Views: 4
ប្រែសម្រួលៈបំណង(ST)៖ អនុប្រធានាធិបតីអាម៉េរិកលោកស្រី កាម៉ាឡា ហារីស និងប្រធានាធិបតីកូរ៉េខាងត្បូង លោក យូន ស៊ុក-យ៉ូល បានថ្កោលទោស«វោហាស័ព្ទគំរាមប្រើនុយក្លេអ៊ែរបែបបង្ករឿង»ពីកូរ៉េខាងជើងនិងបានបញ្ជាក់អះអាងឡើងវិញអំពីការប្តេជ្ញាចិត្តរបស់ប្រទេសទាំងពីរក្នុងការរំសាយចោលនុយក្លេអ៊ែរទាំងស្រុងចេញពីឧបទ្វីបកូរ៉េ នេះបើតាមសេតវិមានបាននិយាយកាលពីថ្ងៃព្រហស្បតិ៍។
លោកស្រីហារីសបានទៅដល់ទីក្រុងសេអ៊ូលកាលពីព្រឹកថ្ងៃព្រហស្បតិ៍ នៅពេលតែប៉ុន្មានម៉ោងក្រោយកូរ៉េខាងជើងបាញ់សាកល្បងកាំជ្រួចផ្លោងពីរគ្រាប់។
សេតវិមានបាននិយាយនៅក្នុងសេចក្តីថ្លែងការណ៍មួយថា «មេដឹកនាំទាំងពីរបានថ្កោលទោសវោហាស័ព្ទប្រើនុយក្លេអ៊ែរបែបបង្ករឿងរបស់កូរ៉េខាងជើងនិងការបាញ់កាំជ្រួចផ្លោង ដែលវារំលោភសេចក្តីសំរេចចិត្តរបស់អង្គការសហប្រជាជាតិ ហើយពួកលោកក៏បានពិភាក្សាអំពីចម្លើយតបរបស់យើងចំពោះការបង្ករឿងនាពេលអនាគត រួមទាំងកិច្ចសហការត្រីភាគីជាមួយជប៉ុន»។
ក្នុងអំឡុងពេលដំណើរទស្សនកិច្ច លោកស្រីហារីសក៏នឹងពិភាក្សាអំពីការព្រួយបារម្ភរបស់រដ្ឋាភិបាលទីក្រុងសេអ៊ូលអំពីការផ្លាស់ប្តូរនៅក្នុងការឧបត្ថម្ភរបស់រដ្ឋលើយានយន្តអគ្គិសនី ទំនាក់ទំនងត្រីភាគីជាមួយជប៉ុននិងអំពើរបស់ចិននៅក្នុងច្រកសមុទ្រតៃវ៉ាន់ ។
លោកស្រីបានសរសើរអំពីអំពីសម្ពន្ធភាពនេះថា«មានសារសំខាន់សំរាប់សន្តិសុខនិងវិបុលភាព»នៅលើឧបទ្វីបកូរ៉េនិងនៅក្នុងតំបន់ឥណ្ឌូប៉ាស៊ីហ្វិក ហើយបានសម្តែងក្តីសង្ឃឹមថាវានឹងជំរុញទំនាក់ទំនងអោយកាន់តែរឹងមាំឡើង។
នៅពេលចាប់ផ្តើមកិច្ចប្រជុំលោកស្រីហារីសបានប្រាប់លោកយូនថា « ខ្ញុំមកទីនេះដើម្បីពង្រឹងកម្លាំងសម្ពន្ធភាពរបស់យើងនិងពង្រឹងការងាររួមគ្នារបស់យើង»។
ចំណែកលោកយូនក៏បានប្តេជ្ញាជំរុញសម្ពន្ធភាពដោយលោកនិយាយថា ដំណើរទស្សនកិច្ចរបស់លោកស្រីហារីសក្រោយដំណើររបស់លោកចូ បៃដិន កាលពីខែឧសភានឹងជា«ចំណុចរបត់មួយទៀត»ដើម្បីសំរេចគោលដៅនោះ។
ក្នុងពេលជាមួយគ្នា កងទ័ពជើងទឹកកូរ៉េខាងត្បូងបាននិយាយថា ខ្លួននឹងធ្វើសមយុទ្ធប្រឆាំងនាវាមុជទឹកត្រីភាគីជាមួយកងកម្លាំងអាម៉េរិកនិងជប៉ុននៅថ្ងៃសុក្រទី៣០កញ្ញា ដើម្បីធ្វើអោយប្រសើរសមត្ថភាពរបស់គេក្នុងការទប់ទល់នឹងការគំរាមពីកូរ៉េខាងជើង រួមទាំងការបាញ់កាំជ្រួចប្រឆាំងនាវាមុជទឹកផង៕
អនុប្រធានាធិបតីអាម៉េរិក កាម៉ាឡា ហារីស ជួបពិភាក្សាជាមួយប្រធានាធិបតីកូរ៉េខាងត្បូងនៅក្រុងសេអ៊ូលកាលពីថ្ងៃ២៩កញ្ញា
