Views: 9
ដោយៈ សុក្ខារិន/ពោធិ៍សាត់ៈ ពូជស្រូវនិងប្រភពទឹកគឺជាកត្តាសំខាន់ណាស់សម្រាប់ប្រជាកសិករធ្វើស្រែ បើមានតែពូជស្រូវខ្វះប្រភពទឹក ឬមានតែប្រភពទឹកខ្វះពូជស្រូវ គឺមិនអាចដំណើរការបង្កបង្កើនផលបាននោះទេ។ នេះជាការលើកឡើងរបស់លោក ខូយ រីដា អភិបាលនៃគណៈអភិបាលខេត្តពោធិ៍សាត់ ខណៈដឹកនាំមន្ត្រី មន្ទីរ អង្គភាពក្នុងខេត្ត ចុះពិនិត្យមើលការស្ដារដំណាំស្រូវឡើងវិញ នៅសង្កាត់ចំរើនផល ក្រុងពោធិ៍សាត់ នារសៀលថ្ងៃទី៥ ខែធ្នូ ឆ្នាំ២០២២ បន្ទាប់ពីទទួលបានពូជស្រូវរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកន្លងមកថ្មីៗនេះ។
ក្នុងឱកាសនោះលោក ខូយ រីដា បានជម្រុញឲ្យបងប្អូនប្រជាកសិករសង្កាត់ចំរើនផល ខិតខំបង្កបង្កើនផលស្រូវឲ្យអស់លទ្ធភាព ស្របតាមគោលបំណងរបស់សម្ដេចតេជោដែលបានផ្ដល់ពូជស្រូវជូន ហើយការប្រើជី និងប្រើថ្នាំក្នុងការដាំដុះដំណាំស្រូវ និងបន្លែផ្សេងៗ ត្រូវមានការប្រុងប្រយ័ត្នខ្ពស់ ព្រោះវាអាចបង្កឲ្យមានគ្រោះថ្នាក់ដល់អាយុជីវិតជាយថាហេតុ។
លោកបានណែនាំប្រជាពលរដ្ឋធ្វើយ៉ាងណាឲ្យមានស្រូវពេញជង្រុក ដាំដំណាំ និងចិញ្ចឹមសត្វជុំវិញផ្ទះឲ្យបានច្រើន ដើម្បីផ្គត់ផ្គង់ជីវភាពគ្រួសារឲ្យសម្បូរធូរធារ។ ជាមួយគ្នានេះត្រូវបញ្ជូនកូនទៅរៀនឲ្យបានគ្រប់ៗគ្នា អប់រំទូន្មានប្រៀនប្រដៅពួកគេឲ្យបានល្អ ចៀសវាងដើរផ្លូវខុសនាំឲ្យខូចអនាគត បង្កការលំបាកដល់ក្រុមគ្រួសារ និងសង្គមជាតិ។
សូមបញ្ជាក់ថា តាមរបាយការណ៍ពីចៅសង្កាត់ និងមន្ទីរកសិកម្មរុក្ខាប្រមាញ់ និងនេសាទ ខេត្តពោធិ៍សាត់ បានឲ្យដឹងថា នៅសង្កាត់ចំរើនផលនេះ ផ្ទៃដីដែលត្រូវស្ដារឡើងវិញមានចំនួន១.៥៥២ហិកតា ដែលមានភូមិចំនួនបួន គឺភូមិលាវ ភូមិស្វាយមាស ភូមិអូរតូង និងភូមិកំពង់ស្ទោង។
តាមការពិនិត្យជាក់ស្ដែង បរិមាណនៃការប្រមូលផលស្រូវរបស់បងប្អូនប្រជាកសិករឆ្នាំនេះមានការកើនឡើងជាងបណ្ដាឆ្នាំមុនៗ ដោយសារឆ្នាំនេះរបបទឹកភ្លៀងគ្រប់គ្រាន់ស្ទើរគ្រប់ទីកន្លែង ទោះបីតំបន់ខ្លះមានការប៉ះពាល់លិចលង់ដោយជំនន់ទឹកភ្លៀងក្ដី តែស្រូវស្រែរបស់បងប្អូនគឺពុំមានផលប៉ះពាល់ច្រើននោះទេ៕/R
