងការឃុំគ្រងកូនៗនៅតែត្រូវដោះស្រាយនៅក្នុងការកាត់ក្តីដែលបានគ្រោងចាប់ផ្តើមពីថ្ងៃទី ១៤ ខែធ្នូ។
អ្នកទាំងពីរមានកូន៤នាក់ដែលមានអាយុចាប់ពី៣ទៅ៩ឆ្នាំ។
កាដាសៀននិងវេសនឹងបែងចែកការចំណាយស្មើៗគ្នាសម្រាប់សន្តិសុខឯកជននិងសាលាឯកជនរបស់កូន រួមទាំងការសិក្សានៅមហាវិទ្យាល័យផងដែរ នេះបើយោងតាមសំណើដោះស្រាយបញ្ហាលុយកាក់។
ចំណែកបំណុលគឺសងគេរៀងៗខ្លួន ហើយអ្នកទាំងពីរមានកិច្ចព្រមព្រៀងមុនរៀបការនិងបានរក្សាទ្រព្យសម្បត្តិនៅដាច់ដោយឡែកពីគ្នា៕
កាដាសៀននិងកេនយ៉េ វេស ដោះស្រាយបញ្ហាលែងលះគ្នារួចរាល់អស់ហើយ
