Views: 1
ប្រែសម្រួល : កញ្ញាដាលីស (ស្ពុតនិក) ៖ ប្រកាសនៅសប្តាហ៍នេះនូវពិធីចុះហត្ថលេខាលើកិច្ចព្រមព្រៀងស្តីពីការរក្សាទុកអាវុធនុយក្លេអ៊ែរកលយុទ្ធរបស់រុស្ស៊ីនៅលើទឹកដីបេឡារូស រុស្ស៊ីនិងរដ្ឋាភិបាលក្រុងមីន (Minsk)បានរំលឹកឡើងវិញថា នេះគឺជាការឆ្លើយតបទៅនឹងគោលនយោបាយគឃ្លើនដែលបន្តធ្វើឡើងដោយបណ្តាប្រទេសអមិត្ត។ តើអ្វីទៅជំរុញឱ្យរដ្ឋាភិបាលក្រុងមូស្គូដាក់ពង្រាយនុយក្លេអ៊ែរមិនមែនយុទ្ធសាស្ត្រនេះនៅបេឡារូស?
តើកិច្ចព្រមព្រៀងទាំងអស់គឺអំពីអ្វី?
រដ្ឋមន្ត្រីក្រសួងការពារជាតិរុស្ស៊ី លោក សឺហ្គេ សយហ្គូ (Sergey Shoigu) និងសមភាគីបេឡារូស លោក វីទ័រ ក្រេនីន (Viktor Khrenin)បានចុះហត្ថលេខាលើឯកសារមួយចំនួននៅទីក្រុងមីនកាលពីដើមសប្តាហ៍នេះ ដើម្បីកំណត់នីតិវិធីសម្រាប់ការរក្សាទុកអាវុធនុយក្លេអ៊ែរមិនមែនយុទ្ធសាស្ត្ររបស់រុស្ស៊ីនៅឯកន្លែងស្តុកទុកពិសេសនៅលើទឹកដីបេឡារូស។
រឿងនេះធ្វើឡើងបន្ទាប់ពីប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសកាលពីចុងខែមីនាថារដ្ឋាភិបាលក្រុងមូស្គូនិងក្រុងមីនបានយល់ព្រមដាក់អាវុធនុយក្លេអ៊ែរកលយុទ្ធរបស់រុស្ស៊ីនៅក្នុងប្រទេសបេឡារូស ក្នុងសកម្មភាពដែលលោកបានសង្កត់ធ្ងន់ថាមិនបំពានលើការប្តេជ្ញាចិត្តរបស់រុស្ស៊ីស្តីពីការមិនរីកសាយភាយអាវុធនុយក្លេអ៊ែរនោះទេ។
មិនយូរប៉ុន្មាន ឯកអគ្គរដ្ឋទូតរុស្ស៊ីប្រចាំនៅទីក្រុងមីន លោក បូរីស ហ្គ្រីសឡូវ (Boris Gryzlov)បាននិយាយថាអាវុធនុយក្លេអ៊ែរកលយុទ្ធនឹងត្រូវដាក់ពង្រាយនៅជិតព្រំដែនភាគខាងលិចនៃរដ្ឋសហភាពបេឡារូសនិងរុស្ស៊ី។
តើអាវុធនុយក្លេអ៊ែរកលយុទ្ធជាអ្វី?
