Views: 14
ប្រែសម្រួល : កញ្ញាដាលីស (ដេល្លីម៉េល) ៖គណៈប្រតិភូមកពីប្រទេសស៊ុយអែតនិងហ្វាំងឡង់នៅថ្ងៃពុធនេះគ្រោងជួបពិភាក្សានៅទីក្រុងអង់ការ៉ាជាមួយមន្ត្រីជាន់ខ្ពស់តួកគីក្នុងកិច្ចខិតខំប្រឹងប្រែងដើម្បីជម្នះលើការជំទាស់របស់តួកគីចំពោះការប្រឹងប្រែងជាប្រវត្តិសាស្ត្ររបស់ពួកគេដើម្បីចូលរួមជាមួយសម្ពន្ធភាពណាតូ។
ស៊ុយអែតនិងហ្វាំងឡង់បានដាក់សំណើជាលាយលក្ខណ៍អក្សររបស់ពួកគេដើម្បីចូលរួមជាមួយអង្គការណាតូកាលពីសប្តាហ៍មុនក្នុងចំណាត់ការមួយដែលកត់សម្គាល់ផលប៉ះពាល់ភូមិសាស្ត្រនយោបាយដ៏ធំបំផុតមួយនៃសង្គ្រាមរបស់រុស្ស៊ីនៅអ៊ុយក្រែន និងដែលអាចគូរវាសឡើងវិញនូវផែនទីសន្តិសុខរបស់អឺរ៉ុប។
តួកគីបាននិយាយថា ខ្លួនជំទាស់នឹងសមាជិកភាពរបស់ប្រទេសតំបន់ន័រឌីក (Nordic)ទាំងពីរនៅក្នុងសម្ពន្ធភាពយោធានេះដោយលើកឡើងអំពីកង្វល់សន្តិសុខជាមួយប្រទេសស៊ុយអែតនិងការគាំទ្រក្នុងកម្រិតតិចតួចរបស់ហ្វាំងឡង់ចំពោះគណបក្សពលករឃឺដ ឬ PKK និងអង្គភាពផ្សេងទៀតដែលតួកគីចាត់ទុកជាការគំរាមកំហែងសន្តិសុខ។ តួកគីក៏បានចោទប្រកាន់ប្រទេសទាំងពីរថាបានដាក់កំហិតលើការនាំចេញអាវុធលើតួកគី និងបដិសេធមិនធ្វើបត្យាប័នជនសង្ស័យ “ភេរវករ” ផងដែរ។
ការជំទាស់របស់តួកគីបានបង្អាក់ក្តីសង្ឃឹមរបស់ទីក្រុងស្តុកខូម (Stockholm) និងទីក្រុងហែលស៊ីនគី (Helsinki) សម្រាប់សមាជិកភាពរហ័សរបស់ពួកគេក្នុងអង្គការណាតូចំពេលមានការឈ្លានពានរបស់រុស្ស៊ីមកលើអ៊ុយក្រែន ហើយធ្វើឱ្យភាពគួរឱ្យជឿទុកចិត្តនៃសម្ពន្ធភាពឆ្លងអាត្លង់ទិក (ណាតូ) ស្ថិតក្នុងគ្រោះថ្នាក់។ សមាជិកណាតូទាំង៣០លើកលែងតែតួកគីបានយល់ព្រមទទួលយកសមាជិកថ្មី៕
អគ្គលេខាធិការអង្គការណាតូលោក ជែន ស្តូលធិនបឺក (កណ្តាល) ចូលរួមក្នុងសន្និសីទសារព័ត៌មានជាមួយរដ្ឋមន្ត្រីការបរទេសហ្វាំងឡង់លោក ផេកកា ហាវីស្តូ (Pekka Haavisto) (ឆ្វេង) និងរដ្ឋមន្ត្រីការបរទេសស៊ុយអែត អាន លីនដេ (ស្តាំ) នៅទីស្នាក់ការកណ្តាលរបស់អង្គការណាតូក្នុងទីក្រុងព្រុចសែលកាលពីថ្ងៃចន្ទ ទី២៤ ខែមករា ឆ្នាំ២០២២