អាវុធនុយក្លេអ៊ែរកលយុទ្ធ (TNW) ដែលគេស្គាល់ផងដែរថាអាវុធនុយក្លេអ៊ែរមិនមែនយុទ្ធសាស្ត្រ (NSNW) រួមមានក្បាលគ្រាប់នុយក្លេអ៊ែរខ្នាតតូចនិងប្រព័ន្ធចែកចាយដែលរចនាឡើងដើម្បីប្រើប្រាស់នៅលើសមរភូមិឬសម្រាប់ការវាយប្រហារដែលមានដែនកំណត់។ TNW រួមមានគ្រាប់បែកទំនាញ មីស៊ីលរយៈចម្ងាយខ្លី កាំភ្លើងធំ គ្រាប់មីន គ្រាប់ទម្លុះដីជ្រៅៗ និង គ្រាប់ថូផេដូ (Torpedo)ដែលបំពាក់ជាមួយក្បាលគ្រាប់នុយក្លេអ៊ែរ។
បើប្រៀបធៀបទៅនឹងអាវុធនុយក្លេអ៊ែរយុទ្ធសាស្ត្រ គ្រាប់ NSNWមួយមានកម្លាំងតិចជាងនិងមានគោលបំណងបំផ្លិចបំផ្លាញគោលដៅរបស់សត្រូវនៅក្នុងតំបន់ជាក់លាក់មួយដោយមិនបង្កឱ្យមានការបំផ្លិចបំផ្លាញរីករាលដាលនិងការសាយភាពសារធាតុវិទ្យុសកម្មរាលដាលទេ។
ទិន្នផលរបស់ TNW ប្រែប្រួលពី១គីឡូតោនទៅប្រហែល ៥០ គីឡូតោន ខណៈអាវុធនុយក្លេអ៊ែរយុទ្ធសាស្ត្រមានទិន្នផលពី ១០០ គីឡូតោនទៅជាងមួយមេហ្គាតោន។ អ្វីដែលសំខាន់គឺថា គិតត្រឹមឆ្នាំ២០២៣ គ្មានអាវុធនុយក្លេអ៊ែរកលយុទ្ធណាមួយត្រូវបានប្រើក្នុងស្ថានភាពប្រយុទ្ធនោះឡើយ។
រដ្ឋាភិបាលក្រុងមូស្គូមិនបានបញ្ចេញតួលេខចំនួនគ្រាប់ TNW របស់ខ្លួន ឬ ព័ត៌មានជាក់លាក់ណាមួយដែលទាក់ទងនឹងសព្វាវុធនេះនោះទេ ប៉ុន្តែរដ្ឋាភិបាលក្រុងវ៉ាស៊ីនតោនបានអះអាងថាតួលេខទាក់ទងនឹងគ្រាប់ TNW របស់រុស្ស៊ីគឺច្រើនជាង ១០ ដងដែលសហរដ្ឋអាម៉េរិកមាន។
តើមានអ្វីនៅពីក្រោយការដាក់ពង្រាយអាវុធនុយក្លេអ៊ែរកលយុទ្ធរបស់រុស្ស៊ីនៅបេឡារូស?
ប្រកាសពីការចុះហត្ថលេខារបស់រដ្ឋាភិបាលក្រុងមូស្គូ-មីន នៅសប្តាហ៍នេះលើឯកសារស្តីពីការរក្សាទុកគ្រាប់ NSNW របស់រុស្ស៊ីនៅលើទឹកដីនៃប្រទេសជិតខាងរបស់ខ្លួននោះ ក្រសួងការបរទេសបេឡារូសបានរំលឹកឡើងវិញថា នេះគឺជាការឆ្លើយតបទៅនឹងគោលនយោបាយគឃ្លើនដែលកំពុងត្រូវបានអនុវត្តដោយប្រទេសអមិត្ត។
សម្តីនេះត្រូវបានបន្ទរដោយរដ្ឋមន្ត្រីក្រសួងការពារជាតិរុស្ស៊ីលោក សឺហ្គេ សយហ្គូ (Sergey Shoigu)ដែលបានសង្កត់ធ្ងន់ថារដ្ឋាភិបាលក្រុងមូស្គូនិងមីនត្រូវបានបង្ខំឱ្យធ្វើការសម្រេចចិត្តសមស្របលើវិធានការសងសឹកក្នុងវិស័យយោធា-នុយក្លេអ៊ែរ ដោយសារតែ “ការកើនឡើងយ៉ាងខ្លាំងនៃការគំរាមកំហែង” នៅព្រំដែនខាងលិចនៃប្រទេសទាំងពីរ។
លោកសយហ្គូបាននិយាយថា “ខ្ញុំចង់កត់សម្គាល់ថា សកម្មភាពទាំងអស់ត្រូវបានរៀបចំយ៉ាងតឹងរ៉ឹងស្របតាមកាតព្វកិច្ចអន្តរជាតិដែលមានស្រាប់ហើយមិនបំពានលើសន្ធិសញ្ញាស្តីពីការមិនរីកសាយភាយអាវុធនុយក្លេអ៊ែរនោះទេ”។
ទស្សនៈនេះត្រូវបានចែករំលែកដោយអ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) ដែលបានប្រាប់អ្នកយកព័ត៌មានថារដ្ឋាភិបាលក្រុងមូស្គូដឹងថារដ្ឋាភិបាលក្រុងមីនកំពុងប្រឈមមុខនឹងឥរិយាបថ “មិនរាក់ទាក់និងសូម្បីអរិភាព” ពីរដ្ឋជិតខាងរបស់ខ្លួន រួមទាំង “ចេតនាជ្រៀតជ្រែកកិច្ចការផ្ទៃក្នុងរបស់បេឡារូស”។
លោកបាននិយាយថា ទាំងអស់នេះបានបង្ហាញថា ទាំងបេឡារូសនិងរុស្ស៊ីកំពុងប្រឈមមុខនឹងបរិយាកាសអរិភាពយ៉ាងខ្លាំង ដោយហេតុនេះហើយជំរុញឱ្យប្រទេសទាំងពីរពង្រឹងភាពជាដៃគូបន្ថែមទៀត ជាពិសេសទាក់ទងនឹងទំនាក់ទំនងទ្វេភាគីក្នុងវិស័យយោធា។ លោកប៉េស្កូវមិនបានបញ្ជាក់ថាតើរុស្ស៊ីបានចាប់ផ្តើមដាក់ពង្រាយគ្រាប់ TNW នៅក្នុងប្រទេសបេឡារូសរួចហើយឬក៏អត់នោះទេ។
នៅចុងខែមីនា រដ្ឋាភិបាលក្រុងមីនបានបញ្ជាក់យ៉ាងច្បាស់ថា ខ្លួនបានសម្រេចចិត្តធ្វើជាម្ចាស់ផ្ទះទទួលគ្រាប់ NSNWរបស់រុស្ស៊ី បន្ទាប់ពីរងសម្ពាធជាច្រើនឆ្នាំពីសហរដ្ឋអាម៉េរិក និងសម្ពន្ធមិត្តរបស់ខ្លួន ក្នុងគោលបំណងផ្លាស់ប្តូរទិសដៅនយោបាយនិងភូមិសាស្ត្រនយោបាយរបស់បេឡារូស។
ក្រសួងការបរទេសបេឡារូសបាននិយាយនៅក្នុងសេចក្តីថ្លែងការណ៍មួយថា “ក្នុងរយៈពេលពីរឆ្នាំកន្លះចុងក្រោយនេះ សាធារណរដ្ឋបេឡារូសបានទទួលរងសម្ពាធនយោបាយ សេដ្ឋកិច្ចនិងព័ត៌មានមិនធ្លាប់មានពីមុនមកពីសហរដ្ឋអាម៉េរិក ចក្រភពអង់គ្លេស និងសម្ពន្ធមិត្តរបស់អង្គការណាតូ ក៏ដូចជាប្រទេសជាសមាជិកសហភាពអឺរ៉ុប។ទិដ្ឋភាពនៃកាលៈទេសៈទាំងនេះនិងការព្រួយបារម្ភនានាព្រមទាំងហានិភ័យស្របច្បាប់នៅក្នុងវិស័យសន្តិសុខជាតិដែលកើតចេញពីពួកវា បេឡារូសត្រូវបង្ខំចិត្តឆ្លើយតបដោយការពង្រឹងសមត្ថភាពសន្តិសុខនិងការពារជាតិរបស់ខ្លួន”។
តើប្រធានាធិបតីពូទីនមានគំនិតយ៉ាងណាអំពីការដាក់ពង្រាយគ្រាប់ TNW របស់រុស្ស៊ីលើទឹកដីបេឡារូស?
ប្រធានាធិបតី វ្ល៉ាឌីមៀ ពូទីន បានរំលឹកក្នុងបទសម្ភាសន៍ជាមួយប្រព័ន្ធផ្សព្វផ្សាយរុស្ស៊ីថា សមភាគីបេឡារូសលោក អាឡិចសាន់ឌ័រ លូកាសិនកូ (Alexander Lukashenko)ពីមុនបានជំរុញឱ្យរដ្ឋាភិបាលក្រុងមូស្គូដាក់ពង្រាយអាវុធនុយក្លេអ៊ែរនៅក្នុងប្រទេសបេឡារូស។
ប្រធានាធិបតីរុស្ស៊ីបានគូសបញ្ជាក់ថា គន្លឹះភ្លាមៗសម្រាប់ការដាក់ពង្រាយគ្រាប់ TNWក្នុងប្រទេសបេឡារូសគឺកើតចេញពីការសម្រេចចិត្តរបស់រដ្ឋាភិបាលចក្រភពអង់គ្លេសក្នុងការផ្តល់ឱ្យអ៊ុយក្រែននូវគ្រាប់ទម្លុះពាសដែកដែលមានផ្ទុកសារធាតុអ៊ុយរ៉ាញ៉ូមរលាយ ជាអ្វីដែលលោកនិយាយថា “ទោះតាមមធ្យោបាយណាក៏ដោយគឺនៅតែទាក់ទងនឹងបច្ចេកវិជ្ជានុយក្លេអ៊ែរ”។
លោកពូទីនបានសង្កត់ធ្ងន់ថាតាមរយៈការដាក់គ្រាប់ NSNW នៅក្នុងប្រទេសបេឡារូសរុស្ស៊ីនឹងធ្វើអ្វីដែលអាម៉េរិកបានធ្វើអស់ជាច្រើនទសវត្សរ៍ដោយការដាក់ពង្រាយអាវុធនុយក្លេអ៊ែរកលយុទ្ធរបស់ខ្លួននៅក្នុងប្រទេសបែលហ្ស៊ិក អាល្លឺម៉ង់ អ៊ីតាលី ហូឡង់ និងតួកគី។
យោងតាមប្រធានាធិបតីរុស្ស៊ី រដ្ឋាភិបាលក្រុងមូស្គូបានជួយរដ្ឋាភិបាលក្រុងមីនរួចហើយដើម្បីកែឱ្យប្រសើរឡើងនូវយន្តហោះបេឡារូសចំនួន ១០ គ្រឿង ដើម្បីឱ្យពួកវាអាចដឹកអាវុធនុយក្លេអ៊ែរនេះបាន។ លោកបាននិយាយថា រុស្ស៊ីក៏បានផ្តល់ឱ្យបេឡារូសនូវប្រព័ន្ធមីស៊ីលរយៈចម្ងាយខ្លី Iskander ដែលអាចបំពាក់ជាមួយនឹងក្បាលគ្រាប់ធម្មតាឬនុយក្លេអ៊ែរ។ លោកពូទីនបានបន្ថែមថា ការសាងសង់ឃ្លាំងផ្ទុកអាវុធនុយក្លេអ៊ែរកលយុទ្ធនៅបេឡារូសនឹងរួចរាល់នៅថ្ងៃទី ១ ខែកក្កដា៕
អាវុធនុយក្លេអ៊ែរកលយុទ្ធនឹងត្រូវដាក់ពង្រាយក្នុងបេឡារូសឆាប់ៗ
